Kitaaba Iyyaasu'uu 3 - Kitaaba Woyyuu

Baniin Israa'elii Laga Yoordaanosii Ceeyan

¹ Iyyaasuunii fi ijoolleen Israa'elii maruu ganamaan Saaximii ka'anii gara laga Yoordaanosii dhaqanii achitti quphatan;

² guyyaa sadihiin maayessa bulchoonni isaanii ganda sanniin keessa seenanii;

³ bani'iin «Saanduuqa waada'aa ka Rabbii Waaqa keessanii gadoonni worra Leewwotaa hennaa isaan baadhatan yoo argitan hulee bultan kanaa ka'aatii isaan faana deemaa'a.

⁴ Fageenni worra saanduuqa waada'aa baadhataniitii fi isin jidduu jiru haga ciqilee kuma lamaa haa ta'uu; isin duraan karaa kana deemtanii waan hin beenneef karaa deemtan akka beettaniif gara worra saanduuqa waada'aa baadhatanii deeman fago'oo laalaa malee itti hin dhiyaatinaa'a» jedhanii ajajan.

⁵ Iyyaasuun bani'iin akkana jedhe, «Boru Rabbi jidduu keessanitti maalalee waan hojjatuuf uf woyyoomsaa'a»

⁶ Iyyaasuun gadootaan, «Saanduuqa waada'aa baadhadha'aatii banii afoo lufaa» jedhee isaanitti hime; isaanillee saanduuqa waada'aa baadhatanii banii afoo lufan.

⁷ Rabbillee Iyyaasu'uun, «Akkuma Muusee woliin ture si woliinillee jiraachuu kiyya akka beekan adha ani Israa'eliin afo'otti sii kabajjuu jalqaba.

⁸ Atillee gadoota saanduuqa waada'aa baadhataniin hennaa laga Yoordaanosii bira geettan, laga Yoordaanosii keessa dhaabadhaa'a jedhii isaan ajaji» jedheen.

⁹ Kanaan maayessa Iyyaasuun ijoollee Israa'eliitiin, «Asi dhiyaadha'aa jecha Rabbii Waaqa keessanii dhagayaa'a» jedhe.

¹⁰ Iyyaasuun itti aansee «Rabbiin jiraataan akka jidduu keessan jiru, akka inni worra Kana'aanotaa, Keexotaa, Eewwotaa, Feerzotaa, Geergesota, Amoorotaatii fi worra Iyyaabusootaa sirimaa akka isin afo'oo baasu kanaan beettan.

¹¹ Saanduundhi waada'aa ka Rabbii Gooftaa ardii maraa isin afoo gara Yoordaanosii lufa.

¹² Ammallee gosa Israa'elii maraa keessaa namoota kudha lamaa filadhaa'a; gosa maraa keessaa nama tokko tokko haa ta'uu.

¹³ Lutti gadoota saanduuqa waada'aa ka Rabbii Gooftaa ardi'ii fi samii uumee baadhatanii Yoordaanosiin keessa hennaa dhaabatan, bisaan Yoordaanosii ka gubba'aa bu'u yookaan ka yaa'u citee akka tullu'uutitti dhaabata; bakka tokkotti wolitti qabama.»

¹⁴ Hennaa baniin Yoordaanosiin ceeyu'uuf daasee ufii keessaa gad yaa'an worri gadootaa ka saanduuqa waada'aa baatan banii afoo deema'aa turan.

¹⁵ Akkuma ji'oota gannaa maratti lanni Yoordaanosii guuteera; akkuma worri saanduuqa waada'aa baadhatan laga bira gayanii lukaan tuqaniin,

¹⁶ bisaan yaa'uu dhiise; Tsarta'atitti qachaa Aadam jedhamtee waamamtuutitti tuulamee wolitti qabame; bisaan gara Arabaa, gara galaana sooqiddaa jigu, sirima dhaabate; baniinillee kolba Iyyaariko'ootiin gama ceeyan.

¹⁷ Hennaa baniin lafa gogaa keessa deema'aa ceeyan gadoonni saanduuqa waadaa Rabbii baadhatan haga baniin marti ceeyanitti laga Yoordaanosii keessa lafa gogaa irra dhaabata'aa turan.