Raajii Hose'ee 2 - Kitaaba Woyyuu

¹ Kanaafuu isin worra Israa'elii obboleeyyan keessan ka dhiiraa, «Amii » obboleeyyan teessan ta intalaa «Ruhaamaa» jedha'aa maqaa moggaasaa'a.

Baniin Israa'elii Waan Amanamuu Dhabaniif Adabaman

² Ijoollee tiyya! armaan maayessa haati teessan waan haadha manaa tiyya hin taanee fi anillee waan abbaa manaa isi'ii hin taaneef laalcha seebarumma'aatii fi seebara ufii akka dhiiftu isii gorsaa'a.

³ Isiin yoo deebi'uu baatte garuu akka guyyaa dhalatteetitti qullaa isii hambisa; akka lafa gogee duwwaa ta'ee isii taasisa; dheebu'uun isii ajjeesa.

⁴ Ijoolleen isi'ii waan intala seebartu irraa dhalataniif ani garaa isaanii hin laafu.

⁵ Haati isaanii waan seebartuu taateef isiin akkaataa nama saalfachiisuun isaan ulfoofte; isiin wonti waan kana gooteef jaalalloota tiyya ka buddeena, bisaan, uffata suufi'iitii fi jirbii irraa hojjatame, sayiti'ii fi waan dhugu naa kennan duukaa deema jetteeti.

⁶ Kanaafuu ani karaa isi'ii qore'een cufa; karaa baatuun akka hin arganne naannaya isi'ii dhaga'aan dallaya.

⁷ Isiin jaalalloota ufii duukaa deemti; garuu isaan dhaqqabuu hin dandeettu; isaan soxxi; garuu isaan hin argitu; isiin ani ammaa achi jireenna ammaa irra ka durii naa woyya; kanaafuu gara abbaa manaa kiyya ka duraa deema jetti.

⁸ Isiin ka midhaan, daadhii woyini'ii dhadhaa ejersaa kenneef akka ana ta'e sirima hin hubanne; meeti'ii fi worqii ani guddisee isi'ii kenne waaqa tolfamaa Ba'aal jedhamee waamamuu dhiyeessite.

⁹ Midhaan hennaa haama'aa woyiniillee hennama inni gayetti jalaa fudhadha; uffata suufi'ii fi jirbii irraa hojjatame ka nafa ufii qulla'aan dhoffattullee jalaa fudhadha.

¹⁰ Ani jaalalloo isi'ii afo'otti qulla isii hambisa; ka harka kiyyaa isii hambisu hin jiru.

¹¹ Ani ayyaannan isiin itti gammaddu ka sambattanii, ka wogga'aatii fi ka ji'aa maraa hin balleessa; ayyaannan isi'ii ka addaa maraa akka isiin hin kabajjine taasisa.

¹² Biqiltuu woyini'iitii fi muka hurbu'uu ka isiin jaalalloo ufii irraa fudhatte hin bubuqqisa; qonna isi'ii ka woyini'iitii fi ka daraaraa gara garaa gara bosonaatitti jijjiira; bineensonni bosonaallee isa nyaatan.

¹³ Ani isiin ana dhiiftee waan waaqa tolfamaa «Ba'aal» jedhamuu hixaana aarsa'aa faaya gara garaa godhattee jaalalloota ufii duukaa deemteef isii adaba jedha Rabbi.

Jaalala Rabbi Banii Ufiitii Qabu

¹⁴ Kanaafuu ani deebi'ee gara lafa gammoojji'ii isii fidee achitti dubbii jaalalaatiin sossobee isii gorsa.

¹⁵ Dhaaba woyini'ii ka duraa isi'ii deebisa dhooqa rakkinnaallee akka balbala abdi'ii isi'ii ta'u godha; achitti hennaa biyya Misiriitii baatu akka hennaa ijoollumma'aan jirtuutitti gammachu'uun faarfatti.

¹⁶ Guyyaa san ana Rabbiin, «Abbaa manaa kiyya» jedha'aa na waamta malee akka waaqa tolfamaa Ba'aalii gooftaa kiyya jedha'aa na hin waamtu.

¹⁷ Isiin afaan ufii keessaa maqaa waaqa tolfamaa Ba'aalii balleessu'uuf maqaan isaanii lammata hin waamamu.

¹⁸ Ani hennaa san waan keessaniif bineensota, simbirran sami'iitii fi uumama gara'aan lafa irra looyan woliin waadaa gala; ani lafa irraa buundhee, guraade'ee fi lola balleessee akka isin nagayaan hara baafattan godha.

¹⁹ Israa'el! ani baraa haga bara baraa akka haadha manaa tiyyaa si taasifadha; akka ati balchummaa'a, haqummaa'a, jaalala baraa haga bara baraatii fi araaraan; akka haadha manaa tiyyaa akka taatu si taasisa.

²⁰ Ani waadaa kiyya eegu'uun akka haadha manaa tiyyaa si taasisa; atillee akka ani Rabbiin ta'e beetta.

²¹ Rabbi akkana jedha, «Ani guyyaa san deebii sii deebisa; ani sami'ii deebii deebisa; samiiwwanillee lafaaf deebii deebisan;

²² Laftillee midhaan, woyini'ii fi dhadhaa ejersaa kennu'uun Iyiziraa'elii deebii deebifti.

²³ Ani biyyattii keessatti banii kiyya ijaaree, akka durooman taasisa; worra ‹araara hin argatan› jedhamanii hin araarama; worra ‹banii kiyyaa miti› jedhaman ani ‹banii kiyya› isaaniin jedha; isaan anaan ‹Ati Waaqa keenna› naan jedhan» jedha.