Kitaaba Saamu'eelii ka 1ffaa 24 - Kitaaba Woyyuu

Daawiti Lubbuu Saa'olii Hambise

¹ Saa'ol Filisxeemiin lolee haga deebi'een maayessa akka Daawiti lafa gammoojjii Ayingaadii keessa jiru dhagaye.

² Kanaaf Saa'ol loltoota Israa'elii jajjabaa namoota kuma sadihii fudhatee Daawitii fi namoota isa woliin jiran soqaa gara hulee dhagaa re'iin gammoojji'ii keessa jiraattuu dhaqe.

³ Inni gara dallya bultii hoolotaatiin dhufe; hulee san goda tokkotu jira; Saa'ol raasa'atti itti bawu'uuf goda keessa seene Daawitii fi loltoonni isaa garuu goda keessatti dhokataniiran.

⁴ Loltoonni Daawitii Daawitiin, «Guyyaan Rabbi waan jaalatte akka gootuuf diina kee harka kee jala galcha jedhee dubbate santu gaye!» jedhaniin; achii Daawiti suuta jedhee qaccee uffata Saa'olii kutee fudhate.

⁵ Garuu Daawiti uffata Saa'olii waan mureef hin gadde.

⁶ Daawiti namoota ufiitiin, «Nama Rabbi dibee moosise gooftaa kiyya irratti ani waan hamaa hin godhu; isa waan Rabbi dibeeruuf harki kiyya isatti hin bayu!» jedhe.

⁷ Dubbii kanaan Daawiti loltoota ufii akka Saa'oliin hin ajjeefne dhoogge; Saa'olillee achii ka'ee goda keessaa bayee deeme.

⁸ Daawitillee goda keessaa bayee Saa'oliin faanaa deemee «Gooftaa; mootii kiyya!» jedhee Saa'oliin waame, Saa'ol yoo uf duuba midhatu Daawiti isaa gad jedhee,

⁹ Saa'oliin, «Waan namoonni Daawiti waan hamaa si irratti hojjachu'uuf ta'a jedhan maaf dhageetta?

¹⁰ adha Rabbi goda keessatti harka kiyya jala akka si galche ijji tee argiteerti; namoonnillee isa ajjeesi naan jedhaniiran; ati garuu garaa na nyaatte; nama Rabbi dibe waan taateef ani gooftaa kiyya hin ajjeesu jedhe.

¹¹ Abbaa kiyya! ila qaccee uffata keetii laalii; mureeraa garuu ani si hin ajjeefne; kanaafuu hubadhu; ati garuu lubbuu kiyya baasu'uuf soxxa; ani hama'aa fi cubbuu si irratti hin hojjanne.

¹² Ammaa achi Rabbi anaa fi si jiddu'utti haa murteessu; Rabbi haluu naa haa baasu malee ani haluu si hin bawu; waan hamaa ati hojjatte maraa mataa keetitti deebisa.

¹³ Mammaanni namoonni waan hamaa hojjatan namoota hammeeyyii calla'a jedha. Ani garuu si irratti miidhaa hojjachuu hin barbaadu.

¹⁴ Mootii Israa'elii ati eennuun ajjeesu'uuf taata! eennuun ariita! saree duute mo'o taffi'i? eennuun akka ari'a'aartu laali!

¹⁵ Kana Rabbi haa murteessu; rakkinna kiyyallee haa laalu; harka kee jalaa na haa oolchu; dhugaa kiyyallee naa haa baasu» jedhe.

¹⁶ Daawiti haga kana dubbateen maayessa Saa'ol Daawitiin, «Ilma kiyya! kun laagaa keetii? jedhee gaafatee laagaa ol qabatee booye.

¹⁷ Achiin maayessa Daawitiin «Ati nama dhuga'aati; ani ammo nama sobaati; badii kana fakkaatu kana hennaa sitti hojjadhu ati ammo waan mishaa naa goote.

¹⁸ Hennaa Rabbi na harka kee jala galchellee ati garuu na hin ajjeefne; waan gaarii gootee natti mudhifte.

¹⁹ Namni diina qabee uduu hin miidhin dhiisu eessatti argama? ati adha waan mishaa waan naa gooteef Rabbi si haa eebbisu!

²⁰ Kunoo ati mootii Israa'elii akka taatu, banii Israa'elii akka bulchitu, mootummaan keellee akka jabaatu hubadheera.

²¹ Fiixaa kiyya akka hin balleessine yookaan maatii abbaa kiyyaa keessaa akka hin baafne amma maqaa Rabbiitiin naa kakadhu» jedheen.

²² Daawitillee akka waan kana hin goone hin kakateef. Kanaan maayessa Daawiti haga Saa'olii kakateen maayessa Saa'ol gara mana ufii gale; Daawitii fi loltoonni isaa gara hulee itti dhokatanii deebi'an.