Kitaaba Iyyaasu'uu 18 - Kitaaba Woyyuu

Akkaataa Lafa Hafe Itti Qoodan

¹ Baniin ijoollee Israa'elii maruu Seelo'otti wol gayanii achitti daasee wol gayi'ii dhaaban; baniin biyya saniillee cadhisee isaan jalatti bule.

² Ijoollee Israa'elii keessaa worri lafa hin qoodamne gosa torbatu hafe.

³ Iyyaasuunillee ijoollee Israa'eliitiin akkana jedhe, «Lafa Rabbi akka dhaaltaniif isinii kenne itti galu'uuf haga yoomii lash jettan?

⁴ Gosa maraa keessaa namoota sadihi sadihi filadhaa'a; anillee isaan erga, isaanillee ka'anii biyyattii irra naannayanii haga qooda lafa isaanii galmeessanii gara kiyya haa deebi'anii.

⁵ Bakka torbatti haa qoqqoodanii; Daangaan isaanii gara bita'aatiin Yihuudaa'a, daangaa gara mirgaatiin worra Yooseefiititu jiraata.

⁶ Isinillee barreeffama lafa bakka torbatti qoodan san gara kiyya fidaa'a; anillee Rabbii Waaqa keenna afo'otti hixaa isinii buusaa.

⁷ Garuu worri Leewwotaa gadoota Rabbii waan ta'aniif isin biratti lafa hin qaban; Gaadi, Roobeel, gofti Minaase'ee wodhakkaan laga Yoordaanosiitiin gama gara baya biiftu'uutitti lafa isaanii ka garbichi Rabbii Muuseen isaanii kenne fudhataniiran» jedhe.

⁸ Achiin maayessa namoonnillee achii ka'anii deeman Iyyaasuun namoota lafa galmeessu'uuf deeman sanniiniin, «Deema'aa lafa naannaya'aatii galmeessa'aatii gara kiyya fidaa'a; anillee Seelo'otti Rabbiin afo'otti hixaa isinii buusaa» jedhee isaan ajaje.

⁹ Namoonnillee deemanii lafa naannayanii akkuma qachaa isaaniitiin bakka torbatti qoodanii galmeeffatanii gara Seelo'oo hulee Iyyaasuun itti quphateetitti deebi'an.

¹⁰ Iyyaasuunillee Seelo'otti Rabbiin afo'otti hixaa isaanii buusee achitti Iyyaasuun ijoollee Israa'eliitii akkuma gosa isaaniitiin lafa isaanii qoode.

Lafa Biiniyaamiif Kennan

¹¹ Hixaan gosa ijoollee Biiniyaamii akkuma gosa isaaniitiin isaanii baye; hixaan isaanii worra Yooseefiitii fi worra Yihuuda'aa jidduu ta'e.

¹² Daangaan lafa isaanii gara mirgaatiin laga Yoordaanosii bira gaya; daangaan lafa isaanii gara Iyyaariko'ootiin haga worra gara mirgaatiin jiranii gaya; achiillee ka'ee haga biyya gaaraa haga dhiyaa gaya; karri bayaniinillee gara lafa gammoojjii Beti'awweeniiti.

¹³ Gara bita'aatiin daangaan isaanii gara Loozaa Beeteel jedhamtuu gaya; gara bita'aatiin daangaan isaanii Beetihooroonii gadiin, gara Axaaro'adaariititti gad bu'a.

¹⁴ Daangaan isaanii gara dhiyaatiin Beetihooroon afo'oon gara gaara bitaa irra jiruutiin naannaya; karaan isaan bayaniin gara qachaa Yihuuda'aa ta gara hulee Qiritiyi'aariim jedhamtuutiin; daangaan kun gara dhiyaatiin,

¹⁵ gara bita'aatiin daangaan Qiriyaatiyi'aariim daangaa dhumaati; gara dhiyaatiin haga burqaa bisaanii ka Naaftoo jedhamuu gaya.

¹⁶ Daangaan isaanii gaara dhooqa ilma Heenoomii afoo jiruu gaya; kunillee dhooqa Raffaayimii ka gara mirgaatiin jiruuti; gara bita'aatiin gara dhooqa daangaa Heenoom Iyyaabuusii biraan gara Ayinaroogeelii biraan gad bu'a.

¹⁷ Gara Mirgaatiin lufee burqaa Beetisaamisiititti irra bayee, goodda Adumiimii afoo jiruun gara Geelilooti, gara dhagaa Boohanii ilma Roobeelii gad bu'a.

¹⁸ Gara mirgaatiin haga lafa Arabaa gaya.

¹⁹ Daangaan achii ka'e Beetihoogla'aa gara worra gara mirgaa jiruu lufa; karri bayaniinillee dhuma laga Yoordaanosii ka galaana sooqiddaa ka Lissaan jedhamu biraan; kun daangaa gara bita'aati.

²⁰ Gara baya biiftu'uutiin daangaan lafa sanii Yoordaanosi; kun daangaa lafa ijoollee Biiniyaamii akkuma gosa isaaniitiin ture.

²¹ Qachoonni ijoollee Biiniyaamii Iyyaarikoo, Beetihooglaa, Amaqaasisi,

²² Beeti Arabaa'a, Zamaaraayiim,

^23-24 Beeteel, Awiim, Faaraa, Eefraataa, Kifri'amonaayi, Oofnii, Gaabaa, qachoota kudha lamaa kanniinii fi gandoonnillee achi keessa jiran.

²⁵ Lafti ijoollee Biiniyaamii akkaataa gosa isaaniitiin Gabaa'oon, Raamaa, Bi'eerooti,

²⁶ Mitsiphaa, Kaafiraa, Amooqi,

^27-28 Reeqeem, Yiriphi'eel, Taraalaa, Teelaa, Eleef, Qiriyaatigibi'aati, qachaa Iyyaabusii ta Yerusaalem jedhamtu qachoota kudha sadihii fi gandoota kanniin ture.