Kitaaba Iyyaasu'uu 11 - Kitaaba Woyyuu

Iyyaasuun Yoobaabii Fi Worra Yoobaabiin Woliin Lolan Mooyate

¹ Mootiin Aasoorii Iyyaabiis haga waan kana dhagaye, gara mootii Maadoonii, gara mootii Yoobaabii, gara mootii shimroonii, gara mootii Asifiimii,

² gara mirgaatiin gara biyya gaaraa, gara Keenereetii, gara bita'aatiin Araba, gammoojjii gara cinaa dhiyaatiin, gara worra tulluu Doorii jiranii,

³ Gara baya biiftu'uutii fi gara dhiyaatiin jiruu gara Kana'aanotaa, Amoorotaa, Keexotaa, Feerzotaa, Iyyaabusootaatii fi gara gadiitiin Eewwota gara Mitsipha'aatitti erge.

⁴ Kunniin maruu loltoota ufii baay'ee guddaa, worra fardaatii fi worra konkolaataa fardaa woliin bayan; laakkobsi banii bayeellee akka xidhacha daangaa galaanaa baay'ata ture.

⁵ Mootonni kunniin maruu wol gayanii Israa'eliin lolu'uuf dhufanii burqaa Maaroon laddatti quphatan.

⁶ Rabbi Iyyaasu'uun, «Boru hennaa akkanaa namoota maraa akka waan du'aniititti dabarsee ijoollee Israa'eliititti waan kennuuf isaan hin sodaatin; moorgaya luka faradoo isaanii hin kutta, konkolaataa isaanii ka fardaallee ibiddaan gubda» jedheen.

⁷ Achiin maayessa Iyyaasuun loltoota isaa maraa woliin gara ladda bisaan Maarooniititti isaanitti dhufee balaa isaanitti buuse.

⁸ Rabbillee harka Israa'eliititti dabarsee isaan kenne; isaanillee isaan dhayanii Siidoonaa gudditti'ii haga Maaseroonii baya biiftu'uutiin jirtu haga gara dhooqa Mitsipha'aa isaan ari'anii eennuunillee uduu hin hambisin isaan fixan.

⁹ Iyyaasuunillee akkuma Rabbi isa ajaje godhe, Moorgaya luka faradoo isaanii hin kukkute, konkolaataa isaanii ka fardaa ibiddaan gube.

¹⁰ Achiin maayessa Iyyaasuun deebi'ee qachaa Aasoorii qabatee mootii isi'ii guraade'een ajjeese; Aasoor asiin dura qachaa guddittii mootota tanaa turte.

¹¹ Worra isii keessa jiru maraa tokkollee uduu hin hafin guraade'een fixanii sirima isaan balleessan, waan lubbuu qabu maraa hin hambifne, Aasooriin ibiddaan gube.

¹² Akkuma garbichi Rabbii Muuseen Iyyaasuu ajaje qachoota mootota kanniinii mara, mootota isaanii maraa qabatee guraade'een isaan dhayee sirima isaan balleesse.

¹³ Israa'el qachoota goodda irra jiran maraa hin gubne; garuu Israa'el Aasooriin callaa gube.

¹⁴ Ijoolleen Israa'elii horii qachoota kanniin keessa jiru maraa hin booji'an; namoota maraa dhayanii guraade'een fixan; waan lubbuu qabu maraa womaa hin hambifne.

¹⁵ Akkuma Rabbi garbicha ufii Muusee ajaje, Muuseenillee Iyyaasuu ajajetti Iyyaasuunillee akkasuma godhe; waan Rabbi Muusee ajaje maraa keessaa tokkollee hin hambifne.

Biyyoota Iyyaasuun Qabate

¹⁶ Iyyaasuun lafa san maraa, gaara, biyya Gosoomii, gammoojjii Arabaatii fi gaara Israa'elii ka lafa gammoojji'ii maraa qabatee,

¹⁷ haga gaara Seeyirii irraa ka'uu gaara Ermooniitii gadii jalqabee haga dhooqa Libaanosiin keessa jiruu mootota haga Algaadii jiran maraa dhayee isaan fixe.

¹⁸ Iyyaasuun bara baay'e'eef mootota kanniin maraa woliin wol lola'aa ture.

¹⁹ Eewwotaa Gabaa'ooniin keessa jiraataniin alatti qachattiin ijoollee Israa'elii woliin wolii galte tokkollee hin jirtu; Maraa lolaan qabatan.

²⁰ Akkuma Rabbi Muusee ajaje akka isaan balleessanii fi gaachenallee akka isaan hin arganne sirima akka isaan balleessan, akka lapheen isaanii jabaatee Israa'eliin wol lolan Rabbi godhe.

²¹ Hennaa san Iyyaasuun dhaqee biyya gaaraa Keebroon, Daabeer, Aanaab, gaara Israa'elii, gaara Yihuuda'aatii achi ijoollee Eenaaqii ajjeesee qachoota isaanii woliin sirima balleesse.

²² Gaazaa, Geetii fi Azaaxoonitti namoonni hagoon hafan malee biyya Israa'elii keessatti ijoollee Eenaaqii keessaa homaa hin hafne.

²³ Akkuma Rabbi Muuse'etti hime Iyyaasuun biyya maraa fudhatee worra Israa'eliitii fi akkuma gosa isaaniititti biyya maraa isaanii kenne, achiin maayessa lolli biyya maraa irraa dhaabate.