Kitaaba Seena'aa ka 1ffaa 5 - Kitaaba Woyyuu

Fiixaa Roobeelii

¹ Fiixaan ijoollee Roobeelii ilma hangafaa ka Yaaqoobii kanniin; (Roobeel waan siree abbaa ufii batteesseef mirga hangafumma'aa dhabe; mirgi sun ijoollee Yooseefiitii kennamee ture;

² garuu namni banii bulchuu fi ka maraa caalaa jabaa ta'ee ka argamu gosa Yihuuda'aa keessa.)

³ Roobeel ka ijoollee Yaaqoobii keessaa hangafa ta'e ijoollee dhiiraa afur uumate; sunniinillee Heenoohi, Falusoo, Asroonii fi Karmii fa'a.

^4-6 Fiixaan Yoo'eelii ka dhaloota irraa haga dhaloota kanaa jiran Shamayaa, Goog, Saamee'i, Miikkaa, Raayyaa, Bi'eelii fi Eeraa fa'a; mootonni mootota Asoorotaa Telgeltelfelsoor Bi'eeraa bulchaa gosaa ta'e qabee booji'ee fudhate.

⁷ Akkaataa galmeen baay'inna worra mooti'ii irratti argame ibsutti gofti Roobeelii bulchaa gosaa turan Iyyoo'eel, Zakkaariyaas;

⁸ Gosa Iyyoo'eeliitii Beelaa ilma ilma Shama'aa ta'e ilma Azaazii fa'a; huleen gofti kun keessa jiraata'aa ture, Aroo'eeri, achiin gara kaabaatiin haga Naabooniitii fi haga bulchiinsa Ba'aalba'oonii jiraata'aa turan.

⁹ Isaan biyya Gala'aadii keessatti bayima gobbuu loonii waan qabaniif karaa baya biiftu'uutiin haga laga Efraaxisii lafa gammoojji'ii ka duwwaa jiru maraa qabatan.

¹⁰ Bara mootichi Saa'ool bulcha'aa ture gofti Roobeelii gosa worra Hagarii irratti balaa buusee isaan maraa woraanaan fixe; lafa isaanii Gala'aadii gara baya biiftu'uutiin jirtu qabatee ta ufii taasifate.

Fiixaa Gaadii

¹¹ Gofti Gaadii hulee gofti Roobeelii jiraatuun lafa harkaan gara kaabaa irra jiru jiraata'aa turan; lafti sunillee Baasaaniin keessa yoo ta'u gara baya biiftu'uutiin haga Salaaka'aa gaya.

¹² Iyyoo'eel gosa maraa caaluuf abbaa yoo ta'u Saafaan garuu gosa sadarkaa lammeesso'oo irratti argamtuu abba'a; Yaanaahii fi Saafaaxi gosoota biraa ka Baasaaniin keessa jiraataniif abbaa turan.

¹³ Miseensi gosa hafee Mikaa'eel, Meesulaam, Saabaa, Yuraayi, Yaakaan, Zuhee fi Oobeedi jedhamanii waamaman gosa torbaa keessatti wolitti qabamanii laakkayaman.

¹⁴ Isaan kunniin fiixaa Ibihaayilii ilma Huurii yoo ta'an abboonni isaanii ta duraa Abihaayi, Huuri, Yaruhaa, Gala'aad, Mikaa'eel, Yeshishaayi, Yaahido'oo fi Buuziin fa'a.

¹⁵ Aahi ilmi ilma Guunii Abdi'eel bulchaa gosa kanniin maraatuu ture;

¹⁶ kunniin maruu bulchiinsa Baasaaniitii fi Gala'aadii qachoota didiqqaa achitti argaman akkasuma hulee margi itti argamu biyya Baasoorii keessa jiraata'aa turan.

¹⁷ Galmeen maqaa maati'ii qabate kun ka qophaaye bara mootummaa Yihuuda'aa bara Iyyoo'aataamiitii fi bara mootummaa Israa'elii bara Iyyoorbi'aam fa'a bulcha'aa turan.

Loltoota worra gara baya Biiftu'uutiin jiranii

¹⁸ Wodhakkaan gosa Minaase'eetii fi gosa Roobeelii ka gara baya biiftu'uutitti argaman wonte'ee fi woraana akkasuma worra lola ebo'ootiin sirri'itti leenji'an loltoota kuma afurtamii afurii fi dhibba torbaa fi jahaatama turan.

¹⁹ Isaan kunniin worra Aggaarotaa, Iyyaaxuur, Kanaafeesii fi Naadaabiin woliin wol lolan.

²⁰ Rabbiin waan amananiif akka inni isaan gargaaru isa kadhatan; Rabbillee kadhaa isaanii dhagayee worra Aggaarotaatii fi goshoota lola irratti isaan gargaaran irratti mootee isaanii kenne.

²¹ Isaan diintota ufii jalaa gaallan kuma shantamaa, hoolota kuma dhibba lamaaf shantamaatii fi harriin kuma lamaa booji'an; akkasuma namoota kuma dhibba tokkoo booji'anii fudhatan.

²² Lolli sun ka Rabbi fedhu waan ta'eef gosa diintota ufii keessaa namoota baay'ee ajjeesan; isaanuu haga hennaa booji'amanii fudhatamaniititti lafa irra jiraachuu jalqaban.

Fiixaa Minaase'ee Ka Gara Baya Biiftu'uutiin Jiru

²³ Ijoolleen gosa Minaase'ee wodhakkaan biyya keessa taa'anii Baasaanii jalqabee haga Ba'aal- Heermoonii, Saaneerii fi haga gaara Heermoonii horanii badhatan;

²⁴ bulchoonni mana abboota isaanii Eefeer, Yishi'i, Eli'eel, Aziri'eel, Ermiyaas, Hodaawaayii fi Iyyoodi'eeliin fa'a turan; isaan kunniin worra jajjabaa beekkamtoota bulchoota abboota ufii turan.

Baniin Gosa Lamaa fi Wodhakkaan Worri Gara Baya Biiftu'uutiin Jiru fudhataman

²⁵ Isaan waaqa abboota ufii yakkan; waaqolee ormaa ka Rabbi isaan afo'oo balleesseen seebaran.

²⁶ Kanaafuu Waandhi Israa'elii mootii Asoorii Telgeltelfelsooriin isaanitti kaasee biyya isaanii akka qabatu godhe; akka kanaan Telgeltelfelsoor gosa Minaase'ee wodhakkaa booji'ee fuudhee Bahaalaahii, Buhaaboorii fi Bahaaraa akkasuma ladda laga Goozaanii akka jiraatan godhe, haga adhaa achi jiraata'aaran.