Kitaaba Saamu'eelii ka 2ffaa 15 - Kitaaba Woyyuu

Abeseloom Daawititti Hammaate

¹ Kanaan maayessa Abeseloom konkolaataa fardaa tokkoo fi faradoo ufiif qopheeffate; akkasuma loltoota shantamaallee qopheeffate.

² Abeseloom ganamaan ka'ee deemee karra gara qachatti'ii seensisu irra dhaabata'aa ture; inni namoota haja'aaf gara mootichaa dhufan maraa ufitti waama'aa ati qachaa kam keessaa dhufte jedha'aa gaafata'aa ture; namichi gosa Israa'elii keessaa akka gosa tokko ta'e haga himeen maayessa,

³ «Dubbiin ati dubbatte dhuga'aa fi qajeela'a; garuu namni dubbii mootichaa dhagayee hujii irra oolchu hin jiru.» jedhaanii ture.

⁴ Abeseloom, «Uduu ani abbaa murti'ii ta'ee silaa atta jaaladha; namni iyyannoo qabu gara kiyya yoo dhufe ani murtii qajeelaa isaa murteessa» jedheen.

⁵ Yoo namni nagaya isa gaafachu'uuf gara isaa dhufu inni ammo harka badhisee qabee dhungata'aa ture.

⁶ Abeseloom Israa'eliin keessaa worra murtii argachu'uuf gara mootichaa dhufan maraa akkana waan godha'aa tureef onnee isaanii booji'e.

⁷ Woggaa afuriin maayessa Abeseloom mooticha Daawitiin, «Mootii kiyya! akka woreega Rabbii gale raawwadhu gara Keebroonii akka deemu yabo'oo maarre naa jedhi!

⁸ Ani garbichi kee Geeshuurii Sooriyaa keessa uduu jiru Rabbi gara Yerusaalemii uduu na deebisee Rabbii ciincaa dhiyeessa jedhee woreega galee ture» jedheen.

⁹ Mootichi «Nagayaan deemi!» jedheen; innillee ka'ee gara Keebroonii deeme.

¹⁰ Abeseloom garuu, «Worra gosa Israa'elii mara keessatti laagaa xurumba'aa yoo dhageettan ‹Abeseloom Keebrooniin keessatti mootii ta'e› jedha'aa iyyaa'a» jedhee dhaamsa erge.

¹¹ Namoonni dhibba lamaa ka waamaman waan tokkollee uduu hin beenne, gara laafumma'aan gara Yerusaalemii deeman.

¹² Abeseloom hennaa ciincaa dhiyeessu worra Daawitii gorsa kennan keessaa tokkochi ka Akixoofeel jedhamee waamamu ergamaa itti ergee qachaa Giilo'ootii waamsiseen; hammeenni mooticha irratti mari'atame jabaata'aa, worri Abeseloomiin gargaaranillee laakkobsi isaanii baay'ata'aa deeme.

Daawiti Yerusaalemiin Keessaa Dheesse

¹³ Ergamaan tokko Daawitiin oduu, «Garaan worra Israa'elii Abeseloomiin woliin malee si woliin hin jiru» jedhu itti hime.

¹⁴ Kanaaf Daawiti ajajoota worra isa woliin jiran maraan «Ka'aa ariifannee asii haa baanuu! yoo bawuu baanne Abeseloom dhufee nu fixaa; waan qachaa keessatti argamu maraa hin ajjeesa» isaaniin jedhe.

¹⁵ Garboonni mootichaa mootichaan, «Nu'u garboonni tee waan ati mootiin gooftaan keenna filatte maraa maarre jennee raawwanna» jedhaniin.

¹⁶ Mootiin worra mata gala itti galu kudhan isaanii akka mana eeganiif achitti dhiisee maatii ufii maraa fudhatee baye.

¹⁷ Mootichinii fi baniin isa duubaan jiran maruu bayanii Beetimerihaaqitti quphatan.

¹⁸ Mootichinii fi hojjattoonni maruu ladda isaa lufan; loltoonni mana mootummaa Daawitii eegan Kariitotaa fi Filiitota namoonni dhibba jahaa ka worra Geetotaa maruu afoo mootichaa lufan.

