Kitaaba Iyyaasu'uu 16 - Kitaaba Woyyuu

Lafa Gosa Efreemiitii Fi Gosa Minaase'eetii Kennan

¹ Lafti ijoollee Yooseefiitiif kenname Yoordaanosii baya biiftu'uutii jalqabee gara kolba gaara lafa gammooji'iitiin Iyyaarikoo irraa Beeteeliin gaya.

² Beeteeliin irraallee haga Looza'aa dhaqa. Gara kolba daangaa worra Arkaanotaatiin haga biyya Axaarootii gaya.

³ Gara dhiyaatiin haga daangaa worra Fileexootaa ka daangaa Beetihaarooniitii haga Geezirii gad bu'a. Huleen bayaniinillee cinaa galaana gudda'aatiin.

⁴ Ijoolleen Yooseefii Minaaseenii fi Efreemillee lafa ufii dhaalan.

⁵ Daangaan ijoollee Efreemii akka worra isaaniitiin kolba baya biiftu'uutiin lafti isaanii Axaarooti'adaariitii haga Beetihoonii gaya.

⁶ Daangaan isaanii achillee lufee galaana guddaa bira gayee gara dhiyaa Mikimta'aatii haga lafa mirgaa gaya; daangaan isaanii gara baya biiftu'uutiin naannayee Ta'aanaat Seeloo gaya; gara baya biiftu'uutiin Iyyaanookiin bira lufa.

⁷ Iyyaanookii haga Axaarootinaa, Na'aaraatiin gayee Iyyaarikoo bira gara Yoordaanosii ol baye.

⁸ Daangaanillee Taaphuwwa'aa gara dhiyaatii haga laga Qaana'aa lufa; huleen bayaniin galaana guddaa biraan ture. Lafti ijoollee Efreemii akka gosa isaaniitiin kana ture.

⁹ Kun worra lafa ijoollee Minaase'ee keessa jiranii fi gandootaa fi qachoota ijoollee Efreemiitii kennan wolitti qabata.

¹⁰ Isaan worra Kana'aanii Geeririin keessa jiraatan hin ariine; haga adhaallee worri Kana'aanii ijoollee Efreemii woliin jiraatan; haga adhaatitti hujii hunnaa isaan hojjachiisan.