Kitaaba Iyyaasu'uu 2 - Kitaaba Woyyuu

Iyyaasuun Gara Iyyaariko'oo Worra Gaadan Erge

¹ Kanaan maayessa ilmi Nawwe'ee Iyyaasuun deema'aatii lafa sanii fi Iyyaarikoo laalaa'a jedhee Saaximiin irraa gaadduu lamaa dhossa'aan erge; isaanillee deemanii mana, «Ra'aabii» seebartitti'ii seenanii bulan.

² Mootichi Iyyaariko'oo, «Israa'eliin keessaa biyyattii tana gaadu'uuf namoonni halkaniin seenaniiran» oduu jedhu dhagaye.

³ Mootichi Iyyaariko'oo, «Namoota biyyattii gaadu'uuf dhufan ka mana kee jiran baasi!» jedhee gara Ra'aabii namoota erge.

⁴ Intalti sunillee namoota kanniin lachuu dhossitee, «Namoonni gara kiyya dhufaniiran; garuu eessaa akka dhufan ani hin beeku;

⁵ hennaa galgalaayee ani balbala cufu halkanoofnaan namoonni sunniin yaa'an; eessa akka dhaqan ani hin beeku, daddafa'aatii isaan hordofaa'a hin dhaqqabdanii» jetteen.

⁶ Isiin garuu mana manaan gubba'aa irra isaan baaftee, muka dareerfame gubba'atti buraa talba'aa keessatti dhossitee turte.

⁷ Ergamtoonni mootichaa qachattii sanii bayanii deeman; balballi dallawa isaan keessaa bayanii hin cufame; ergamtoonni mootichaa worra gaadan sanniin soqu'uuf haga karaa laga Yoordaanosiin gamaa ceeyanii deeman.

⁸ Namoonni gaadan sunniin uduu hin rafne, intalattiin sun gara isaanii ol baatee,

⁹ akkana isaaniin jette; «Akka Rabbi lafa tana isinii kenne akka isin sodaanne worri lafa tana irra jiraatan maruu guddisanii akka isin sodaatanii onneen isaanii baqe beekeera.

¹⁰ Hennaa biyya Misirii keessaa baatan Rabbi galaana diimaa akka isin afo'oo gosse, akka mootota lamaan worra Amoorotaa Seewoonii fi Aagiin irratti Yoordaanosiin gamatti waan gootan, akka isin isaan ajjeeftan dhageenneerra.

¹¹ Kanaafuu haga waan kana dhageenne soda'aan onneen nu baxxe; Rabbi Waandhi keessan Waaqa ardi'ii fi samii irrallee jiru waan ta'eef sababaa keessaniif namni tokkollee ka hin naayin hin jiru.

¹² Ammallee akkuma ani waan mishaa isinii godhe, maatii kiyya waan badaa irraa hambisu'uuf yabo'oo naa kakadhaa'a; waan kanaaf ta'u malkata amansiisaa naa kennaa'a.

¹³ Abba'aa fi haadha tiyya, obboleewwan tiyya ta dhiiraatii fi ta intalaa waan isaan qaban maraa oolchu'uuf waadaa naa galaa'a; nu hin balleessinaa'a!» jetteen.

¹⁴ Namoonni sunniinillee isi'iin, «Yoo nu waadaa sii gallee kana hin raawwanne, Rabbi du'aan nu haa adabu; hennaa Rabbi lafa tana dabarsee nuu kenne waan mishaa sii godhu'uuf waadaa sii galla» jedhaniin.

¹⁵ Manni isi'ii dallawa qacha'aatiitti maxxanee waan jiruuf isiinillee dallawa irraan foddaa manaatiin haadaan gad isaan buufte.

¹⁶ Isiin «Worri isin hordofu akka isin hin argine, haga worri isin hordofu dacha'anitti haga guyyaa sadihii gara gaaraa dhaqa'aa dhokadha'aa taa'aa'a; deebitanii karaa keessan deemtanii» isaaniin jette.

¹⁷ Namoonni sunniinillee akkana isi'iin jedhan, «Waan ati waadaa nu galchite maraa hin eenna;

¹⁸ wonti ati gootu nu hennaa lafa tana qabannu haada diimaa foddaa manaatiin ittiin nu buufte kana kolbuma hulee itti nu buuftee sanitti hidhi; abbaa kee, haadha tee, obboleewwan keetii fi maatii abbaa keetii maraa mana keetitti wolitti qabi.

¹⁹ Namni tokkollee manaa bayee yoo du'e badiin kama isaa ta'a, nu balleessaa isaatiif hin gaafatamnu; garuu uduu mana kee jirru wonti badaan yoo isa irra gaye badii saniif nutu itti gaafatama.

²⁰ Waan nu amma goonu kanniin yoo nama biraatitti himte kakuun nu sii kakanne sun nu irra hin gawu» jedhaniin.

²¹ Isiinillee akkuma isin jettan haa ta'u jettee isaan geegessite; isaanillee hin deeman isiin haga isaan deemaniin maayessa haada diimaa namoota sanniin buufteenillee kolba fodda'aatiin gad rarraafte.

²² Isaanillee deemanii gaara bira gayanii haga worri isaan hordofu sunniin deebi'anitti guyyaa sadihiif achuma taa'an; worri isaan hordofullee karaa maraa keessa isaan soqanii dhaban.

²³ Kanaan maayessa namoonni lamaan sunniinillee deebi'anii gaara irraa gad bu'anii laga ceeyanii gara ilma Nawwe'ee gara Iyyaasu'uu deebi'anii waan isaan irra gaye maraa isatti himan.

²⁴ Isaan Iyyaasu'uun akkana jedhan, «Lafa san maraa Rabbi dhugamaan harka keennatti galcheera; namoonni biyya san keessa jiraatan maruu guddisanii nu sodaatanii onneen isaanii baxxeerti» jedhaniin.