Kitaaba Saamu'eelii ka 2ffaa 2 - Kitaaba Woyyuu

Daawiti Mootii Biyya Yihuuda'aa Ta'e

¹ Achiin maayessa Daawiti qachoota Yihuuda'aa keessaa gara takkaa bayuu? jedhee Rabbiin gaafate. Rabbillee, «Ee bayi» jedheen. Daawitillee, «Gara qachaa tamii baya?» jedhee gaafate. Rabbillee, «Gara Keebroonii bayi» jedheen.

² Kanaaf Daawiti haawwota manaa ufii lamaan ta qachaa Iyiziraa'elii Akinaahomii fi Abigiyaa ta Naabaal namichi biyya Qarmeloosii irraa du'e woliin achi dhaqan.

³ Daawitillee namoota isa woliin jiranii fi maatii isaanii maraa fidee qachaa Keebroonii taa'an.

⁴ Kanaan maayessa namoonni Yihuuda'aa dhufanii akka mana Yihuuda'aa irratti moowu achitti Daawitiin dibanii moosisan; Saa'oliin namoota qachattii Iyyaabisii Gala'aadiititu awwaale jedhanii Daawititti himan.

⁵ Daawitillee gara namoota Iyyaabisii Gala'aadii dhaamsa ergee akkana isaaniin jedhe, «Isin gooftaa keessan Saa'oliin awwaalu'uun mishummaa waan agarsiiftaniif Rabbi isin haa eebbisu.

⁶ Rabbi arjumma'aa fi amanamummaa isinitti haa mudhisu; kana waan gootaniif anillee jasaa kana isinii deebisa;

⁷ gooftaan keessan Saa'ol du'eera; amma cimaa'a! jabaadhaa'a! manni Yihuuda'aa isaan irratti akka mootii ta'u dibanii na moosisaniiran.»

Iyyaabusteen Israa'eliin Irratti Mooye

⁸ Ajajaan loltoota Saa'olii ilmi Neerii Abaaneer ilma Saa'olii Iyyaabustee fuudhee gara Mahannaayiimii ceesise;

⁹ achitti biyya Gala'aadii, biyya Ashuraanotaa, biyya Iyiziraa'elii, biyya Efreemii, biyya Biiniyaamiitii fi biyya Israa'elii maraa irratti moosise.

¹⁰ Ilmi Saa'olii Iyyaabusteen Israa'eliin irratti hennaa mooyuu jalqabe nama woggaa afurtamaa ture; woggaa lamaa mooye; garuu manni Yihuuda'aa Daawitiin duukaa bu'e.

¹¹ Daawitillee hennaa Keebrooniin taa'e, Yihuudaa maraa irratti woggaa torbaa fi wodhakkaa mooye.

Lola Israa'elii Fi Yihuudaa Jiddu'utti Ta'e

¹² Ilmi Neerii Abaaneerii fi garboonni Iyyaabustee ilma Saa'olii Mahannaayiimii gara qachaa Gaba'oonii baye.

¹³ Iyyoo'aabiin Tiruriyaan deettuu fi garboonni Daawitii bayanii hulee bisaan Gaba'oonii dhaabatu biratti wol gayanii gara hulee bisaan itti dhaabatuu gara tokkoon kuuwwan gara biraatiin taa'an.

¹⁴ Abaaneerillee Iyyoo'aabiin, «Ka'imtoonni keenna afoo kennatti wol lolu'uun wol haa dorgomanii!» jedhe; Iyyoo'aabillee, «Haa ka'anii» jedhe.

¹⁵ Gosa Biiniyaamiitii fi ilma Saa'olii Iyyaabuste'ee kudha lama; garboota Daawitii keessaallee kudha lama laakkayanii lolaaf bayan.

¹⁶ Isaan maruu mataa diina ufii qabanii guraadee kale'etti shafaxan wol qabatanii kufan; maqaan hulee sanii «Qonna guraadee qarama'aa» jedhamee waamame; huleen sun Gabaa'oon jedhamti.

¹⁷ Guyyaa san lola jaba'atu ture; garboota Daawitii afo'otti Abaaneerii fi namoonni Israa'elii hin mooyataman.

¹⁸ Ilmaan Turiyaan deettu Iyyoo'aab, Abisa'aa fi Asaaheelillee achi turan. Asaahelillee akka kuruphee raasa'aa ka fiigichaan ariifatu ture.

¹⁹ Asaaheelillee Abaaneeriin soqaa deeme; Abaaneeriin ari'uu irraa bita'aa fi mirga hin gorre.

²⁰ Abaaneerillee uf irra midhatee laalee, «Ati Asaaheelii?» jedheen; innillee, «Ee na'a» jedheen.

²¹ Abaaneerillee «Gara mirgaa yookaan gara bita'aa gorii ka'imticha tokko qabii meeshaa harkaa fudhadhu» jedheen; Asaaheel garuu isa ari'uu irraa bita'aa fi mirgallee hin gorre;

²² Abaaneeri Asaaheeliin, «Lafaan wolitti akka si hin hodhine na hin ari'in; yoo lafaan wolitti si hodhe ammo attamitti obboleessa kee Iyyoo'aabiin ol jedhee laala?» jedheen.

²³ Inni garuu isa jalaa siiquu dide; Abaaneerillee arfii ebo'ootiin garaa woraanee eboon isa keessa lufe; inni hulema sanitti kufee du'e; namni maruu hulee Asaaheel kufee itti du'e san yoo gawu hin dhaabata ture.

²⁴ Iyyoo'aabii fi Abiisaan Abaaneeriin ari'anii karaa gammoojjii Gabaa'oonii afoo Gaadiin haga gayu haga goodda Amaatii yoo bayan aduun hin dhiite.

²⁵ Ijoolleen Biiniyaamii Abaaneeriin biratti wol gayanii hulee tokkotti goodda gubbaa bayanii dhaabatan.

²⁶ Abaaneerillee gara Iyyoo'aabii iyye, «Dhugamaan guraadeen bara baraan nama balleessaa? dhumti isaallee hadhaayaa akka ta'e hin beettuu? baniin obboleewwan ufii ari'uu irraa akka deebi'an haga yoomii hin himne?» jedheen.

²⁷ Iyyoo'aabillee dhugaa Rabbii jiraata'aa uduu dubbachuu dhabaattee baniin ganamaan bayee deeme silaa obboleewwan isaanii ari'uu dhiisanii deebi'an.

²⁸ Iyyoo'aabillee xurumbaa afuufe; baniin maruu hin dhaabate; achiin maayessa Israa'eliin hin ariine; lolallee hin dhiise.

²⁹ Abaaneerii fi namoonnillee halkan guutuu Arabaan lufanii deemanii Yoordaanosiinillee ceeyanii Bitrooniin maraa haga lufaniin maayessa gara Mahannaayiimii dhufan.

³⁰ Iyyoo'aabillee Abaaneeriin ari'uu dhiise; banii maraa wolitti qabee garboota Daawitii keessaa Asaaheeliin ala nama kudha sagalii ajjeesan.

³¹ Garboonni Daawitii namoota Biiniyaamiitii fi Abaaneerii haga dhibba sadihii fi jahaatamaa ajjeesan.

³² Iyyoo'aabii fi namoonni isa woliin jiran reeffa Asaaheelii kaasanii qachaa Beeteliheemii awwaala abbaa isaa biratti awwaalaniin; kanaan maayessa halkan guutuu deema'aa bulanii hennaa lafti bariitu Keebrooniin gayan.