Kitaaba Saamu'eelii ka 2ffaa 8 - Kitaaba Woyyuu

Injifannoo Daawiti Lolaan Argate

¹ Achiin maayessa Daawiti worra Filisxeemii injifatee uf jala galche; qachaa «Meeteeg aamaa» jedhamtu isaan jalaa fudhate.

² Ammallee mootichi Daawiti worra Moo'aabii injifate; worra hidhaman akka lafa irra ciciisan godhee namoota sadihii keessaa namoonni lamaa akka du'an taasise.

³ Kanaafuu worri Moo'aabii garboota isaa ta'anii gabbara'aa turan; Achiin maayessa Daawiti biyya laga Eefraaxisi ladda jiru qabachu'uuf hennaa deeme ilma Ra'aabii mootii Suuba'aa Adir'aazaariin dhayee ajjeese.

⁴ Daawiti isa irraa worra farado'oo kuma tokkoo fi dhibba torbaatii fi worra miilaan deeman namoota kuma diddamaa booji'ee moorgaya faradoo isaanii kukkutee konkolaataa fardaa dhibbaa callaa hambise.

⁵ Worra Sooriya'aa ka Damaasqoo keessa jiraatan Adir'aazariin gargaaru'uuf loltoota erginaan Daawiti lolee loltoota kuma lamaa ajjeese.

⁶ Achiin maayessa Daawiti Damaasqoo keessatti hulee lolaa qopheesse worri Sooriya'aallee isaa garboota ta'anii gabbaraniin; Rabbi Daawitiin hulee inni dhaqe marattuu akka injifatu taasise.

⁷ Daawiti ajajoonni Adir'aazarii hidhatan wontee worqii irraa hojjatame booji'ee gara Yerusaalemii fide.

⁸ Mootichi Daawiti qachoota Adir'aazarii Beexahina'aa fi Biruutaayiin keessaa sibiila diimaa baay'ee fudhate.

⁹ Mootiin Hamaatii Too'u akka Daawiti loltoota Adir'aazarii maraa injifate dhagaye.

¹⁰ Too'u waan Adi'aazariin wol lola'aa tureef sababaa kanaaf mootichi Adir'aazar waan injifatameef isaa gammadee ilma ufii Uraamiin gara Daawitii erge; innillee meeshaa worqi'ii, birri'ii fi Sibiila diimaa qabatee dhaqe.

^11-12 Mootichi Daawiti orma injifate keessaa Eedoom, Moo'aab, Amoon, Filisxeemiif birri'ii fi worqii worra Amaaleqii irraa fudhate akkasuma boojuu Adir'aazar booji'e woliin kanniin Rabbiif adda baase.

¹³ Daawiti hulee dhooqa sooqiddaa jedhamtee waamamtutti worra Eedoomii kuma kudha saddeetii ajjeesee hennaa deebi'e nama gurraa ta'e.

¹⁴ Biyya Eedoomii maratti hulee loltoonni itti quphatan baay'ee ijaare; namoonni achi jiraatan isa jalatti bulan; Rabbi Daawitii hulee inni deeme maratti mootee kenneef.

Bulchoota Mootummaa Daawitii Keessaa

¹⁵ Daawiti Israa'elii mara irratti mooye banii maraaf hennaa maraa murtii dhuga'aa akka argatu xaara'aa ture.

¹⁶ Ilmi Xuru'aa Iyyoo'aab ajajaa loltootaa yoo ta'u ilmi Ahiluudii Iyyoosaafixi barreessaa seena'aa ture.

¹⁷ Ilmi Akixoobii Saadooqii fi ilmi Abileeqii Abiyaataar gadoota turan; Sarayaanillee barreessaa ture.

¹⁸ Ilmi Yoodaahe'ee Banayaas worra Kaltaawotaatii fi worra Filiitotaa irratti ajajaa naannoo mana mootumma'aa ture; ijoolleen Daawitiillee worra gorsa isaa kennan turan.