Yohana 19 - Kishambala New Testament 2005

Yesu atowiγwa afyulilwa.

^1-2 Ne Pilato ahomγuwa Yesu, azamtowa. Waja washilikali wazaluka bundu ja miwa, wazajimubadika mwe mutwi, tikibinda wazamzwika guni ja kizumbe,

³ wazamwizila angwe: Mpongezi, zumbe ywa Wayuda! Wakibinda wazamtowa vibao.

⁴ Pilato azalawa vituhu na uko se, azawati: Olelai! Namlavya na kunu se kwenyu, kangwe mtaile kuti: Sina masa, niyoona kwakwe.

⁵ Yesu azalawila na kuja se aizwikile jiya bundu ja miwa na jiya guni ja kizumbe. Awati: Shuyu muntungwa!

⁶ Wavikizi wakulu na wafunguwo wawe wakimwona wazakema angwe: Mkontele mwe muti! Mkontele mwe muti! Pilato awati: Mγuwei inywi, mkamkontele mwe muti! Hambu imi siona masa yakwe.

⁷ Wayuda wazamlandula: Ishwi tina kitigo chetu, kwa ichi kitigo shuti akoṅwe, hambu azakiγalusha ṅwana Mulungu.

⁸ Pilato akiiva inu mbuli azaisiiza kubulwa ni woγa,

⁹ azaingila vituhu bomani, azamwuza Yesu: U ywa hi? Miya Yesu nkamlandule hata.

¹⁰ Pilato azamγamba: Nkunilandula? Nkutaila kuti: Nina ufuṅwa wa kukushungula, kangi wa kukukontela mwe muti?

¹¹ Angwe ni Yesu: Anga nkuna ufuṅwa wa kunilaha, ati nkuuinkiγwe uko ulanga. Kwa ivyoho yuja aniinkileye na kwako ana masa yekula kuzinka yako.

¹² Ne Pilato aholonda, ndivyo amshungule. Miya Wayuda wazakema angwe: Ati watamshungula uyu, nkukundwa ni Kaiza.

¹³ Pilato akiiva izi mbuli azamlavya Yesu na chengoi, azahita kwa ikala he kiti cha lahila masa hantu heitangwa Lukontelo lwa mawe, Kiebuleyo ndiho Gabata.

¹⁴ Miya ne mushi wa kuliγanya Pasa saa mtandatu. Awaγamba Wayuda: Shuyu zumbe ywenyu!

¹⁵ Waja wazakema angwe: Mwushe! Mwushe, umkontele mwe muti! Pilato awati: Nimkontele zumbe ywenyu mwe muti? Wavikizi wakulu wazalandula: Nkatina zumbe kushima Kaiza.

¹⁶ Ne ahomwinkila na kwawe, kangwe akontelwe mwe muti. Wazamγuwa Yesu, wazamwiγala.

Yesu akontelwa mwe muti. 17-30.

¹⁷ Azainula ṅwenye muti wakwe wa kukomelwa, azahita na haja hantu heitangwa He mazutwi, Kiebuleyo ndiho Gologota.

¹⁸ Haja wazamkontela mwe muti haṅwe na watuhu waili, muṅwe kulume, muṅwe kumosho, Yesu gati.

¹⁹ Pilato azagonda kabala, azakaika mwe uja muti, kaigondiγwe: Yesu ywa Nazaleti, zumbe ywa Wayuda.

²⁰ Unu ugonde Wayuda wangi wazaufyoma, hambu haja hantu, Yesu akontelweho mwe muti, ni hehi na kaya, kangi ugondiγwe Kiebuleyo, Kiloma, Kigiliki.

²¹ Wavikizi wakulu wa Wayuda wazamγamba Pilato: Ushegonde: Zumbe ywa Wayuda, ugonde, kuti yuja azalonga: Imi ni zumbe ywa Wayuda!

²² Angwe ni Pilato: Nigondilevyo ne nizabinda.

