Yohana 18 - Kishambala New Testament 2005

Yesu agwilwa.

¹ Yesu akibinda kulonga izi mbuli azakulawa haṅwe na wahina wakwe, azahita na sheja jiya ja kazuto ka Kidoloni, hana mγunda haho, ne aingileho naho na wahina wakwe.

² Yuja Yuda mweunga kumwinkila yohe aahataila haja hantu, hambu Yesu haja azahaunganana kangi muno na wahina wakwe.

³ Yuja Yuda azaγuwa bumba ja washilikali na wafunguwo wa wavikizi wakulu na wa Mafaliseyo, waiza haja, waitozize taa na maγala ya moto haṅwe na mata.

⁴ Yesu kwa viya, avyotaila vyoshe, ndivyo vimubwile, azalawila, azawati: Mumlonda ndai?

⁵ Angwe: Yesu ywa Nazaleti. Azawati: Ni miyo. Hata yuja Yuda mwemwinkila aiγoloke haṅwe nawo.

⁶ Akiwati: Ni miyo, wazauya na nyuma, wazakina na shi.

⁷ Azawauza vituhu: Mumlonda ndai? Angwe: Yesu ywa Nazaleti.

⁸ Angwe ni Yesu: Nizamiγambila kuti: Ni miyo. Ati munilonda imi, lekai awa, wahite!

⁹ Kangwe ibontoke ija mbuli, alongileyo kuti: Waja, uninkilewo, sina ṅwiyae ywawe niazizeye.

¹⁰ Simoni Petelo ne aina shime, azaisholola, azatowa nayo mupuna ywa mvikizi mkulu, azamshenga shikilo ja kulume, jizadwika; yuja mupuna zina jakwe ndiye Maliko.

¹¹ Yesu azamγamba Petelo: Uza shime na mwe luwo! Kinyweio, Tate aninkilecho, nishechinywe?

Yesu aiγalwa kwa wavikizi wakulu. 12-27.

¹² Waja washilikali na mγolokezi ywawe na waja wafunguwo wa Kiyuda wazamgwila Yesu, wazamshunga.

¹³ Wazamwiγala bosi kwa Ana; ni mkwee ja Kayafa, uyu ne mvikizi mkulu jiya vuli.

¹⁴ Miya Kayafa ni yuja alongileye Wayuda kuti: Vyaagiza, muntu muṅwe akifa kwa mbuli ya mbalingwa.

Petelo amtowa Yesu hulu.

¹⁵ Simoni Petelo na mhina mtuhu wazamtongela Yesu; yuja mhina aatailana na mvikizi mkulu, azaingila haṅwe na Yesu na muja chengoi mwa mvikizi mkulu.

¹⁶ Miya Petelo azaγoloka haja se he nkili. Yuja mhina mtuhu mwetailana na mvikizi mkulu azalawa, azalonga na muluγojo ywa nkili ywa kindele, azamwingiza Petelo

¹⁷ Yuja mndele mweγoja nkili azamγamba Petelo: Kumbe iwe nawe nku mhina ywa yuja muntu? Angwe ndiye: Si miyo.

¹⁸ Wapuna na wafunguwo waiγoloke haho waiashize moto, kwa kuti kuna mpeho, wazauotela. Petelo yohena aiγoloke nawo akiotela moto.

¹⁹ Yuja mvikizi mkulu azamwuza Yesu kwa mbuli ya wahina wakwe na ya mifuzize yakwe.

²⁰ Yesu azamlandula: Imi nizalonga cha sale kunu shi; imi mishi yoshe nizafuza vikiloi na mwe vikilongwa, Wayuda woshe wamoungananilana, sina mbuli, nilongileyo na kufishafisha. Uniuza ywai?

²¹ Uza waja waivilewo, niwalongilevyo! Oleia! Waja ne wetaila, imi nilongilevyo.

²² Akilonga ivyoho, kuna mfunguwo aγolokeye nkandai azamtowa Yesu kibao angwe: Ne uvyomlandula mvikizi mkulu?

²³ Yesu azamlandula: Ati nizalonga vibada, vibunkule, kuti ni vibada! Ati nizalonga vitana, unitowelai?

²⁴ Ana azamtuma kwa mvikizi mkulu, aishungiγwe.

²⁵ Simoni Petelo aiγoloke haho akiotela moto; wazamuti: Kumbe iwe nawe u mhina ywakwe?

²⁶ Yuja azakela nkani angwe: Si miyo. Waja wapuna wa mvikizi mkulu ṅwiyae ywawe muṅwe, ni mnduγu ywa yuja, Petelo amshengileye shikilo, amuti: Imi sikuene kuja kwe mγunda, wina naye?

²⁷ Petelo azakela nkani vituhu, ne soγolo ihokema viya du lushe.

Yesu alongwa masa kwa Pilato. 28—19,5.

²⁸ Wazamlavya Yesu kwa Kayafa, wazamwiγala bomani; miya ne kui makelokelo. Kangi wenye nkawaingile bomani, kangwe washeγuwe kisitama, wadaheja ngoto ya Pasa.

²⁹ Pilato azawalawila angwe: Uyu muntu mumfyalima mbwai?

³⁰ Wazamhitula angwe: Ati uyu so mhambanyi, tangashemwinkila na kwako.

³¹ Pilato azawati: Mγuwei inywi, mkamlahe kwa vitigo vyenyu! Wayuda wazamuti: Ishwi nkatishungulwe kumkoma muntu.

³² Kangwe ibontoke ija mbuli ya Yesu, alongileyo akiwaonyesha mifiile, ndiyo afe.

³³ Pilato azaingila vituhu bomani; azamwitanga Yesu, azamuti: Iwe u zumbe ywa Wayuda?

³⁴ Angwe ni Yesu: Ulonga ivyoho kwa mbuli yako ṅwenye, hambu watuhu watekuγambila mbuli zangu?

³⁵ Pilato azalandula: Imi ni Muyuda? Waja wa mbali yako na wavikizi wakulu wazakuinkila na kwangu. Ubanilei?

³⁶ Angwe ni Yesu: Uzumbe wangu nkauanduka na kunu shi; ati uzumbe wangu uanduka na kunu shi, anga waluγojo wangu wazaomana nkondo, nisheinkilwe kwa Wayuda, miya lushe uzumbe wangu nkauanduka na kunu.

³⁷ Pilato azamuti: Lushe iwe u zumbe zeze? Angwe ni Yesu: Uzalonga, kuti ni zumbe. Imi ne nivyelwevyo, ne niizilevyo mwe inu shi, nilongele vye kweli uwona. Kangi kila muntu mweanduka mwe kweli aiva kanwa changu.

³⁸ Pilato amuti: Vye kweli ni mbwai? Akilonga ivyoho azalawila Wayuda vituhu, azawati: Imi sina masa, nieneyo kwakwe.

³⁹ Miya kuna msimo, mishi ya Pasa niyakamishungwila muntu muṅwe. Mwakunda, nimishungwile zumbe ywa Wayuda?

⁴⁰ Wazakema vituhu angwe: Uyu do! Timkunda Balaba! Miya yuja Balaba ni mumpoko.