Kitaaba Saamu'eelii ka 2ffaa 11 - Kitaaba Woyyuu

Daawitii Fi Beersaabeehi

¹ Jalqaba wogga'aa irratti hennaa mootonni duulaaf bayan Daawiti Iyyoo'aabiin ajajoota loltootaatii fi loltoota Israa'elii maraa woliin duulchise; isaanillee worra Amoonii mooyatanii qachaa Raabaa jedhamtee waamamtu marse; Daawiti ammo Yerusaalemitti hafe.

² Guyyaa tokko saafaya Daawiti hirribaa ka'ee gamoo mana mootumma'aa gubbaa bayee asii fi achi uduu deddeemu dubartii takka uduu nafa dhiqattu arge; isiin guddiftee bareeddi.

³ Kanaaf isiin eennuun akka taate beeku'uuf Daawiti nama tokko erge; isiin Beersaabeehi jedhamti; inni isii haadha manaa Ooriyoo ilma Eeliyaamii gosa Hitaawotaa akka taate beeke.

⁴ Daawiti isi'itti namoota ergee waamsisee bira gaye; hennaan sun hennaa dubartiin garaa argitu irraa dhaabate ture; achiin maayessa dubartittiin gara mana ufii deebite.

⁵ Kanaan maayessa dubartittiin akka ulfoofte beettee ani sii ulfaayeera jettee nama gara Daawitii ergite.

⁶ Kanaan maayessa Daawiti, «Ooriyoonii Hitaayicha gara kiyya ergi» jedhe; Iyyoo'aabillee Ooriyooniin gara Daawitii erge.

⁷ Ooriyoon hennaa gara isaa dhufe Daawiti Ooriyooniin, «Iyyoo'aabii fi loltoonni nagaya jiranii? haalli lolaa akkam ta'e?» jedhee gaafate.

⁸ Kanaan maayessa Daawiti Ooriyooniin, «Eeganaa gara manaa deemii luka kee dhiqadhu» Jedheen; Ooriyoon Daawitiin afo'oo akkuma bayeen Daawiti yoosuu nyaata ergeef;

⁹ Ooriyoon ammo uduu gara mana ufii hin deemne loltoota mana mootumma'aa eegan woliin afaanuma balbala mana mootichaa rafee bule;

¹⁰ Daawiti akka Ooriyoon gara mana ufii hin galle hennaa dhagaye hennaa dheera'aaf maati'iin adda baatee amma deebi'aarta wonti ati amma gara mana keetii hin deemneef maali'i?» jedhee gaafate.

¹¹ Ooriyoonillee, «Namoonni Israa'eliitii fi Yihuuda'aa hulee lolaa lafa badhaa keessatti quphataniiran; saanduundhi waada'aallee goom'ee keessa isaan bira jira; ajajaan loltoota kiyyaa Iyyoo'aabii fi ajajoonni loltoota isaallee dirree lolaa irratti quphataniiran; ani attamitti nyaadhee dhugee haadha manaa tiyya woliin ciisuu danda'a? waan akkanaa kana sirimaa akka hin goone lubbuu teetiin kakadha» jedhe.

¹² Daawitillee Ooriyooniin, «Adha na bira ooli; boru si geegessaa» jedheen; kanaaf Ooriyoonillee guyyaa sanii fi halkan san Yerusaalemiin keessa bule.

¹³ Daawiti Ooriyooniin hurbaata affeereenii akka machaayu daadhii woyini'ii obaase; halkan san Ooriyoon mana mootumma'aa ka loltootaa keessa uffata affatee rafe garuu gara mana ufii hin galle.

¹⁴ Bariisaa san Daawiti xalayaa Iyyoo'aabii barreessee Ooriyoonitti kennee erge.

¹⁵ Dubbiin inni barreesse «Ooriyooniin kolba lolli jabaateen dhaabsis; achiin maayessa ati duuba isaa deebi'ii akka inni du'u godhi» ka jedhu ture.

¹⁶ Akkaataa kanaan Iyyoo'aab qachattii marsee qabee uduu jiru hulee lolli jabaateen laalee Ooriyooniin erge.

¹⁷ Loltoonni diintota isaanii qachattii sanii bayanii loltoota Iyyoo'aabiitiin lolan; ajajoota loltoota Daawitii keessaa namoota hago'oo fi Ooriyoo ajjeesan.

¹⁸ Kanaan maayessa Iyyoo'aab oduu lolaa gara Daawitii erge.

¹⁹ Nama ergamu san akkana jedhee ajaje; waan lolaa haga mootichatti himteen maayessa,

²⁰ Mootichi aaree akkana siin jechuu danda'a; ‹Isaaniin lolu'uuf gara qachatti'ii maaf dhiyaattan? Dallawa irra dhaabatanii akka buundhe'een isin darbatan hin beennee?

²¹ Mucaan Gedewoonii Abemelek attamittti akka du'e hin beettanii? isa hulee Teebeexi jedhamee waamamutti intalti takka majje'een gamoo irraa darbattee ajjeefteen; eeganaa isin wonti gara dallawaa dhiyaattaniif maali'i?› jedhee mootichi yoo si gaafate ‹ajajaan loltoota keetii Ooriyoon du'eera› jedhii itti himi.» jedheen.

²² Akka kanaan ergamaan ka'ee deemee waan Iyyoo'aab ajajeen maraa Daawititti hime;

²³ «Waan Diintonni keenna nutti jabaataniif nuun lolu'uuf qacha'aa bayanii gara dirree lolaa dhufan; nu ammo isaan ariinee gara balbala dallawa dhaga'aa deebifne.

²⁴ Achiin maayessa dallawa dhaga'aa irra taa'anii buundhe'een nu darbatan; mootii'i! ajajoota loltoota keetii keessaa hennaa san namoonni hagoon hin du'an; garbichi kee Ooriyoonillee hin du'e.»

²⁵ Daawiti namicha ergame sanniin Iyyoo'aabitti «Lola irratti jalqaba namni du'u waan hin beekkamneef ‹Hin sodaatinii jabaadhu› jedhiin; akka hin aarrellee itti himi; siri'ii hunna ufii jabeeffatee balaa buusu'uun qachattii akka qabatu itti himi» jedheen.

²⁶ Haati manaa Ooriyo'oo abbaan manaa isi'ii Ooriyoon akka du'e haga dhageette abbaa manaa ufiitii boottee gaddite.

²⁷ Haga booya nageeffatteen maayessa Daawiti isi'itti nama ergee akka dhuftu taasisee haadha manaa taateefii isaa ilma dhiiraa deette; garuu wonti Daawiti godhe maruu Rabbiin biratti waan hamaa ture.