Kitaaba Iyyaasu'uu 6 - Kitaaba Woyyuu

Akkaataa Iyyaarikoon Itti Kufte

¹ Ijoollee Israa'elii waan sodaataniif Iyyaarikoon sirima cufamtee turte; namni gara isi'ii seenuu fi isii keessaa bawullee hin jiru;

² Rabbi Iyyaasu'uun akkana jedhe, «Iyyaariko'oo fi mootii isi'ii, worra jajjabaa hunna qaban sii kenneeraa;

³ duultonni keessan maruu guyyaa jahaaf harka tokko tokko qachattii tana irra haa naannayanii.

⁴ Gadoonni torbaa worri xurumbaa torbaa qabatan saanduuqa waada'aa afo'otti firrisanii deemanii woliin haa baadhatanii; guyyaa torbeesso'ootitti qachattii hennaa torba naannayaa'a; worri gadootaa xurumbaa haa afuufanii.

⁵ Achiin maayessa xurumbaan uduu wol irraa hin cinne yoo afuufamu laagaa xurumba'aa yoo dhageettan, baniin maruu guddisee haa iyyuu; hennaa san dalloofni qachatti'ii hin diiggama, baniin maruu hiriiree itti gala.»

⁶ Ilmi Nawwe'ee Iyyaasuun gadoota waamee, «Saanduuqa waada'aa baadhadhaa'a; gadoonni torbaa xurumbaa torbaa qabatanii saanduuqa waadaa Rabbii afoo haa deemanii» isaaniin jedhe.

⁷ Bani'iinillee «Deema'aa qachattii naannayaa'a; worri duulaa garuu saanduuqa waadaa Rabbii afoo haa deemanii» jedhe.

⁸ Hennaa Iyyaasuun bani'itti hime gadoonni torbaa xurumbaa torbaa qabatanii Rabbiin afoo deema'aa xurumbaa afuufan; saanduundhi waadaa Rabbii isaan faanaa deema'aa ture.

⁹ Duultonni xurumbaa afuufa'aa gadoota xurumbaa afuufan afoo deema'aa turan. Baniin hafe garuu saanduuqa waada'aa duubaan deema'aa turan; gadoonnillee xurumbaa afuufa'aa deeman.

¹⁰ Iyyaasuun bani'iin «Haga guyyaa ani iyyaa'a isiniin jedhuutitti laagaa keessan ol qabattanii hin iyyinaa'a; sirima afaan keessanii jechi tokkollee akka hin baane; hennaa ani iyyaa'a isiniin jedhe hin iyyitan» jedhee isaan ajaje.

¹¹ Duulli kun hennaa tokkoof saanduuqa waadaa Rabbii qabatanii qachattii keessa naannayanii hulema duraatitti deebi'anii achuma bulan.

¹² Iyyaasuun bariisaa san ganama obboro'oon ka'e; gadoonnillee saanduuqa waada'aa ka Rabbii baadhatan.

¹³ Gadoonni torban xurumbaa torbaa qabatanii saanduuqa waada'aa ka Rabbii afoo deema'aa xurumbaa afuufa'aa turan; duultonnillee isaan afoo deema'aa turan; baniin hafe garuu saanduuqa waada'aa ka Rabbii faana deeman; gadoonnillee xurumbaa afuufa'aa deeman.

¹⁴ Guyyaa lammeesso'ootittii haga guyyaa jahaa qachattii keessa naannayanii gara gandaa deebi'an.

¹⁵ Guyyaa torbeesso'oo akkuma lafti gagaarratteen ka'anii akkuma duraanii harka torbaa qachattii irra naannayan; guyyaa san harka torbaa qachattii irra naannayan.

¹⁶ Harka torbeesso'ootitti hennaa gadoonni xurumbaa afuufan Iyyaasuun bani'iin «Rabbi qachattii isinii kenneeraa iyyaa'a!» jedhe.

¹⁷ «Wonti qachattii keessa jiru maruu Rabbiif akka hirmi'iititti haa balleeffamanii; worri hafan garuu seebartittii Ra'aabii fi worra isii woliin mana isi'ii keessa jiran calla'a; isiin waan gaaddota teenna dhossitee isaan oolchiteef isi'ii fi worri isii woliin mana keessa jiran callaan haa hafanii.

¹⁸ Isin garuu waan Israa'eliin irratti rakkinnaa fi badii fidu wonta baduu barbaachisu kanniin hawwitanii akka hin fudhanne uf eegaa'a.

¹⁹ Garuu birrii, worqii, sibiila diima'aa fi meeshaan sibiilaa maruu ka Rabbiif fooyame ta'ee mana meeshaa Rabbiititti haa galuu.»

²⁰ Kanaaf xurumbaan afuufame; baniin hennaa laagaa xurumba'aa dhagayan guddisanii iyyan; kaloonillee hin diiggame; baniin maruu gara qachaa isaan afoo jiruu dhaqanii qachattii san fudhatan;

²¹ Worra qachattii san keessa jiran maraa dhiira, intala daa'imman, jaarsota, sangaa, hoola'aa fi harree guraade'een sirima fixan.

²² Iyyaasuunillee namoota lamaan lafa gaadaniin «Gara mana dubartittii seebartittii sanii seena'aa isi'ii fi waan isiin qabdu maraa akkuma isi'ii kakattanitti achii baasaa'a» isaaniin jedhe.

²³ Ijoolleen gaaddotaa sunniinillee gara mana isi'ii seenanii Ra'aabiin abba'aa fi haadha isi'ii, obboleewwan isi'ii, fira isi'iitii fi waan isiin qabdu maraa achii baasanii ganda Israa'eliitiin ala akka jiraatan godhan.

²⁴ Qachatti'ii fi waan qachaa san keessa jiru maraa ibiddaan guban; garuu birrii, worqi'ii fi meeshaa sibiila diimaa irraa hojjatame mana Rabbii ka meesha'aa keessa kaayan.

²⁵ Ergamtoota Iyyaasuun Iyyaarikoo haa gaadani'iif erge Ra'aabiin seebartittiin waan isaan dhossiteef maatii abbaa isi'iitii fi waan isiin qabdu maraa Iyyaasuun hin oolche; fiixaan isi'iillee haga adhaa banii Israa'elii jidduu jiraatan.

²⁶ Hennaa san Iyyaasuun «Namni qachaa Iyyaariko'oo tana ijaaru'uuf ka'e Rabbiin afo'otti haa abaaramuu; namni bu'uura isi'ii buusullee ilmi isaa ka hangafaa haa baduu; ka balbala isi'ii ijaarullee ilmi isaa ka maandha'aa haa baduu» jedhee abaare.

²⁷ Rabbi waan Iyyaasuu woliin jiruuf inni biyya maraa irratti gurra baye.