¹⁹ Mootichi, «Namni Geetii Itaayini nu woliin maaf dhufte? ati keessumma'aa fi baqataa waan taateef deebi'ii mooticha woliin taa'i.

²⁰ Ati kaleessa dhufte si fuudhee deemuu? Ani gara deemu hin beeku; ati garuu obboleewwan tee fuudhii deemi; Rabbi waan dhuga'aatii fi araara sii haa godhu» jedheen.

²¹ Itaayinillee deebisee mootichaan, «Hulee gooftaan kiyya jiraatu marattuu du'aanillee yoo ta'e jireennaan ani hojjataan kee akka achitti argamu maqaa Rabbiitii fi akkasuma lubbuu gooftaa mooticha kiyyaatiin kakadha» jedhe.

²² Daawiti Itaayiniin «Misha'aa deemii ceeyi» jedheen; namni Geetii Itaayinii fi namoonni maruu daa'imman woliin ceeyan.

²³ Worri biyya san keessa jiran maruu wol ta'anii guddisanii booyan; baniin maruu gara lafa gammoojji'ii ceeyan; akkasuma mootichillee fincaayaa quwaadiroonii ceeye; baniin maruu karaa lafa gammoojji'iitiin ceeyan.

²⁴ Saadooqii fi worri leewwotaa ka isa woliin jiran maruu saanduuqa waadaa Rabbii baadhatanii dhufan baniin maruu haga qachattii keessaa bayaniif Abiyaatariin bira kaayan.

²⁵ Kanaan maayessa Mootichi Saadooqiin, «Saanduuqa waada'aa gara qachatti'ii deebisi; yoo ani Rabbiin afo'otti gaachena argadhee jiraadhe inni ufii fi hulee ufii bulu natti mudhisa.

²⁶ Garuu yoo ka ana hin jaalanne ta'e akka ufii fedhe na haa godhuu» jedheen.

²⁷ Mootichi Saadooqii gadichaan «Atii fi ilmi kee Akimaas ilmi Abiyaatarii Yoonaataan ijoolleen teessan lachuu nagayaan gara qachatti'ii deebi'aa'a.

²⁸ Anillee haga waan keessan oduu mishaa dhagawutti karaa gara lafa gammoojji'ii lufaniin tura» jedheen.

²⁹ Saadooqii fi Abiyaatar Saanduuqa waadaa Rabbii gara Yerusaalemii deebisanii achi jiraatan.

³⁰ Daawiti mata'atti haguuggatee uduu kophee lukatti hin godhanne booya'aa gara gaara ejersaa ol baye; baniin isa woliin jiranillee haguuggatanii booya'aa isa faana yaa'an.

³¹ Akixoofeelii fi Abeseloom yaadaan tokko jedhanii Daawititti himan; Daawiti Rabbiin, «Gorsa Akixoofeelii akka duwwaa gootu si kadhadha!» jedhe.

³² Daawiti hennaa gaara irratti Rabbii sagadu'uuf dhaqe Kuusi namni gosa Arka'aa uffata ufii biinxee daaraa mataa ufiititti firfirsee gara Daawitii dhaqe.

³³ Daawitillee, «Yoo gara kiyya dhufte fe'aa natti taata;

³⁴ gara qacha'aa deebi'iitii Abeseloomiin mootii kiyya ani garbicha sii ta'a akkuma dura abbeetii garbicha ture, siifillee garbicha ta'a yoo jetteen gorsa Akixoofeelii duwwaa goota.

³⁵ Saadooqiin gadichinii fi Abiyaataar gadichi si woliin achi jiranii mii? kanaafuu waan mana mooti'iitii dhageettu maraa Saadooqii gadichaa fi Abiyaataritti himi.

³⁶ Ilmi Saadooqii Akimaasii fi ilmi Abiyaatarii Yoonaataan ijoolleen isaaniillee isaan woliin achi jiran waan dhageettan maraa isaaniin naa ergi»

³⁷ Jaalalloon Daawitii Kuusi gara qacha'aa dhufe; Abeseloomillee gara Yerusaalemii gale.