Kitaaba Seena'aa ka 1ffaa 10 - Kitaaba Woyyuu

Mootichi Saa'ol Du'e

¹ Worri Filisxeemii worra Israa'eliitiin wol lolan; worri Israa'elii worra Filisxeemii jalaa dheessan; lola saniin worra Israa'elii baay'ee gaara Gilbo'a'aa irratti fixan.

² Worri Filisxeemii Saa'olii fi ijoollee isaa faanaa deemanii ijoollee dhiiraa sadiin Yoonaataa, Aminaadaabii fi Melkisaa ajjeesan.

³ Lolli Saa'olitti jabaate; mootichi Saa'ol woraana diinaatiin woraannamee guddisee madaaye.

⁴ Saa'ol loltu isa gargaaruun, «Worri hin gadoomne kunniin dhufanii akka natti hin taphanne guraadee kee luqqifadhuu na ajjeesi» jedheen; loltuun isa gargaaru sun garuu sodaatee dide; Saa'ol Yoma san guraadee ufii luqqifatee lafatti dhaabee itti dirme.

⁵ Loltuun isa gargaaru akka Saa'ol du'e haga arge innillee guraadee ufii luqqifatee lafatti dhaabee akkuma Saa'olii itti dirmee du'e.

⁶ Kanaaf Saa'olii fi ijoolleen isaa ta dhiiraa Sadiinuu hennaa tokko dhuman; mootummaan Saa'oliillee achumatti dhaabate.

⁷ Worri Israa'elii ka dhooqa keessa jiran akkuma dheessaniin akka Saa'olii fi ijoolleen isaa ta dhiiraa sadiin dhumte haga argan qachaa ufii dhiisanii baqatan; worri Filisxeemii garuu dhufanii qachaa isaanii san qabatan.

⁸ Bariisaa lolaa san worri Filisxeemii worra du'an waan isaan qaban maraa irraa hiikkachu'uuf hennaa dhufan reeffa Saa'oliitii fi reeffa ijoollee isaa ka gaara Gilbo'a'aa irratti kufeeru argan.

⁹ Morma Saa'olii muranii haga meeshaa lolaa irraa hiikkataniin maayessa worra dhaamsa geessanitti kennanii gammachuu ufii waaqa tolfamaa ufiitii fi banii ufiititti akka himan isaan ergan.

¹⁰ Meeshaa lolaa ka Saa'olii ka fuudhan mana waaqa tolfamaa ufii keessa kaayan; mataa isaa mana waaqa tolfamaa daagoon jedhamuu keessatti fannisan.

¹¹ Baniin Iyyaabisii ka biyya Gala'aadii haga worri Filisxeemii waan Saa'oliin irratti godhan dhagayan,

¹² namoonni jajjabaan dhaqanii reeffa Saa'oliitii fi ka ijoollee isaa gara biyya Iyyaabisii fidanii haga qilxuu jalatti awwaalaniin maayessa guyyaa torba guutuu Sooman.

¹³ Akka kanatti Saa'ol waan cubbuu hojjatee fi waan jecha Rabbiitiif ajajamuu dideef du'e.

¹⁴ Inni garuu mortuu ekeraa waamu gaafate malee Rabbiin hin gaafanne; kanaaf Rabbi isa ajjeesee mootummaa isaa ilma Isseyii Daawitii dabarsee kenne.