Waebuleyo 9 - Kishambala New Testament 2005

Mivikile ya kale ishiyobontoka.

¹ Chiya cha bosi ne chiina mivikile yakwe, kangi vikilo ja kiinushi.

² Hambu kuzakontelwa hema ja ingiila, ne mwina taa na meza na migate ya ntogolo; ne ndimo mkiitangwa haṅazi.

³ Cha ndai he jiya shuke ja gatigati ne mwina hema jeitangwa haṅazi ṅwenye;

⁴ umo ne mwina kiokelo cha uvumba, ni cha zahabu du, na kibweta cha kilaγa chiγubikwecho koshe koshe na zahabu, china kaziγa ka zahabu kena mana, kangi china ngodangwa ya Aloni,

⁵ ndiyo ikishuka, na vibala vya milomongwa. Ulanga chiiγubikwe ni Makelubi ya utana, yaifunamile jiya hozezo; izi mbuli nkalishindazilonga

⁶ ivi lushe ṅwenga ṅwenga. Ivi vyoshe vikibinda kuhembiγwa, mwe chiya chumba cha bosi wavikizi

⁷ wakamwingila mishi yoshe wakibasha miviko. Miya mwe chiya cha mbili mwingila kila vuli kaṅwe du mvikizi mkulu ike; kangiyohe nkaingila aishina mpome, ayoiγala kwa kihozeza ṅwenye na kwa hozeza viya, wantu wabanilevyo na kushetaila.

⁸ Ivyoho Mpeho mṅazi ationyesha kuti: Sila yetiiγala haṅazi nkaizati itulwe mishi ija, kukeγoloke jiya hema ja bosi.

⁹ Ijo ne jii fanyanyi ya mishi inu ya ivi lushe; umo ndai Mulungu ne akiiγailwa matulongwa na ṅombe za mviko zishizodaha kumunka yuja mwezilavya moyo weivana na Mulungu.

¹⁰ Hambu kusheja na kushenywa na kukihaka kangi muno ni utanda wa ṅwili du ushimikwewo, mpaka mishi ya kuzifya ibule.

Mpome ya Kilisito yahonya myoyo.

¹¹ Miya Kilisito azaiza, aγaluke mvikizi ywa viya vitana, ndivyo vilawile, azaingila mwe hema jishiγosholwejo na mikono ya wantu, jekula, kangi jetamisha kuzinka jiya, kwa kuti nkajianduka kunu shi.

¹² Kangi nkaingile na mpome ya fulata ao ya ndama, miya aingile haṅazi ako kaṅwe na mpome yakwe ṅwenye, ne avyotionela mpoza ya mikalamo yoshe.

¹³ Hambu mpome ya fulata na ya nkambaku na zelu jiokiγwejo ja moli yelungulika, ndijo jikimyaγilwa waja wena kisitama, vikibinda kuwahoza, kisitama cha mili chiuke,

¹⁴ lushe mpome ya Kilisito isheisiize kuhoza myoyo yelu? Hambu ne yeleka, titowe hulu izo mbuli zekoma, timtumikile Mulungu mwe moyo.

¹⁵ Hambu kilisito azakiγalusha ṅombe ya mviko ya Mulungu, ishiyo masa, kwa nguvu ya mpeho ya ukalami. Ne vilekilevyo, akitiletela kilaγa kihya, kangwe waja waitangwawo wainkwe msuhi wa upazi wekalama, kwa kuti kufa kuzaoneka kwekombola mwe ayo masa yabaniγweyo mishi ya kilaγa cha bosi.

¹⁶ Hambu hena kilaγa cha ufa, shuti yuja achiinkileye anefa.

¹⁷ Hambu kilaγa cha ufa chibontoka, waja wenye wakibinda kufa, miya nkachina bontokelo hata, yuja achiikileye ake moyo.

¹⁸ Ne vilekilevyo, hata chiya cha bosi chikisheshimikwa kishimpome.

¹⁹ Hambu Mose akibinda kubilikila milaγilizo yoshe ya mulomongwa, wantu woshe wakiiva, azaγuwa mpome ya ndama na ya fulata, akibinda azaγuwa mazi na upamba welungulika na huto, azamyaγila icho kitabu ṅwenye na wantu woshe mpome angwe:

²⁰ Shinu mpome ya kilaγa, Mulungu alaγilizecho kwa mbuli ya inywi! Vivyoho hata

²¹ jiya hemangwa na ntanu zoshe za bindila mviko azazimyaγila mpome.

²² Kangi kwa uwo mulomongwa vyoshe vye kisitama vyahoziγwa na mpome; hashihoitilwa mpome, uhuza nkauhaushiγwa.

Mpoza yebontola kamkaṅwe.

²³ Ivyoho vyefanana na viya vya kilwingu shuti vihoziγwe ivyoho; miya viya vya kilwingu ṅwenye shuti vihoziγwe na mpoza zezinka, zena nguvu kuzinka ziya.

²⁴ Kangi Kilisito nkaingile haṅazi haγosholweho na mikono, hefanana du na haja ha kweli, miya aingile mwe lwingu ṅwenye, kangwe ivi lushe alawile cheni cha Mulungu kwa mbuli ya ishwi.

²⁵ Vikibinda nkatekiinkila kangi, sa yuja mvikizi mkulu avyokaingila haṅazi kila vuli na mpome ishiyo yakwe; anga vizamtala kulumizwa kangi muno,

²⁶ kuandiila aho, shi iumbiγweho. Miya lushe mishi ikitimiza, azalawila kaṅwe du, abinde masa na kukiinkila ṅwenye.

²⁷ Sa vivyotala wantu, wafe kaṅwe, wakibinda, walahwe,

²⁸ vivyoho hata Kilisito azainkilwa kaṅwe, aushe uhuza wa wangi; miya ka mbili atazalawila kishiuhuza waja wemwafiza, awavunile.