Kitaaba Iyyaasu'uu 4 - Kitaaba Woyyuu

Ajaja Waan Dhagaawwan Yaadanno'oof Dhaabamanii Kenname

¹ Baniin maruu laga Yoordaanosii haga ceeyaniin maayessa Rabbi Iyyaasu'uun,

² «Gosa maraa keessaa nama tokko tokko namoota kudha lamaa filii

³ Hulee Yoordaanosiin keessa lutti gadootaa dhaabatee dhagaawwan kudha lamaa fuudha'aa hulee adha galgala bultan kaayaa'a jedhii isaan ajaji» jedheen.

⁴ Iyyaasuunillee gosa ijoollee Israa'elii keessaa nama tokko tokko nama kudha lamaa waamee,

⁵ «Iyyaasuun akkana isaaniin jedhe, saanduuqa waadaa Rabbii Waaqa keessanii afoo Yoordaanosiin keessa lufaa'a; isin keessaa namoonni maruu haguma laakkobsa gosa ijoollee Israa'eliitiin dhagaa tokko tokko gurmu'utti haa baadhatanii.

⁶ Kunillee isin jiddu'utti malkata ta'a; ijoolleen keessan baroota dhufanitti ‹Dhagaan kunniin maali'i?› jedhanii yoo isin gaafatan,

⁷ isin ‹Saanduuqa waadaa Rabbii afo'oo lanni Yoordaanosii waan citeef; dhagaawwan kunniinillee ijoollee Israa'eliitiif yaadannoo baraa haga bara baraa isinii ta'a› » jettanii isaanitti himtan.

⁸ Ijoolleen Israa'eliillee akkuma Iyyaasuun isaan ajaje godhan; Iyyaasuunillee akkuma Rabbi isatti dubbate akkuma laakkobsa gosa Israa'eliitiin Yoordaanosiin keessaa dhagaa kudha lamaa fuudhanii gara hulee bulanii fidanii achi kaayan.

⁹ Iyyaasuunillee hulee lutti gadoota saanduuqa waadaa baadhatanii dhaabatanitti Yoordaanosiin keessa dhagaawwan kudha lamaa sanniin dhaaban; dhagaawwan kunniin haga adhaa hulema san jiran.

¹⁰ Akkuma Muuseen Iyyaasuu ajaje, Rabbi Iyyaasu'uunillee bani'itti akka himu waan isa ajaje maraa haga raawwatutti gadoonni saanduuqa waada'aa baadhatan Yoordaanosiin keessa waan dhaabataniiraniif baniin daddafee ceeye.

¹¹ Baniin maruu haga ceeyanii raawwataniin maayessa uduma baniin argu saanduundhi Rabbiitii fi gadoonnillee hin ceeyan.

¹² Akkuma Muuseen isaan ajaje ijoolleen Roobeelii, ijoolleen Gaadiitii fi wodhakkaan gosa Minaase'ee wol faana ijoollee Israa'elii afoo ceeyan.

¹³ Namoonni haga kuma afurtamaa waan ta'eef woraana ufii qabatanii duulaaf Rabbiin afoo gara Iyyaariko'oo ceeyan.

¹⁴ Guyyaa san Rabbi Iyyaasuu banii Israa'elii afo'otti gaachena kenneef; akkuma Muusee sodaata'aa turanitti bara jireenna isaa maraa isa sodaatan.

^15-16 Kanaan maayessa Rabbi Iyyaasu'uun «Gadoota saanduuqa waada'aa ka raga'aa baadhatan Yoordaanosiin keessaa akka bayan isaan ajaji» jedhee isatti dubbate.

¹⁷ Iyyaasuunillee gadoonni Yoordaanosiin keessaa akka bayan isaan ajaje.

¹⁸ Gadoonni saanduuqa waada'aa ka Rabbii baadhatanii Yoordaanosiin keessaa haga bayan lutti gadootaa lafa gogaa ijjachuu jalqabnaan lanni Yoordaanosii hulee ufiititti deebi'ee akkuma duraatitti guutee yaa'uu jalqabe.

¹⁹ Baniin ji'a jalqabaa keessa guyyaa kudhaneesso'ootitti Yoordaanosiin ceeyanii Iyyaarikoo laddaan gara baya biiftu'uutitti Gelgela'atti quphatan.

²⁰ Iyyaasuun dhagaawwan kudha lamaa Yoordaanosiin keessaa fuudhan sanniin Gelgelaa keessatti dhaabee,

²¹ ijoollee Israa'eliititti akkana jedhee dubbate, «Baroota dhufanitti ijoolleen teessan abboota ufiitiin, ‹Dhagaan kunniin maali'i?› jedhanii yoo isin gaafatan,

²² akkana jettanii isaanitti himtan; Israa'el Yoordaanosiin keessa lafa gogaa irra ceeyan.

²³ Haga nu ceenuuf Rabbi Waandhi keessan galaana diimaa afoo keennaa akkuma gosse akkasuma haga isin ceetanitti Rabbi Waandhi keessan laga Yoordaanosii afoo keessanii gosse.

²⁴ Kunillee akka harki Rabbii jabaa ta'e ormi lafa irraa maruu akka beekan, isinillee Rabbii Waaqa keessan haga bara baraa akka sodaattaniif» isaaniin jedhe.