Kitaaba Seena'aa ka 1ffaa 9 - Kitaaba Woyyuu

Banii Israa'elii Ka Boojuu Irraa Deebi'e

¹ Baniin Israa'elii maruu akkuma maatii ufiitiin galmaayan; seenaan kun akkaatama kitaaba mootota Israa'eliitiin barreeffameera; baniin biyya Yihuuda'aa sababaa cubbuu ufiitiif booji'amanii gara biyya Baabiloonii dhaqan.

² Gadoonni duraa ka gara lafa ufii dacha'an worra Leewwotaa, worra mana woyyuu keessatti hojjatanii fi worra Israa'elii fa'a.

³ Worri Yihuuda'aa, ka Biiniyaamii, ka Efreemiitii fi worri gosa Minaase'ee ta'an Yerusaalemiin keessa jiraachu'uuf deeman.

⁴ Worra Yihuuda'aa keessaa worri Yerusaalemiin keessa jiraachu'uuf dhaqan maatii dhibba jahaatii fi sagaltama; fiixaan Faareesii ilmi Yihuuda'aa, ilmi ilma Oomirii ilma Amihuudii Utaayiin garuu bulchaa taasisanii filan; kuuwwan worri fiixaa Faareesii Imirii fi Baaniin fa'a.

⁵ Ilmi Yihuuda'aa hangaftichi fiixaan Sheela'aa Asaaya'a.

⁶ Inni ijoollema ufii woliin bulchaa maatii ufii ture; ilmi Yihuuda'aa Yi'u'eelii fiixaa Zarahii akka inni isaan bulchu taasifatan.

^7-8 Worra Yerusaalemiin jiraata'aa turan keessaa gofti Biiniyaamii worri deeman; Hoodawuu ilma Hasanuu, Maashulaa ilma Hoodawuu, Saaluu ilma Maashulaa, Yubinaayaa ilma Yirohaamii, Ilma ilma Mikirii, Eelaa ilma Uuzii, Raa'u'eeli, Maashulaa ilma Shafaaxiya'aa fa'a.

⁹ Gosa Biini'yaamii keessaa worri Yerusaalemiin keessa jiraachu'uuf deeman wolitti qaba'atti maatii dhibba sagalii fi shantamii jaha; worri asii olitti maqaan isaanii dhayame kunniin maruu bulchoota maatii ufii turan.

Gadoota Yerusaalemiin Keessa Jiraatan

^10-12 Worra gadootaa keessaa Yoodaahee, Yoo'aariibi, Yaakiin, bulchaa mana woyyu'uu Akixoobi, Maraayooti, Saadooqi, Meesulaa, Keliqiyaas, Azaariyaas, Malkiyaa, Phaaskoor, Yirohaam, Adaayaa, Imeeri, Mishilaami, Meesulaam, Yahizeraa, Adi'eelii fi Maasaayi.

¹³ Kunniin maruu hujii mana woyyuu keessatti hojjatamu maraa hojjachu'uuf worra dandeettii qabu turan; baay'inni isaanii namoota kuma tokkoo fi dhibba torbaa fi jahaatama turan.

Worra Leewwotaa Ka Yerusaalemii Keessa Jiraatan

^14-16 Worri Leewwotaa ka biyya Yerusaalemii keessa jiraata'aa turan; Shaamayaa ilma Hashuubii, worra gosa Meraarii, abboota isaa ka duraa keessaa Aziriqaabii fi Hashabiyaa fa'a. Baaqbaqaar, Hereeshi, Galaali, Maataaniyaa ilma Miika'aa, abboonni isaanii ta duraa Zikaarii fi Asaafiin fa'a; Abdiyyu ilmi Shamaya'aa, abboonni isaanii ta duraa Galaalii fi Yiduutaaniin fa'a; Baraakiyaan ilmi ilma Aasaa ilma Hilqaana'aa ka ganda bulchiinsa Naaxoofii jala ture keessa jiraata'aa ture fa'a.

Waardiyyoota Mana Woyyuu Yerusaalemii keessa Jiraata'aa Turan

¹⁷ Waardiyyoonni mana woyyuu Yerusaalemii keessa jiraata'aa turan. Shaaluum, Aquubi, Xeelmoonii fi Ahimaaniin fa'a; bulchaan isaanii Shaaluum.

¹⁸ Haga hennaa sanii isaan balbala gara baya biiftu'uu ka mootichaa eega'aa turan; isaan tanaan dura balbala dallawa gara worra Leewwotaa seensisuun eega'aa turan.

¹⁹ Shaaluum ilmi Qoree ilma Abiyaasaafii worra gosa maatii Qore'ee ta'an firtoota ufii woliin akkuma aboonni isaanii ta duraanii hujii Rabbii huja'aa turanitti balbala daasee Rabbi itti waaqeffamu eega'aa tura.