²³ Waja washilikali wakibinda kumkontela Yesu mwe muti wazaγuwa shuke zakwe, wazazilavya mafungu mane, kila mshilikaii fungu iṅwe, kuzashiγala nkazu yakwe; miya ija nkazu nkaina lushumo kuandiila ulanga mpaka shi, yoshe ngima nkaina.

²⁴ Wazaγambilana: Tisheipange! Miya tiitowele lusolo, ati neiγaluke ya ndai! Kangwe ugondengwa ubontoke uja wa kuγamba: Wazapangilana shuke zangu, nkazu yangu wazaitowela lusolo. Ne waja washilikali waγosholevyo.

Yesu alongilevyo akiholela mwe muti.

²⁵ Haja he muti haiγoloke nine ja Yesu na nduγuye ja nine mweitangwa Maliya, mkaza Kalofa, na Maliya Magadalene.

²⁶ Yesu akimwona nine na yuja mhina, ayemkundisha, aiγoloke haho, amγamba nine: Mlala, ṅwanao shuyu!

²⁷ Vikibinda azamγamba yuja mhina: Nyokwe shuyu! Haho ne yuja mhina ahomγuwa na kwakwe.

²⁸ Vikibinda Yesu akitaila, kuti vyoshe vizabontoka, kangwe ugondengwa uhontoke, aγamba: Nina nkilu.

²⁹ Kuna iγa jiikiγwejo, jiimemile mazi yenyeγela. Wazaγuwa fuli, wazajigisa yaja mazi yenyeγela wazajitunga mwe lasi, wazajikweza na kwe kanwa chakwe.

³⁰ Yesu akiγuwa yaja mazi yenyeγela azaγamba: Vizabontoka. Ne ahoinamya mutwi, azadwika moyo.

Yesu azalungwa he lubazu. 31-38.

³¹ Kwa kuti ni mushi wa kuliγanya Pasa kangi nyemi ya ija sabato ni nkulu, kangwe viya vimba visheikale mwe miti mushi wa sabato, Wayuda wazamhembeleza Pilato, wahondwe viγa, wadaheushiγwa.

³² Washilikali wazaiza, yuja ywa bosi wazamubonda viγa, hata yuja mtuhu akomiγweye haṅwe naye.

³³ Wakibula kwa Yesu, wakiona, kuti aibindile kufa, nkawamuhondile viγa,

³⁴ miya mshilikali muṅwe azamtunga na guha lie luhazu, viya du lushe mzalawa mpome na mazi.

³⁵ Yuja avieneye azalonga uwona, kangi uwona wakwe ni wa kweli, yuja ataila, kuti alonga vye kweli, kangwe hata inywi mtozeshe.

³⁶ Ivi vizaγosholwa, kangwe ugondengwa ubontoke uja wa kuγamba: Nkezeahondwe vuha!

³⁷ Vituhu ugonde utuhu waγamba: Newamwone, wamshomileye!

Yesu azikwa. 38-42.

³⁸ Yosefu ywa Alimatiya, ndiye ai mhina ywa Yesu, miya aivifishize kwa mbuli ya woγa na Wayuda, viya vikibontoka, azamhembeleza Pilato, amshungule kusheleza kimba cha Yesu. Pilato azamkundiza. Azahita, azasheleza chiya kimba chakwe.

³⁹ Nikodemo yohena azaiza, ni yuja ahitaye kwakwe kale na kilo, azaleta mafutilo ya mluziluzi yavanganyiγweyo na luza, ni ya shilingi magana maili.

⁴⁰ Wazaγuwa kimba cha Yesu, wazachikanta na shuke zeṅala, waimshishize yaja mafutilo, sa Wayuda wavyozwela kuzika.

⁴¹ Haja hantu akontelweho mwe muti hana mγunda, mwe uja mγunda muna mbila mpya, mushilelemo muntu hata kale.

⁴² Kwa kuti uja mushi Wayuda wakiteγa kwe mviko wa Pasa, wazamwika Yesu muja, hambu ija mbila i hehi.