Kitaaba Saamu'eelii ka 1ffaa 13 - Kitaaba Woyyuu

Lola Filsxeemiin Irratti Ta'e

¹ Saa'ol hennaa moowu nama woggaa soddomaa ture; worra Israa'elii irratti woggaa lamaa haga mooyeen maayessa,

² namoota kuma sadihii worra Israa'elii keessaa filate namoonni kuma lamaa isa woliin Maakisa'aa fi gaara Beeteelii gubbaa turan; namoonni kuma tokkoo Gibi'aa Biiniyaamiititti ilma isaa Yoonaataa woliin turan; banii hafe ammo akka gara daase'ee dacha'an godhe.

³ Yoonaataan hulee Naasiib jedhamutti duula worra Filisxeemii dhaye; worri Filisxeemiillee kana dhagaye; Saa'ol worri Ibrootaa haa dhagayuu jedhee biyya marattuu xurumbaa afuufsise.

⁴ Worri Israa'elii maruu akka Saa'ol duultota worra Filisxeemii dhaye, worri Israa'elii akka worra Filisxeemii biratti akka batti'iititti waan laallamaniif baniin maruu Saa'oliin faana deemanii Gelgela'atti wol gayan.

⁵ Worri Filisxeemii worra Israa'eliitiin wol lolu'uuf wol gayan; loltuun konkolaataa fardaa kuma soddoma, worri fardaa namoota kuma jaha; isaan namoota baay'ee akka xidhacha galaanaa turan; achii ka'anii karaa Beetawweeniitiin gara baya biiftu'uutiin Maakimaasitti quphatan.

⁶ Baniin guddisee waan sodaateef worri Israa'elii akka rakkinna guddaa keessa jiran haga argan baniin godaa fi qoree buura qilee kaloo dhaabaatii fi boolla keessatti dhokatan.

⁷ Worra Ibrootaa keessaallee namoonni gariin laga Yoordaanosii ceeyanii gara biyya Gaadiitii fi biyya Gala'aadii dhaqan; Saa'ol garuu Gelgelamatti hafe; baniin maruu hollata'aa isa faanaa deeman.

⁸ Saa'ol akkuma haaganaa Saamu'eel isaa qabeetitti Saa'ol Saamu'eeliin eegu'uuf haga guyyaa torbaa ture; garuu Saamu'eel haga hennaa saniititti gara Gelgela'aa hin deebine; sababaa kanaaf namoonni hedduu Saa'oliin dhiisanii biraa lixan.

⁹ Kanaaf Saa'ool «Ciincaa ciincawuu fi ciincaa fayyumma'aa naa fidaa» jedhee ciincaa ciincawu ka fayyumma'aa ciincesse.

¹⁰ Haga inni ciincaa ciincessee raawwateen maayessa Saamu'eel dhufe Saa'ol akka Saamu'eel isa eebbisuuf gara isaa dhaqe.

¹¹ Saamu'eel garuu, «Wonti ati goote kun maali'i?» jedhee gaafate; Saa'olillee baniin na irraa fooyamee akka gargar faca'e; atillee waan hennaa haaganaa qabnetti hin dhufneef worri Filisxeemiillee akka Maakimaasitti wol gayan argee,

¹² ‹Uduma ani Gelgelaa jiru worri Filisxeemii balaa natti buusan jedhee ani ammo waan Rabbiin gargaarsa hin kadhanneef› jedhee ciincaa dhiyeessuun akka na barbaachisu hubadhee obsuu dadhabee ciincaa ciincesse» jedheen.

¹³ Saamu'eel garuu Saa'ooliin «Ati womaa hin tolchine; ajaja Rabbi Waandhi kee si ajaje hin eenne; Rabbi banii Israa'elii irratti mootummaa kee jabeessee ijaaree ture;

¹⁴ amma mootummaan kee jabaatee hin dhaabatu; Rabbi nama akka yaada isaa ta'e filateera; ati waan Rabbi si ajaje waan hin eenneef Rabbi banii ufii irratti akka mootii ta'u nama biraa muudeera» jedheen.

¹⁵ Saamu'eel Gelgela'aa ka'ee deeme; baniin hafe ammo Saa'oliin faanaa gara loltoota ufii deeman; Gelgela'aa ka'anii gara Gibi'aa gara Biiniyaamii dhufan; Saa'ol banii isa woliin jiru tooyate; Saa'ol hennaa namoota ufii laakkayu haga namoota dhibba jahaa ta'an.

¹⁶ Saa'olii fi ilmi isaa Yoonaataan baniin isaan woliin jirullee lafa Biiniyaamii Gibi'aa keessa jiraatan worri Filisxeemiillee Maakimaasitti quphatan.

¹⁷ Duultonni worra Filisxeemii bakka sadihitti qoodamanii qabattee qabanii kushee ufii keessaa yaa'an; gareen tokko gara oofraa bulchiinsa Baashu'aalii dhaqan.

¹⁸ Gareen lammeesso'oo gara karaa Beetihoorii naannaye, gareen sadeesso'oo ammo gara dhooqa gammoojjii Sibooyii fiduu naannaye.

¹⁹ Worri Filisxeemii worra Ibrootaa guraade'ee fi woraana akka hin hojjanne waan dhoogganiif biyya Israa'eliititti namni sibiila tumee meeshaa woraanaa hojjatu hin argamne.

²⁰ Worri Filisxeemii maruu maarashaa, haamtuu, qottoo tumsiisu'uuf gara worra Filisxeemii dhaqan.

²¹ Gatiin sibiila kanniin tumsiisu'uuf, qaccee sibiilaa ka sanga'aan oofan qarsiisu'uuf kaffalan birrii haga saqilii afurii ulfaatu; gatiin maarasha'aatii fi doomaa qarsiisu'uuf kaffalanillee dachaa saniiti.

²² Kanaafuu guyyaa duulaa Saa'olii fi ilma isaa Yoonaata'aa achi loltoota worra Israa'elii keessaa namni guraade'ee fi woraana harkatti qabate hin jiru.

²³ Duulli worra Filisxeemiillee karaa gara Maakimaasii dhaqaniin bayan.