Kitaaba Saamu'eelii ka 1ffaa 3 - Kitaaba Woyyuu

Rabbi Saamu'eelitti Mudhate

¹ Daa'imni Saamu'eel Eelii afo'otti Rabbii hojjata ture; bara san dubbiin Rabbii dharraa ture; mudhatallee hin argan.

² Bara san Eeliin guddisee waan jaareef ijaan hin argu ture.

³ Eeliin rafee uduu jiru, ibsaan mana woyyu'uu uduu hin dhaamne, Saamu'eel hulee saanduundhi waadaa Rabbii jiru keessa uduu rafee jiru,

⁴ Rabbi Saamu'eeliin waame innillee hin awwaatee.

⁵ Gara Eeli'ii fiigee, «Kunoo ani ati na waamnaan dhufe» jedheen; Eeliinillee, «Ani si hin waamne deemii deebi'ii rafi» jedheen.

⁶ Rabbi ammallee, «Saamu'eel!» Jedhee isa waame; Saamu'eel ammallee ka'ee gara Eeli'ii dhaqee «waan ati na waamteef deebi'ee dhufe» jedhe; Eeliin ammo, «Mucaa kiyya, ani si hin waamnee deebi'ii rafi» jedhee deebiseef.

⁷ Hennaa san Saamu'eel tanaan dura waan Rabbi isa waamee hin beenneef laagaa Rabbii ta'uu hin beenne ture.

⁸ Rabbi hennaa sadeesso'oo Saamu'eeliin waame; innillee ka'ee gara Eelii dhaqee «Kunoo waan na waamteef dhufe» jedhe; achiin maayessa ka daa'ima waama'aaru akka Rabbiin ta'e beekee,

⁹ Eeliin Saamu'eeliin, «Deebi'ii rafi yoo deebi'ee si waame ‹Ani garbichi kee dhagaya'aaraa dubbadhu› jedhiin» jedheen; Saamu'eelillee deebi'ee rafe.

¹⁰ Rabbi deebi'ee dhufee akkuma duraa san Saamu'eel! Saamu'eel! jedhee waameen; Saamu'eelillee «Ani garbichi kee dhagaya'aaraa dubbadhu» jedhe.

¹¹ Rabbi Saamu'eeliin, «Guyyaan ani Israa'eliin irratti waan tokko hojjadhu dhiyaateera; namni waan ta'e san gurraan dhagawu maruu coraan isaanii hin rifata.

¹² Guyyaa san waan mana Eeli'ii irratti raawwatu'uuf dubbadhe maraa Eelii irratti raawwadha.

¹³ Waan inni ijoollee isaa waan hamaa hojjattee innillee argee waan irraa hin dhooggineef, waan cubbuu isaatiif baraa haga bara baraa akka isa irratti murteessu isatti himeera.

¹⁴ Kanaafuu cubbuun maatii Eeli'ii kenna'aa fi ciincaa dhiyeessu'uun baraa haga bara baraa akka isaa hin dhiifamne kakadheera.»

¹⁵ Saamu'eel haga lafti bariituu rafee ganama ka'ee balbala mana Rabbii bane; mudhata argellee Eeli'itti himuu sodaate;

¹⁶ Eeliin garuu Saamu'eeliin waamee, «Mucaa kiyya Saamu'eel!» Jedhe; innillee hin awwaate.

¹⁷ Inni «Wonti Rabbi sitti hime maali'i? na hin dhossin waan inni sitti hime maraa keessaa yoo na dhossite, Rabbi guddisee si haa adabu» jedheen.

¹⁸ Saamu'eel waan Rabbi isatti hime maraa uduu hin dhossin waa maraa isatti hime; Eeliin «Inni Rabbiin waan ta'eef waan fedhe haa godhuu» jedhe.

¹⁹ Saamu'eel guddata'aa deeme, Rabbi waan isa woliin jiruuf waan inni dubbatu maraa Rabbi raawwata'aafii ture.

²⁰ Worri Israa'elii gosa Daanii irraa jalqabee haga Beersaabeehii Saamu'eel raatticha Rabbii amanamaa akka ta'e beekan.

²¹ Rabbi Seelo'otti dubbii ufiitiin Saamu'eelitti mudhate; wonti Saamu'eel jedhu maruu banii Israa'elii biratti fudhatama argate.