Kitaaba Saamu'eelii ka 2ffaa 22 - Kitaaba Woyyuu

Faaruu Moote'ee Ka Daawiti Faarfate

¹ Daawiti guyyaa Saa'olii fi diintota isaa jalaa Rabbi isa hambise faaruu kana Rabbii faarfate.

² akkana jedhe, Rabbi hunna kiyyaa fi dawoo kiyya.

³ Rabbi Tissee kiyya waan ta'eef isa abdadha; Rabbi wontee kiyyaa fi gargaaraa kiyya; irkoo kiyyaa fi hulee ani itti dhokadhu; fayyisaa kiyya; ati hammeenna jalaa na oolchita.

⁴ Rabbii galanni barbaachisuuf waamadha; Inni diintota kiyya jalaa na oolcha.

⁵ Ciniinsuun du'aa na qabe, lolaan dharaallee na sodaachise;

⁶ Ibiddi asaabaa na marsee; Siiboo du'aallee natti ijaaran;

⁷ Hennaa rakkadhe Rabbiin waamadhe; Akka na gargaaruuf Waaqa kiyyallee kadhadhe; Innillee mana woyyuu ufii keessa taa'ee laagaa kiyya dhagaye; iyya kiyyallee naa dhagaye;

⁸ Lafti sochootee raafamte, utubaan Sami'iillee hin socho'e, Rabbi waan loleef sodaatanii hollatan.

⁹ Lola inni loleen aarri lolaa isa keessaa baye, afaan isaa keessaa barbadaa ibiddaa ka nama gubutu baya; woramaxatu isa irraa ife.

¹⁰ Samiiwwan baqassee gad bu'e, Luka isaa jala dukkanatu jira.

¹¹ Maleekkaa Kiruubeel jedhamuun bararee qilleensa keessa ol lixe.

¹² Huleen inni itti dhokate dukkana, duumessi jimiin isa marse, duumessa keessa jiru bisaan godhe.

¹³ Sababaa ifa isa afoo jiruutiin gubatan.

¹⁴ Rabbi samiiwwan irraa gigisse, Rabbiin jiraataan jecha ufii kenne.

¹⁵ Rabbi eboo ufiitiin darbatee isaan bittinneesse; bakakkaa ergee, isaan raase,

¹⁶ Lola Rabbiitiin Hafuura ibiddaa ka afaan isaatii bawuun galaanni yaa'u mudhate, bu'uurran adunya'aallee hin mudhatan.

¹⁷ Rabbi hiixatee harka na qabe, Qilee galaanaa keessaallee butee na baase.

¹⁸ Diintota kiyya ka jabaatan jalaa na baase, worra na jibban jalaa na hambise, waan natti jabaatanii turaniif.

¹⁹ Hennaa ani rakkadhe natti ka'an; Rabbi garuu irkoo naa ta'e.

²⁰ Waan na jaalateef na fayyise, Gara raasaa badha'aa na baase.

²¹ Rabbi akka qajeellummaa kiyya laalee naa kaffala, akka qulqullummaa harka kiyyaatitti naa deebisa.

²² Ani seera Rabbii eegeera, Waaqa kiyya hin dhibne.

²³ Ani seera Rabbii maraa hin raawwadha; Seera Rabbii kabajjuu hin dhiifne.

²⁴ Ani isa afo'otti qajeelaa ture; cubbuu irraa uf eege.

²⁵ Rabbi akka qajeellummaa kiyyaa, akka qulqullummaa harka kiyyaatitti gatii naa deebise

²⁶ Yaa Rabbii kiyya! Nama arja'aaf hin arjoomta, Nama qajeela'aaf ati qajeela'a.

²⁷ Nama qulqullu'uuf ati qulqullu'u. Nama hama'aaf ammo gatii hammeenna isaa kennitaaf.

²⁸ Ati banii miidhame hin fayyifta, Worra uf tuulan garuu hin salphifta.

²⁹ Rabbii kiyya! Ati ifa kiyya, Rabbi dukkana kiyya hin ibsa.

³⁰ Hunna keetiin diintota kiyya injifadha, Ati Waandhi kiyya akka dallawa utaalu na taasifta.

³¹ Karaan Rabbii qulqullu'u, Dubbiin isaa adda, Worra isa amanatan maraaf inni wonte'e.

³² Rabbiin malee Waandhi eennu? Waaqa keenna malee ka dawoo namaa ta'u eennu?

³³ Ka hunna naa kennu, ka karaa naa qajeelchu Rabbi.

³⁴ Luka kiyya akka luka kuruphe'eetitti jabeessa Rabbitu gaara irra na dhaaba.

³⁵ Harka kiyya lolaaf leenjisa; harka kiyya akka buundhee lolaa harkisuu danda'utti jabeessa.

³⁶ Ati wontee fayyinnaa kee naa kennite, Hunni kee na jabeessa.

³⁷ Deemsa kiyya hin midhaassite, Lutti kiyyallee hin mucucaanne.

³⁸ Diintota kiyya ari'ee balleessa, Uduu isaan hin balleessine uf irra hin deebi'u.

³⁹ Akka lafaa hin kaanetti isaan dhaya; isaanillee na jalatti kufan.

⁴⁰ lolaaf hunna naa kennita, worra na caalan na jalatti gad deebifta.

⁴¹ Akka diintonni kiyya dheessanii duubatti dacha'an goote; worra na jibban maraa hin balleessite.

⁴² Isaan hin iyyan, ka isaan gargaaru hin argamne, Rabbitti iyyatanii, Rabbillee isaan hin dhageenne.

⁴³ Akka daara'aatitti isaan bulleesse Akka duduba karaa keessaatitti isaan dhiite

⁴⁴ Mormii bani'ii jalaa na hambifte worra Yihuudota hin taane irratti na muudde baniin ani hin beenne na jalatti bula

⁴⁵ Waaqoleen tolfamaan naa sagadan, Gurra kiyya dhagayanii na jalatti bulan

⁴⁶ Worri waaqa tolfamaa waaqeffatan hin badan; hulee itti dhokatanii dafanii hollata'aa dhufan.

⁴⁷ Rabbi jiraata'a, tissee kiyya eebbifama'a. Waandhi tisseen kiyya ka na fayyise haa kabajjamu

⁴⁸ Waandhi haluu naa baasu worra Yihuudota hin taane ka na jalatti bulchu

⁴⁹ Diintota kiyya jalaa ka na oolchu isa worra naa ol ta'an irra na aansita, nama hamaa jalaallee na oolchita.

⁵⁰ Gooftaa kiyya! Kanaafuu banii jiddu'utti si galatoonfadha, maqaa keetiifillee hin faarfadha.

⁵¹ Mootii ufii moosisee mootee kennaaf; ka ufii muude jaalala bara baraa itti mudhisa; Daawitii fi fiixaa isaatiif baraa haga bara baraa kana godha.