²⁰ Dura Finihaasii ilma Alaazariititu bulchaa isaanii ture; Rabbillee isa woliin ture.

²¹ Zakkaariyaas ilmi Meesula'aa balbala daasee wol gayi'ii eega'aa ture.

²² Worri hulee balbala seenanii Rabbiin itti waaqeffatan haa eegani'iif filataman namoota dhibba lamaa fi kudha lama; kunniin worra Daawitii fi raattichi Saamu'eel akkaataa gosa isaaniitiin uf jalatti ramadan keessatti laakkayaman.

²³ Isaanii fi ijoolleen isaanii daasee mana woyyuu Rabbii keessatti waardiyyoota turan.

²⁴ Kolba arfaniinuu gara kaabaatiin, gara kibbaatiin, gara baya biiftu'uutii fi gara dhiya adu'uutiinillee, waardiyyootatu eega'aa ture.

²⁵ Waardiyyoota kanniin firtoonni isaanii ka gandaa isaanii keessa jiraata'aa turan torbaan torbaaniin kore kore'een dhaqa'aa isaan gargaaruu isaan barbaachisa ture.

²⁶ Worra Leewwotaa keessaa bulchoonni afurii ka waardiyyootaa hennaa maraa baallii guutuu isaan irraa qaban akkasuma isaan meeshaa mana woyyuu keessa jiruu fi kutaa maraafuu worra baallii qaban turan.

²⁷ Isaan waan mana woyyuu eeganiif ganamaa fi galgalallee worri balbala mana woyyu'uu banu waan isaan ta'eef naannoma san bulan.

Leewwota Kaawwan

²⁸ Leewwonni kuuwwan meeshaa qulqulluu mana woyyuu keessatti ittiin hojjatan maraa irratti baallii qaban; isaan meeshaa kanniin hennaa huji'ii laakkaya'aa baasan; huji'iin maayessaallee laakkayanii gara mana woyyu'uu deebisan.

²⁹ Isaan keessaa gari gariin daadhii woyini'ii, Dhadhaa ejersaa, Hixaanaa fi urgooftuu irrattillee baallii qaban.

³⁰ Gosa worra gadootaa keessaallee gari gariin worra urgooftuu gara garaa wolitti qabu irratti baallii qaban.

³¹ Matitiyaan namni gosa Qore'ee ilmi hangafaa ka Shaaluumii waan eelee irratti bilcheessan maraa irratti baallii qaba ture.

³² Baniin gosa Qaatii gari gariin xoroshoo guyyaa sambataa mana woyyuu keessatti qopheessan maraa irratti baallii qaban.

³³ Bulchoonni gosa Leewwotaa gari gariin faarfattoota turan; hujiin isaanii halkanii fi guyyaa waan ta'eef hujii kaawwan hin hojjatan.

³⁴ Kunniin maruu bulchoota worra Leewwotaati; isaan akkaatama gosa ufiitiin Yerusaalemiin keessatti bulchoota ta'anii jiraata'aa turan.

Fiixaa Mooticha Saa'oliitii fi Abboota isaa

³⁵ Yi'i'eel qachaa Gabaa'oonii ijaaree keessa jiraata'aa ture; haati manaa isaa Ma'ikaa jedhamti;

³⁶ ilmi isaa ka hangafaa Abdoon jedhama; ijoolleen isaa ta dhiiraa tuuwwan

³⁷ Duuri, Qiisi, Ba'aali, Neeri, Naadaabi, Gedoori, Ahiyuu, Zaakuuri, Miqilooti biyya Gabaa'oonii keessa jiraata'aa turan.

³⁸ Miqilooti Sami'aa uumate, isaanillee obboleewwan ufii woliin naannoma isaan jiraatan san Yerusaalemiin keessa jiraata'aa turan.

³⁹ Neeri Qiisiin uumate, Qiis Saa'oliin uumate; Saa'ol Yoonaataa, Melkisaa, Aminaadaabii fi Asba'aaliin uumate;

⁴⁰ Ilmi Yoonaata'aa Marba'aali. Marba'aali Miikkaa uumate;

⁴¹ Miikkaanillee ijoollee dhiiraa Piitoon, Meeleek, Taari'aa fi Akaaziin uumate;

⁴² Akaazi Ya'iraa uumate; Ya'iraan Alemeeti, Azmootii fi Zamiriin uumate; Zamirillee Mooxaa uumate.

⁴³ Mooxaan Bin'aaniin uumate. Bini'aan Raaffayaa uumate; Raaffayaan Eel'aasaa uumate, Eel'aasaan Eseeliin uumate.

⁴⁴ Eseeli ijoollee jaha qaba; isaan Azriqaam, Bokiruu, Ismaa'el, Sha'aariyaa, Abdiyyuu fi Hanaaniin fa'a.