Waebuleyo 1 - Kishambala New Testament 2005

Yesu ni ṅwana Mulungu kangi ni mkulu kuzinka walau.

¹ Wahaba zetu Mulungu azawalonga kale kangi muno na milongele mingi ya vyanwa vya wateγanyi.

² Mishi inu ya kushilikiza azatilonga ishwi na kanwa cha ṅwanae; nyu azamgimbika, apale vyakwe vyoshe, kangi ndiye aumbileye naye ngulu ngima.

³ Uyu atilangazishiza utana wakwe, kangi a vivyoho, sa ṅwenye alivyo, vituhu vyoshe avitoγesha na mbuli yakwe ye nguvu, akibinda kutihozeza mabano azahita kwa ikala kulume kwa ṅwenye nguvu uko ulanga.

⁴ Azakulisha kuzinka walau kwa viya, ainkiγwevyo zina jewazinka. Hambu ni mlau ani, Mulungu amlongaye:

⁵ Iwe u ṅwanangu, nizakuvyala lelo? Ao akimγamba: Nitamγalukila ishe, yuja neaniγalukile ṅwanangu?

⁶ Kangi aho akimwingiza ṅwanae ywa nteluka mwe inu shi aγamba:

⁷ Walau woshe wa Mulungu nezewamvike L Kwa mbuli ya walau kwaγangwa: Mpeho aziγalusha walau wakwe, mabilibili ya moto ayaγalusha wafunguwo wakwe.

⁸ Miya kwa mbuli ya ṅwanangwa kwaγangwa: Mulungu, kiti chako cha kizumbe chatoγa kale na kale, kangi ngoda ya uzumbe wako ni ngoda yezifya.

⁹ Wakundisha utanda, waihilwa ni ubezi; kwa inu mbuii Mulungu mwe Mulungu ywako azakushisha mavuta kuzinka weyawo.

¹⁰ Hatuhu haγangwa: Iwe Zumbe aho kale uzatula inu shi, kangi lwingu ni ndima ya mikono yako;

¹¹ ivi viyabanika, miya iwe wakalama, ivi vyoshe vitazashakala, viya ni shuke;

¹² utazavihitula, viya ni guni, kangi vitazaγalamuka, viya ni shuke; miya iwe ulivyo, ne ulivyo, mavuli yako nkezeyashile.

¹³ Miya ni mlau ani, amlongaye: Ikala kulume kwangu, mpaka ndiho niike wankulu wako shi he milundi yako?

¹⁴ Awa woshe so mpeho du zemutumikila, zekatuṅwa, ziolele waja, ndiwo nezewapale uhonya?