Kitaaba Faaruu Ermiyaasii 3 - Kitaaba Woyyuu

Abdii Aagi'iin Argamu

¹ Ka ulee lola isaatiin; rakkoo arge ana.

² Uf afo'oo na baase; ifaan uduu hin taane akka karaa dukkanaatiin deemu na godhe.

³ Dhugama guyyaa maraa deddeebi'ee harka ufiitiin na adabe.

⁴ Inni foonii fi gogaa kiyya hin jaarse; lafeewwan kiyyallee hin caccabse.

⁵ Mararo'oo fi dadhabbi'iin dallawa natti ijaare; naannaya kiyyallee hin marse.

⁶ Akka worra du'anii turaniititti akka dukkana keessa jiraadhu na godhe.

⁷ Dallawa keessatti natti cufe; kanaaf jalaa bayuu hin dandeenne; hidhaa haada sibiilaallee natti jabeesse.

⁸ Gargaarsa barbaadee yoo waamuu fi yoo iyyadhullee; kadhaa kiyya dhagayuu hin barbaanne.

⁹ Karaa kiyya dhagaa bocameen cufe; daandii kiyya hin dabse.

¹⁰ Akka doobbaa riphee ciisuutitti; akka leenca dhokateetitti;

¹¹ harkisee karaa irraa na baase; na mummure; gargaarsa malee na hambise.

¹² Buundhee ufii natti qabe; eboowwan ufii natti deebifate.

¹³ Buundhee qolaa baafatee uffaa na woraane.

¹⁴ Ani ka baniin kiyya itti baldu ta'e; isaan guyyaa guutuu coora'aa natti faarsan.

¹⁵ Hidda hadhaayaa na nyaachise; hadhooftuu na quubse.

¹⁶ Dhaga'aan ilkaan na cabse; daaraa keessatti na dhiite.

¹⁷ Lubbuun tiyya nagaya dhabde; gammachuun maal akka ta'e irraanfadhe.

¹⁸ Kanaafuu «Ulfinni kiyya; wonti ani Rabbitti abdadhe maruu deemeera» jedhe.

¹⁹ Ani rakkachu'uu fi dhiphachuu kiyya; mararo'oo fi hadhaayaa yaadadha;

²⁰ hennaa maraa yoo waan kana dhudhumu; lubbuun tiyya na keessatti dhiphatti.

²¹ Ta'ullee hennaa waan kana yaadadhu; abdi'iin guuttama.

²² Nu'u wonti hin banneef sababaa araara Rabbiitiif; gara laafummaan isaa waan hin dhumneef.

²³ Ganama ganama haarawa; amanamummaan keellee gudda'a.

²⁴ Ani akkana ufiin jedhe, Rabbi gayee kiyya; kanaafuu isa abdadha.

²⁵ Worra isa abdataniif; nama isa barbaaduuf Rabbi misha'a.

²⁶ Namni uduu cadhisee fayyisuu Rabbii abdatee misha'a.

²⁷ Namni dargaggumma'atti uduu qambaraa baadhatee misha'a.

²⁸ Rabbi waan itti baachiseef cadhisee hojjuma ufii haa taa'uu.

²⁹ Abdi'iin jiraachuu waan danda'uuf gad uf haa qabuu.

³⁰ Nama isa dhabanaasutti boqoo ufii haa kennuu; arraballee haa obsuu.

³¹ Baraa haga bara baraa Rabbi waan nama hin ganneef;

³² yoma leelalchellee garaa laafa; jaalalli isaa guddaan waan hin jijjiiramneef;

³³ ta'e jedhee rakkoo yookaan leelaluu ilmaan namaatitti waan hin finneef.

³⁴ Hidhamtoonni lafaa maruu hennaa lukaan dhiitaman;

³⁵ Rabbii guddaa afo'otti nama yoo mirga dhooggatan;

³⁶ nama yoo handhi jalaa dhidhatu Gooftaan waan akkanaa kana hin arguu?

³⁷ Rabbi yoo ajaje malee ka dubbatee raawwatuu danda'u eennu?

³⁸ Waan hamaa ta'ee'e mishaa'a waan afaan Rabbiitii bayuu mitii?

³⁹ Namni jiraataan yoo cubbuu ufiitiif adabamu; maaf guguunguma?

⁴⁰ Karaa keenna qorree haa laalluu; gara Rabbii haa deebinuu;

⁴¹ Garaa keenna harka woliin gara Waaqa keenna ka samii jiruu haa kaafnuu; akkana haa jennuu;

⁴² «Dinneerra; cubbuu hojjanneerra; ati nuu hin dhiifne;

⁴³ «Ati lolaan uf golgite; nu ariite; gara laafinna malee nu ajjeefte.

⁴⁴ Akka kadhaan keenna si bira hin geenne; duumessaan uf golgite; hulee bulti'ii keellee duumessaan dhossite.

⁴⁵ Ati worra Yihuudii hin taane jiddu'utti xuri'ii fi huura nu taasifte.

⁴⁶ Diintonni teenna maruu afaan nutti banatan.

⁴⁷ Nu'u badi'ii fi diiggamu'uun; rakko'oo fi raafamaan rakkanne.

⁴⁸ Baniin kiyya waan dhumeef lolaan imimmaanii ija kiyyaa jige.

⁴⁹ Hara baafannaa malee; uduu wol irraa hin cinne; ija tiyya keessaa imimmaan yaa'a;

⁵⁰ haga Rabbi ol samii gubba'aa argutti.

⁵¹ Waan dubartoota qachaa tiyya keessa jiran maraa irra gaye arguun kiyya; gadda hadhaaya'atu na irra gaye.

⁵² Worri sababaa malee diina natti ta'an; akka simbiraatitti na adamsan;

⁵³ lubbuu tiyya boolla keessatti balleessuu yaalan; dhagaa na gubbaa kaayan.

⁵⁴ Bisaan guutee mataa kiyya irra gara gale; ani bade jedhee yaade.

⁵⁵ Uduu boolla gad fagoo keessa jiru; yaa Rabbi! ani maqaa kee waame.

⁵⁶ Kadhaa kiyya hin dhageette; «Gargaarsa barbaadee yoo iyyu na jalaa dhagayuu hin didin.»

⁵⁷ Ani hennaa si waame natti dhiyaatte; akkasuma «Hin sodaatin!» naan jette.

⁵⁸ Gooftaa kiyya! ati naa falmite; lubbuu tiyyallee hin furte.

⁵⁹ Yaa Rabbi! miidhaa na irra gaye argitee murtii naa murteessi!

⁶⁰ Haluu bayuu isaanii maraa; mala isaan na irratti yaadan argiteerta.

⁶¹ Yaa Rabbi! arraba isaanii maraa; mala isaan na irratti yaadan maraa dhageetteerta;

⁶² Kunniin waan diintonni tiyya guyyaa maraa natti malanii fi waan isaan natti gunguma'aa oolan.

⁶³ Mee isaan laali! taa'anii yookaan dhaabatanii sirbaan natti baldan.

⁶⁴ Yaa Rabbi! waan harki isaanii hojjateef gatii isaan barbaachisu deebisii isaanii kenni.

⁶⁵ Golga garaa isaaniititti golgi; abaarsi kee isaan irra haa ta'u!

⁶⁶ Samiiwwan Rabbiitii gaditti lola keetiin isaan ari'i; isaan balleessi!