Kitaaba Saamu'eelii ka 2ffaa 6 - Kitaaba Woyyuu

Saanduuqa Waadaa Rabbii Mana Aminaadaabiitii Gara Yerusaalemii Fidan

¹ Daawiti ammallee Israa'eliin keessaa worra filataman namoota haga kuma soddomaa wolitti qabe.

² Daawitii fi baniin isa woliin turan maruu Ba'aalii Yihuudaa keessa jirtuu ka'anii maqaa Rabbii Gooftaa banii maraa ka Kiruubeelii irra taa'een waamamu gabatee saanduuqa Rabbii achii fidu'uuf deeman.

³ Saanduuqa waadaa Rabbii konkolaataa fardaa haarawa irratti fe'anii mana Aminaadaabii ka gaara irra turee fidan; ijoolleen Aminaadaabii Ooza'aa fi Ahaayu konkolaataa fardaa haarawa oofa'aa turan.

⁴ Saanduuqa waadaa Rabbii mana Aminaadaabii ka tulluu irra jiru irraa hennaa fidan Ahiyoon saanduuqa waadaa Rabbii afoo deema'aa ture.

⁵ Daawitii fi manni Israa'elii maruu faaruu masiinqoo'o, dibbee'e, laagaa kiraaraa, meeshaa faaru'uu ka adda addaatii fi sibiila shaka shaka jedhuun afoo Rabbiititti hunna guutu'uun taphata'aa turan.

⁶ Hennaa oobdii Naakoonii gayan sangoonni buburraaqa'aa turan; Oozaan harkaan hiixatee saanduuqa waadaa Rabbii qabe.

⁷ Lolli Rabbii Oozaa irratti jabaate; Rabbillee waan ugga isaatiif achumatti isa qoome; achumatti saanduuqa waadaa Rabbii biratti du'e.

⁸ Rabbillee Oozaa waan ajjeeseef Daawiti gaddee haga adhaa maqaan hulee sanii «Feereetsi Oozaa» jedhamee itti baye.

⁹ Guyyaa san Daawiti Rabbiin sodaatee, «Saanduundhi waadaa Rabbii attamitti gara kiyya dhufa?» jedhe.

¹⁰ Daawitillee saanduuqa waadaa Rabbii gara qachaa ufii fiduu hin jaalanne; Daawitillee mana Abidaaraa nama Geetiititti galche.

¹¹ Saanduundhi waadaa Rabbii mana Abidaaraa nama Geetii haga ji'a sadihii taa'e; Rabbillee Abidaara'aa fi mana isaa maraa hin eebbise.

¹² Mootichi Daawiti Rabbi mana Abidaara'aatii fi waan inni qabu maraa sababaa saanduuqa waadaa Rabbiitiif akka eebbise dhagaye; Daawitillee dhaqee saanduuqa waadaa Rabbii mana Abidaara'aatii gara qachaa Daawitii gammachu'uun akka fidan godhe.

¹³ Worri saanduuqa Rabbii baatan akkuma tarkaanfii jahaa deemaniin korma tokkoo fi mirgoo tokko fidee ciincesse.

¹⁴ Daawitillee hunna ufii maraan Rabbiin afo'otti shubbisa'aa ture; Daawitillee uffata ulfinnaa uffatee ture.

¹⁵ Daawitii fi manni Israa'elii maruu hoo jedha'aa xurumbaa afuufa'aa saanduuqa waadaa Rabbii fidan.

¹⁶ Saanduundhi waadaa Rabbii gara qachaa Daawitii hennaa gale intalti Saa'olii Meelkool foddaa irraan argite; mootichi Daawiti Rabbiin afo'otti utaala'aa hennaa shubbisu argitee qalbii ufii keessatti isa tuffate.

¹⁷ Saanduuqa waadaa Rabbii fidanii, daasee Daawiti qopheesseef hulee dallawame kaayan; Daawitillee ciincaa ciincawuu fi ciincaa fayyumma'aa Rabbiin afo'otti dhiyeesse.

¹⁸ Daawitillee ciincaa ciincawuu fi ciincaa fayyumma'aa dhiyeessee haga raawwateen maayessa maqaa Rabbii Gooftaa banii maraatiin namoota eebbise.

¹⁹ Banii maraafuu gosa Israa'eliitii, dhiiraa, dubarti'iif tokko tokko isaaniitiif buddeena tokko tokko, muraa foonii tokko tokkoo fi daraaraa woyini'ii ka baxxeeffame qoodan; baniin maruu mana mana ufiititti galan.

²⁰ Achiin maayessa Daawitillee maatii ufii eebbisu'uuf deebi'e; intalti Saa'olii Meelkool Daawitiin simatu'uuf gad baatee, «Akka womaa womteen qullaa uf mudhisan mootiin Israa'elii afoo babbreeddan garboota ufiititti uffata mulqatee qullaa ta'uun ka hagam kabajjame!» jetteen.

²¹ Daawitillee Meelkooliin, «Rabbiin afo'otti shubbiseera; banii Israa'elii akka bulchu abbaa keetii fi mana isaa caalaa Rabbiin na filate ka eebbifame haa ta'u; kanaafuu Rabbiin afo'otti uf salphisa.

²² Ammallee haga amma ta'e kana caalaa ka tuffatame ta'a; ija kee afo'otti hin salphadha; garuu babbreeddan ati waan isaanii dubbatte biratti ulfinna argadha!» isi'iin jedhe.

²³ Sababaa kanaaf Meelkool intalti Saa'olii uduu finna hin deenne duute.