Yohana 17 - Kishambala New Testament 2005

Mviko wa kivikizi.

¹ Yesu akibinda kulonga ziya mbuli azaoleza mesho yakwe na kwe lwingu, azalonga: Tate, haja hantu hazabula; mgimbike ṅwanawo, kangwe ṅwanawo yohe akugimbike!

² Sa viyaho umunkilevyo ufuṅwa wa vyoshe vye moyo, kangwe viya vyoshe, umunkilevyo, aviinke nkalamo ya kale na kale!

³ Inu ni nkalamo ya kale na kale wakikutaila, kuti u Mulungu ike, kangi wakimtaila yuja, anitumileye, kuti ndiye Yesu Kilisito.

⁴ Nizakugimbika kunu shi, nizabontola ija ndima, uninkileyo, niibontole.

⁵ Lushe iwe Tate, nigimbika, niikale kwako na uja utana, ndiwo niina nawo kwako, ngulu ngima ishizati itulwe!

⁶ Zina jako nizajiwafumbwila waja wantu, uninkilewo kunu shi; ne wai wako, imi utewaninka, mbuli yako wazaiγolokela.

⁷ Lushe wazataila kuti: Vyoshe uninkilevyo, vianduka kwako.

⁸ Hambu ziya mbuli, uninkilezo, nizaziwainka, wazazihokela, wazataila kweli, kuti nilawile kwako, wazatozesha, kuti iwe uzanituma.

⁹ Imi nawahembelezeza, sihembelezeza inu shi, miya waja, uninkilewo, hambu ni wako.

¹⁰ Vyangu vyoshe ni vyako, kangi vyako ni vyangu, kangi niigimbikwe ndiwo.

¹¹ Imi lushe simo mwe inu shi, miya waja wake mumu, imi naiza na kwako. Tate mṅazi, uwaγolokele waikale na zina jako, uninkilejo, kangwe waγaluke muṅwe, sa ishwi tivyo muṅwe!

¹² Aho ndiho nikiikala nawo, nizawaγolokela, waikale na zina jako, uninkilejo, nizawaγoja, nkakuna ṅwiyae ywawe aaγileye kushima ṅwanangwa ywa mubaniko, kangwe ugondengwa ubontoke.

¹³ Lushe naiza na kwako, kangi nilonga ivyoho inu shi, kangwe nyemi yangu waikale nayo, waigise.

¹⁴ Imi nizawainka mbuli yako, kangi inu shi yawashuka, kwa kuti nkawaanduka kunu shi, sa imi nishivyoanduka kunu shi.

¹⁵ Sikuhembeleza, uwaushe mwe inu shi, miya uwaγolokele, yuja mubada ashewadahe.

¹⁶ Kunu shi nkawakuanduka, sa imi nishivyoanduka kunu shi.

¹⁷ Uwaṅaze, watende wakweli! Mbuli yako ni ya kweli.

¹⁸ Sa unitumilevyo mwe inu shi, vivyoho nizawatuma mwe inu shi.

¹⁹ Kwa mbuli yawe nakiṅaza ṅwenye, kangwe waikale, waiṅaziγwe ni viya vye kweli.

²⁰ Miya siwahembelezeza awa du, miya hata waja, ndiwo wanitozeshe wakibilikilwa ndiwo,

²¹ kangwe woshe waγaluke muṅwe, sa iwe Tate uvyoikala na imi, nami nivyoikala na iwe, kangwe wohe waikale na ishwi, kangwe inu shi itozeshe, kuti uzanituma!

²² Nami uja utana, uninkilewo, nizauwainka, waγaluke muṅwe, sa ishwi tivyo muṅwe.

²³ Imi naikala nawo, nawe waikala na imi, kangwe mbuli yawe ibontoke, wakiγaluka muṅwe kweli, kuti uzawakundisha, sa unikundishevyo imi.

²⁴ Tate, nakunda, waja uninkilewo, wohe waikale haṅwe na imi haja, niliho, kangwe waone utana wangu, uninkilewo, hambu uzanikundisha, ngulu ngima ishizati itulwe.

²⁵ Tate mtanda, walaha masa yeagiza, inu shi nkaikutaile, imi nizakutaila, awawohewazataila, kuti uzanituma.

²⁶ Nizawaonyesha viya vya zina jako, kangi neniwaonyeshe vivyoho, kangwe luja lukundisho, unikundishelo nalo, luikale nawo, nami niikale nawo.