Kitaaba Iyyaasu'uu 9 - Kitaaba Woyyuu

Namoonni Gabaa'oonii Iyyaasuu Soban

¹ Mootonni Keexotaa, Amoorotaa, Kana'aanotaa, Feerzotaa, Eewwotaa, Iyyaabusootaa, laga Yoordaanosii gama lafa onaa ka gaaraa qaccee galaanaa guddaa Meditiraaniyaanii Libaanosiin afoo jiran haga waan kana dhagayan;

² Iyyaasu'uu fi worra Israa'eliitiin lolu'uuf tokko ta'anii wolitti qabaman.

³ Namoonni Gabaa'oonii garuu waan Iyyaasuun Iyyaariko'oo fi Gaayiin irratti godhe hennaa dhagayan isaanillee isaan irratti dhara hojjatan.

⁴ Ufiif dhalee qabatanii qalqala moofaa hodhametti daadhii buusanii harriin ufiititti fe'atan;

⁵ uffata moofee bibbiinxame uffatanii kophee ciccitaa hohodhame godhatanii buddeenni dhalee godhatanillee ka gogee fi ka aararraaye ture.

⁶ Haga waan kanniin godhanii raawwataniin maayessa, Gelgelaa hulee Iyyaasuun itti quphatee dhaqanii isaa fi worra Israa'eliitiin, «Biyya fago'oo dhufneerraa ammallee nu woliin waadaa galaa'a» isaaniin jedhan.

⁷ Namoonni Israa'elii worra Eewwotaatiin, «Maal laataa yoo ka isin nu woliin teettan ta'e, attamitti isin woliin waadaa galla?» isaaniin jedhan.

⁸ Isaan Iyyaasu'uun, «Nu garboota teeti» jedhaniin; Iyyaasuunillee, «Isin eennu fa'a? Eessaa dhuftan?» isaaniin jedhe.

⁹ Isaanillee akkana jedhaniin «Sababaa maqaa Rabbii Waaqa keetiitiin biyya guddisee fagaatu irraa dhufneerra» gurra isaa waan inni biyya Misirii irratti godhe maraa,

¹⁰ mootota Amoorotaatii fi mootii Haseboonii Seewooniin mootii Baasaanii ka Astaarootiin keessa ture ka Hasebooniin keessa jiru Aagiin laga Yoordaanosiitiin gamatti waan godhe maraa dhageenneerra.

¹¹ Jaarsonni keenna, worri biyya keenna keessa jiraatan maruu imala deemtaniif dhalee harkatti qabadhaa'a; gara isaanii dhaqaa'a; nu garboota teessanii ammallee nu woliin waadaa galaa'a isaaniin jedhaa'a» nuun jedhan.

¹² Guyyaa gara keessan dhufu'uuf kaane, buddeena kana dhalee oo'aa qabannee turre amma garuu nu jalaa aararraayee goge.

¹³ Qalqallan daadhi'ii kunniin hennaa inni haarawaa itti nandheerra; amma garuu nu jalaa dhooye, karaan waan guddisee fagoo ta'eef uffanni keennaa fi kopheen keennallee nu jalaa moofeera» jedhaniin.

¹⁴ Worri Israa'elii uduu Rabbiin hin gaafanne dhalee isaanii irraa fudhatan.

¹⁵ Kanaafuu Iyyaasuun isaan woliin nagaya buusee isaaniin wolii galee akka jireennaan jiraatan isaan woliin waadaa gale; bulchoonni bani'iillee isaanii kakatan.

¹⁶ Haga isaan woliin waadaa galan guyyaa sadihiin maayessa, akka isaan woliin ollaa isaanii ta'anii isaan woliin jiraatan dhagayan.

¹⁷ Ijoolleen Israa'eliillee deemanii guyyaa sadeesso'ootitti gara qachoota isaanii dhaqan; maqaan qachoota isaaniillee Gabaa'oon, Kafiiraa, Bi'eerootii fi Qiriyaatiyi'aarim jedhaman ture;

¹⁸ bulchoonni bani'iitii fi ijoolleen Israa'elii maqaa Rabbii Waaqa Israa'eliitiin waan isaanii kakataniiraniif isaan hin tundhe; baniin maruu bulchoota isaanii irratti guguunguman;

¹⁹ bulchoonni maruu banii maraanuu «Rabbii Waaqa Israa'eliitiin waan isaanii kakanneef isaan hin tundhu.

²⁰ Kakuu isaanii kakanne saniif Rabbi akka nuun hin lolle nu homaa isaan hin goonu, lubbu'uun haa jiraatanii» isaaniin jedhan.

²¹ Bulchoonnillee lubbu'uun haa jiraatanii isaaniin jedhan. Akkuma bulchoonni isaaniin jedhan banii maraafuu worra qoraan cabsanii fi worra bisaan woraaban ta'an.

²² Iyyaasuun isaan waamee «Isin hennaa nu woliin jiraattan maaf biyya fago'oo dhufne jettanii nu sobdan?

²³ Isin amma worra abaarame isin keessaa mana gooftaa kiyyaatii garbichi qoraan cabsuu fi ka bisaan woraabu baraa haga bara baraa hin dhabamu» isaaniin jedhe.

²⁴ Isaanillee Iyyaasu'uun, «Akka nu garboonni tee akkuma Rabbi garbicha ufii Muusee ajajetti akka lafa maraa isinii kennu worra lafa san irra jiraatan maraa afoo keessanii balleessu dhugamaan dhageenneerra; kanaafuu waan lubbuu keennaatiif guddifnee isin sodaannee waan kana goone.

²⁵ Nu ammallee harkuma kee jirra; waan si afo'otti misha'aa fi qajeelaa ta'e maraa nu irratti godhi» jedhaniin.

²⁶ Kanaafuu innillee akksuma isaan irratti godhe harka ijoollee Israa'eliitii isaan hambise, ijoolleen Israa'eliillee isaan hin ajjeefne;

²⁷ guyyaa san Iyyaasuun bani'iif hulee isaan filetti ciincaa Rabbiitiif worra qoraan cabsanii fi worra bisaan woraaban isaan godhe.