Waloma 4 - Kishambala New Testament 2005

Abulahamu ainkwa utanda kwa kutozesha kwakwe.

¹ Lushe tiγambe ze, kuti Abulahamu, yuja mkale ywetu ywa kimuntu, aonele mbwai?

² Hambu ati Abulahamu azainkwa utanda na miγoshwele yakwe, kweli adaha kukitogola, miya nkadaha kukitogola kwa Mulungu.

³ Hambu baluwangwa iγambai? Yaγamba: Abulahamu azamtozesha Mulungu, ne avyotalilwa utanda.

⁴ Miya mndima nkatalilwa tuvo jakwe kimbazi, miya kimaliho;

⁵ kangi ashiye mndima, ati amtozesha yuja mwekanila wemubela Mulungu, Inu mitozesheze yakwe aitalilwa utanda.

⁶ Sa Dawidi avyolonga: Mwe nyemi ni muntu, Mulungu ayemtala utanda, hata akishebontola mulomongwa;

⁷ hambu aγamba: We nyemi ni waja weinulilwa ubaγibaγi, weγubikilwa uhuza.

⁸ Mwe nyemi ni muntu, Zumbe ashimtazileye masa!

⁹ Inu nyemi itala washengiγwewo du, hambu hata washishengiγwewo? Hambu taγamba: Abulahamu mitozesheze yakwe azaitalilwa utanda.

¹⁰ Aitazilwe zeze? Aho aishengiγwe, hambu ashizati ashengwe? Ne aishizati ashengwe, ake vivyoho.

¹¹ Lwitangilo lwa kushengwa azaluγuwa, viya ni guha ja uja utanda, awona nawo haja akitozesha, ashizati ashengwe, kuunga aγaluke baba ywa waja woshe wegomba kutozesha kishikushengwa, kangwe watalwe utanda.

¹² Kangi awaγalukila baba ywa kushengwa waja washiwofa kushengwa du, wetongela mitozesheze ya baba yweshu Abulahamu, ndiyo akianga nayo, ashizati ashengwe.

¹³ Hambu mulomongwa siwo umuletelewo Abulahamu ao mbeleko yakwe uja mushi, kuti ṅwenye ni mupazi ywa inu shi, miya ni uwo utanda weanduka mwe kutozesha kwakwe.

¹⁴ Hambu ati waja wekihima mulomongwa ni wapazi, anga kuja kutozesha ni kwa bule, anga uja msuhi ni wa ulongo,

¹⁵ kwa kuti mulomo wakweza maya, kangi hashiho mulomo, hata kuzinkana na mulomo nkakuho.

¹⁶ Kwa inu mbuli kupala kimbazi waja wetozesha, kangwe uja msuhi ubontokele wanae woshe, so waja ike wekihima mulomongwa, miya waja wohena wetongela mitozesheze ya Abulahamu; uyu ne ishe ywa ishwi toshe kwa viya vyagondwavyo kuγamba:

¹⁷ Nizakuγalusha ishe ja mbali nyingi; uyu ne akimtozesha Mulungu mweuza wafilewo moyo, mweitanga vishivyo haho, viya vi haho.

¹⁸ Hashiho kialilo uyu ne akitozesha kialilo chakwe vivyoho, kangwe aγaluke ishe ja mbali nyingi, kwa viya alongwavyo kuti: Ne mbeleko yako ndivyo itende.

¹⁹ Kangi nkavimkizile kutozesha, hata akiolela ṅwili wakwe, kuti uifile, hambu ne aibindile mavuli gana, hata ṅwili wa muke Sala akiuolela, kuti uifile vivyoho,

²⁰ miya uja msuhi wa Mulungu nkaaγilwe ndiwo na kuukalakasha, miya azakihima nguvu ya kutozesha akimgimbika Mulungu,

²¹ akitailisha kuti: Viya alongilevyo, hata kuvibontola adaha.

²² Ne vihozaleka, akitalwa utanda.

²³ Ivi nkavigondiγwe kwa mbuli yakwe ike, kuti azatalwa ivyoho,

²⁴ miya vigondiγwe hata kwa mbuli ya ishwi teunga kutalwa ivyoho, temtozesha yuja amfufuleye Yesu, Zumbe ywetu, kwa wafilewo,

²⁵ ndiye akiinkilwa kwa mbuli ya mabano yetu, kangi ndiye akifufulwa kwa mbuli ya utanda wetu.