Wagalatiya 3 - Kishambala New Testament 2005

Mpehongwa muntu ainkwa akitozesha.

¹ Inywi Wagalatiya, mu wadashi! Mdahiγwe ni uγanga ani? Muzamwonyeshiγwa Yesu Kilisito, mumwone na mesho yenyu, avyokontelwa mwe muti.

² Inu mbuli ṅwenga nakunda, mwiniγambile: Mpehongwa mwihokele, kwa kuti mzaγoshola mulomongwa, hambu kwa kuti mzatozesha mwivilevyo? Lushe mtendile zeze ubabashi?

³ Mwandiile kimpeho, kangwe mubontole kimuntu?

⁴ Viya vyoshe muvilumiziγwe bule du? Kangi so vya hule du!

⁵ Lushe yuja akiminka mpeho, akitenda nguvu kwenyu, ni kwa kuti mwaγoshola mulomongwa, hambu kwa kuti mwatozesha mwivilevyo?

Abulahamu ainkwa ulanda kwa kuti azatozesha.

⁶ Sa viya vya Abulahamu, kuti azatozesha avyolongwa ni Mulungu, ne vilekilevyo, akivitalilwa utanda.

⁷ Tailai lushe kuti: Wetozesha ne wana Abulahamu!

⁸ Ugondengwa iṅviene kale kuti: Mulungu ainka wamzimu utanda kwa mitozesheze yawe, ne vilekilevyo, akimγambila Abulahamu kale unu ulau wedi wa kuγamba: Mwako zitazaṅazwa mesho mbali zoshe.

⁹ Kwa inu mbuli wetozesha waṅazwa mesho haṅwe na Abulahamu atozeshaye;

¹⁰ hambu woshe wehimila kuγoshola mulomongwa waketoziγwa ni kilano, hambu kuigondiγwe: Muntu, ndiye asheange na vyoshe vigondiγwevyo mwe baluwa ya milomongwa na kuviγoshola ailaniγwe.

¹¹ Kangi vyatailikana kuti: Muntu nkainkwa utanda kwa Mulungu, kwa kuγamba azaanga na mulomongwa, hambu kuigondiγwe: Mtanda nezeatende nkalamo na kutozesha kwakwe.

¹² Miya mulomongwa nkauanduka na kutozesha, hambu kuigondiγwe: Mweviγoshola, nezeatende nkalamo navyo.

¹³ Kilisito azatikombola mwe kilano cha mulomongwa akilanwa kwa mbuli ya ishwi, hambu kuigondiγwe: Kila muntu mweheleziγwa mwe muti ailaniγwe.

¹⁴ Kwa ivyoho mṅazo wa mesho wa Abulahamu uzahita kwa wamzimu aho, Yesu Kilisito akilawila, kangwe tihokele na kutozesha uja msuhi wa mpehongwa.

Msuhi wa mlomongwa.

¹⁵ Wanduγu, nenilonge kimuntu: Kilaγa cha kifu cha muntu chikibinda kulongwa cha sale, nkakuna mwechiusha ao du mwebadika mbuli.

¹⁶ Lushe ija misuhi ilongiγwe kwa Abulahamu na kwe mbeleko yakwe. Nkavilongwa: Mbeleko zakwe viya ni nyingi, miya viya ni ṅwenga du, kulongwa: Mbeleko yako; ni uyu Kilisito.

¹⁷ Lushe naγamba: Ichi kilaγa chilongole kuikwa ni Mulungu, mulomongwa ulawile nyuma, mavuli magana mane na milongo mitatu yakizinka;

¹⁸ lushe nkaudaha kuusha icho kilaγa, kangi nkaudaha kubana uja msuhi. Hambu ati upazi uanduka mwe mulomongwa, nkauanduka mwe uwo msuhi, kangi Mulungu azamfila Abulahamu mbazi nawo akimunka msuhi.

¹⁹ Lushe mulomongwa bontokelo jakwe ni mbwai? Ugezilwe kwa mbuli ya mabano, mpaka ndiho kulawile ija mbeleko yetalwa ni uja msuhi; uwo mulomongwa ulaviliziγwe ni walau, kangi una mulongezi;

²⁰ miya mulongezi so ywa muṅwe du, miya Mulungu ni muṅwe.

²¹ Lushe mulomongwa nkauivana na misuhi ya Mulungu? Sivyo! Hambu ati kuzalawa mulomo wedahainka nkalamo, anga utanda uanduka kweli mwe mulomongwa;

²² miya lushe uwo ugonde uzagwiza woshe na kwe uhuza, kangwe kumtozesha Yesu Kilisito kuleke, waja wetozesha wainkwe uwo msuhi.

²³ Miya tishizati titozeshe, tizaγojeziγwa, tiitikemulomongwa, kangi tiiikilwe mtozesho, ndiwo ufumbulwe.

²⁴ Ne mulomongwa utuzilevyo milahile yetiiγala kwa Kilisito, kangwe tiinkwe utanda na kutozesha.

²⁵ Lushe tivyotozesha nketikelahiγwa sa viyaho;

²⁶ hambu nyoshe mu wana Mulungu, kwa kuti mwamtozesha Yesu Kilisito,

²⁷ hambu nyoshe mubatizwewo mwe Kilisito muzamzwika Kilisito.

²⁸ Nkakuna Muyuda na Mgiliki, nkakuna mtuṅwa na ṅwana vyale, nkakuna mγoshi na mvyele, hambu nyoshe mu muṅwe, kwa kuti muna Kilisito Yesu.

²⁹ Ati inywi mu wa Kilisito, lushe mu mbeleko ya Abulahamu, kangi mu wapazi, sa msuhi uikiγwevyo.