Kitaaba Saamu'eelii ka 2ffaa 12 - Kitaaba Woyyuu

Mammaaka Mudhata Naataaniitii Fi Aagii Galuu Daawitii

¹ Rabbi Naataanii raatticha gara Daawitii erge; Naataan gara Daawitii dhaqee, «Namoota lamaan qachaa tokko keessa jiraatantu ture; isaan keessaa tokko dureessa; tokko ammo hiyyeessa ture.

² Namichi dureessi hori'ii fi hoolota baay'ee qaba.

³ Hiyyeessi garuu ilmoo hoola'aa takkattii ta qarshii ufiitiin bitate qaba; isii san kunuunsa'aa mana ufii keessatti ijoollee ufii woliin guddisa'aanii ture; nyaata ufii nyaatu nyaachisa'aa, waan ufii dhugu irraallee obaasa'aanii ture; hennaa ciiftullee ammata'aanii ture; ilmoon sun akkuma daa'ima isaa turte.

⁴ Guyyaa tokko gara mana dureessichaa keessummaan tokko dhufe; namichi dureessi sun nyaata keessummichaa qopheessu'uuf horii ufii keessaa tokkollee qaluu hin barbaanne; ka ufii dhiisee ilmoo namicha hiyyeessaa fuudhee qalee keessummichaa nyaata qopheesse»

⁵ Daawiti waan mammaaka namichaatiif aaree guddisee lolee, «Namni waan kana godhe du'uu akka isa barbaachisu maqaa Rabbii jiraata'aatiin kakadha;

⁶ waan hamaa kana garaa jabaatee waan hojjateef waan namicha san irraa fudhate dachaa afurii godhee deebisuu barbaachisa» jedhe.

⁷ Naataan Daawitiin, «Namni sun si'i! Rabbi Waandhi Israa'elii ‹Akka ati Israa'eliin irratti mootii taatuuf si muude; Saa'oliin jalaallee si baase.

⁸ Mana gooftaa keetiitii fi haawwota manaa isaallee sii kenne. Israa'elii fi Yihuudaa irrattillee si moosise; wonti kun uduu sii hanqatee jiraatee silaa dachaa sii eda'a ture.

⁹ Eeganaa maaf ajaja kiyya tuffatte? Waan hamaa kanallee maaf hojjatte? Ooriyooniin hulee lolaatitti ajjeessisiiftee nama qulqulluu worri Amoonii akka ajjeesan gootee haadha manaa isaa fudhatte.

¹⁰ Kanaafuu na diqqeessitee haadha manaa Ooriyo'oo ta gosa Hiitotaa akka haadha manaa tee taatu waan fuuteef baraa haga bara baraa mana kee keessaa woraanni hin dhabamu;

¹¹ Rabbi waan hamaa mana kee keessaa sitti kaasa; haawwota manaa teellee uduu ati argitu fira keetii kenna; guyyamaan namoonni haawwota manaa tee woliin ciisan.

¹² Ati waan kana dhossa'aan gooteerta; ani ammo waan kana Israa'eliin maraa afo'otti guyyamaan godha› » jedheen.

¹³ Daawiti Naataaniin, «Ani Rabbiin yakkeera» jedheen; Naataanillee Daawitiin, «Rabbi waan cubbuu kee sii dhiiseef hin duutu;

¹⁴ garuu waan yakka kana hojjattee Rabbiinillee tuffatteef mucaan sii dhalate hin du'a.» jedheen.

Mucaan Daawitii Du'e

¹⁵ Kanaan maayessa Naataan gara mana ufii deebi'e; Rabbi daa'ima haati manaa Ooriyo'oo Daawitii deette dhibee hama'aan ajjeese.

¹⁶ Daawiti Rabbi akka daa'ima isaa fayyisuuf soomaa fi sagadaan Rabbiin kadhate; galgala manatti galee rafe;

¹⁷ Hojjattoonni mana mootummaa isaa gara isaa dhaqanii lafaa kaasu'uuf badadan; inni garuu hin dide isaan woliinillee womaa hin nyaanne;

¹⁸ guyyaa torbeesso'ootitti daa'imni hin du'e; hojjattoonni isaa hennaa daa'imni lubbu'uun jiru waan itti himnu nuu hin dhageenne; amma yoo akka daa'imni du'e itti himne atta ta'inna? waa uf godha!» jedhanii du'a daa'imaa itti himuu sodaatan.

¹⁹ Daawiti hasaassii hojjattoota ufii haga dhagaye akka daa'imni du'e beekee hojjattootaan «Daa'imni hin du'ee?» isaaniin jedhe; isaanillee «Ee hin du'e» jedhaniin.

²⁰ Daawiti lafaa ka'ee dhiqatee dibatee uffata ufii jijjiiratee gara mana Woyyuu Rabbii seenee sagade; achiin maayessa gara mana mootummaa ufii deebi'ee nyaata naa fidaa jedhe isaanillee nyaata isaa finnaan nyaate.

²¹ Hojjattoonni isaa «Wonti ati goote kun maali'i? hennaa daa'imni lubbu'uun jiru, waan isaatiif soomtee boottee Rabbiin kadhatte; haga daa'imni du'een maayessa garuu kaatee xoroshoo nyaatte!» jedhaniin.

²² Daawiti, «Hennaa daa'imni lubbu'uun jiru, akka Rabbi naa araaramu daa'imallee akka naa fayyisu, yaadee soomee booyuun kiyya dhuga'a;

²³ amma garuu daa'imni waan du'eef maaf sooma? Eeganaa amma daa'ima lubbuu itti deebisuu danda'aa? natu gara isaa dhaqa malee inni gara kiyya hin deebi'u» jedhee isaanii deebise.

Solomoon Dhalate

²⁴ Kanaan maayessa Daawiti haadha manaa ufii Beersaabeehiin jajjabeessee isii bira gaye; isiinillee ilma deetteef; maqaa isaallee «Solomoon» jedhee itti baase; Rabbi daa'ima waan jaalateef,

²⁵ maqaa Yididiyaa jedhamu akka itti baasan raattichi Naataan isaan ajaje; «Yididiyaa» jechuun «Ka Rabbi jaalate» jechu'u.

Daawiti Lolee Injifatee Qachaa Raabaa Jedhamtu Qabate

²⁶ Iyyoo'aab lolee burqaa bisaanii ta qachattii ijoollee Amoonii qabate.

²⁷ Iyyoo'aab gara Daawitii, «Ani qachattii Raaba'aatiin lolee hulee burqaa bisaanii qabadheera;

²⁸ ammallee ani akka qachattii hafan qabadhee maqaa kiyyaan akka hin waamamne loltoota hafe wolitti qabii qachattii hafte lolii qabadhu jedhee dhaamsa erge.

²⁹ Daawiti loltoota wolitti qabee gara Raabaatii dhaqee lolee qabate;

³⁰ gulloo ulfinnaa ka mootii isaanii mataa isaa irraa fudhate; gulloon sun kiiloo giraamii soddomii shan; gulloo dhagaa gatii gudda'aa san fudhatee mataa ufiititti godhate; qachattii san keessaallee waan heddu booji'e.

³¹ Banii qachattii san keessa jiran baasee haamtuu mukaatiin, qottoo sibiilaatii fi dhagaraa sibiilaatiin hujii akka hujan godhe; faara akka hojjatanii fi qachaa Amoonii maraa keessattuu akkasuma godhan; Daawitii fi baniin maruu gara Yerusaalemii deebi'an.