Ntuṅwa 8 - Kishambala New Testament 2005

Sauli aγulusha Wakilisito.

¹ Sauli azatamilwa ni kukoṅwa kwakwe. Mishi ija bumbangwa je kuja Yelusalemu jizaona nkondo ya kuγulushiγwa, woshe wazaasakana mwe shi za Yudeya na za Samaliya, kushima ntuṅwa.

² Wantu watozeshewo vitana wazamzika Sitefano, wazamubindila ndilo nkulu.

³ Sauli azachakula bumbangwa na kuwabasha mwe nyumba zawe, azahuna waγoshi na wavyele, azawagela mwe chumba. Waja waasakanewo wazaanga na ku

⁴ bilikila mbulingwa.

Filipo abilikila Samaliya.

⁵ Filipo azasheela na mwe muzi wa Samaliya, azawabilikila mbuli ya nyemi ya Kilisito.

⁶ Mabumba makulu yazateγeleza viya vyelongwa ni Filipo na kutenda moyo muṅwe kwa viya, wabilikilevyo, na kwa viya, waenevyo ntangilo, aγosholezo.

⁷ Hambu wangi, ndiwo wakitoziγwa ni mpepo ze usaba, zizawalawa na kukema na vyanwa vikulu, kangi wangi wena pengene na washidahawo kuγenda wazahonyiγwa,

⁸ ne muhogwa nyemi nkulu mwe uja muzi.

Ntoγo za Simoni.

⁹ Muja kaya muna mγoshi, zina jakwe ndiye Simoni, ni mγanga amashizeye wantu woshe wa Samaliya, kangi ṅwenye azalonga kuti: Ni muntu mkulu;

¹⁰ wantu woshe wakulu na wadodo ne wakimteγeleza angwe: Uyu ana nguvu ya Mulungu yeγangwa, kuti ni nkulu.

¹¹ Wazamteγeleza, kwa kuti mishi mingi azawashentusha na uγanga wakwe.

¹² Wakitozesha viya, Filipo abilikilevyo vya nyemi vya uzumbe wa Mulungu na vya zina ja Yesu Kilisito, kuzabatizwa waγoshi na wavyele.

¹³ Yuja Simoni yohena azaandiila kutozesha, azabatizwa, azaanga na Filipo; akiona, ziya ntangilo na ziya nguvu zikiγosholwa, azashentuka.

¹⁴ Ntuṅwa zikiiva uko Yelusalemu kuti: Wasamaliya wazahokela mbuli ya Mulungu, wazamtuma Petelo na Yohana na kwawe.

¹⁵ Awa wakisheela wazawahembelezeza, kangwe wainkwe mpeho ṅazi.

¹⁶ Hambu ne ishizati kuwagweela, hata muṅwe, wabatizwe du na mwe zina ja Zumbe Yesu.

¹⁷ Vikibinda wazawabadikila waja mikono, ne wahoinkwa mpeho ṅazi.

¹⁸ Simoni akiona, kuti mpeho ṅazi yainkilwa, ntuṅwa zikimubadikila muntu mikono, azawaletela feza angwe:

¹⁹ Ninkai nami unu ufuṅwa, kangwe ndiye nimubadikile mikono, ainkwe mpeho ṅazi!

²⁰ Petelo azamlandula angwe: Feza yako ikatabanika haṅwe na iwe! Kwa kuti wafanyanya kuγamba: Mbazi ya Mulungu imotwa na feza!

²¹ Inu mbuli nkuipangilwa, hata kafungu kadodo, hambu Mulungu akiolela moyo wako, nkauγolokela.

²² Lushe hitula moyo wako, uleke unu ubada wako umhembeleze Zumbe, kashokaze inu ntongonyezi ye mwe moyo wako iushiγwe!

²³ Hambu nakuona kuti: Nezeutende vyenyeγela sa nyongo, kuti: Nezeushungwe ni uhambanyi.

²⁴ Simoni azaitikila angwe: Nihembelezezai inywi kwa Zumbe, kangwe viya, mulongilevyo, vishezaniizila!

²⁵ Waja wakibinda kulongela mbuli ya Mulungu uwona wazaγotoka na Yelusalemu, wazabilikila mizi mingi ya Samaliya mbuli za nyemi.

Mfuṅwa ywa Etiyopia abatizwa ni Filipo.

²⁶ Mlau ywa Zumbe azalonga na Filipo, azamuti: Inuka, uhite lwazu lwegwila zuwa mishi ya vuli, utongele sila yelawa Yelusalemu, yesheela Gaza ishigwilwayo ni wantu!

²⁷ Yuja azainuka, azahita. Akiolela azaona mγoshi ywa Kietiyopo, ni mfuṅwa mkulu ywa Zumbe ywa kivyele ywa Waetiyopo mweitangwa Kandake; yuja ni mγolokezi ywa mali yakwe yoshe, aizile Yelusalemu kwa vika;

²⁸ lushe ataγotoka, aiikale mwe gali jakwe akifyoma mbuli ya mteγanyi Yesaya.

²⁹ Mpehongwa izamγamba Filipo: Hita, utimile jiya gali!

³⁰ Filipo azajiγulukila, azaiva, avyofyoma mbuli ya mteγanyi Yesaya, azamuti: Kumbe wataila, uvyofyoma?

³¹ Angwe: Nitaile vivihi, muntu akishenionyesha sila? Azamhimila Filipo, akwele aikale naye.

³² Viya afyomilevyo vya ugondengwa ni ivi: Viya ni ṅwangoto azaiγalwa kwa koṅwa, sa ngoto yetongomaila mleγuzi ywakwe, nkalandule.

³³ Kwa viya akipunguzevyo, masa yakwe yazaushiγwa; ni ndai, ndiye abinde kutala mbeleko yakwe?

³⁴ Hambu ugima wakwe uzaushiγwa kunu shi. Yuja mfuṅwa azamwuza Filipo kuti: Nakuhembeleza, uniγambile: Uyu mteγanyi aiongile mbuli ya ndai? Ni yakwe ṅwenye, hambu ni ya mtuhu?

³⁵ Filipo azazuγula kauwa chakwe, azaandiila na mbuli ya uja ugondengwa, azamubilikila mbuli ya nyemi ya Yesu.

³⁶ Wakihita sila du, wazabula he mazi, ne yuja mfuṅwa ahomγamba: Kaula, aha hana mazii Vyefingiza, nishebatizwe, ni mbwai?

³⁷ Filipo azamuti: Ati watozesha kwa moyo wako woshe, vitadahikana. Yuja azaitikila angwe: Natozesha kuti: Yesu Kilisito ni ṅwanangwa ywa Mulungu.

³⁸ Azalaγiliza, gali jiγoloke; woshe waili, Filipo na yuja mfuṅwa, wazasheela na mwe yaja mazi, ne ahomubatiza.

³⁹ Wakilawa mwe mazi, mpehongwa ya Zumbe izamwusha Filipo, yuja mfuṅwa nkamwene vituhu; kangi azahita sila yakwe na nyemi.

⁴⁰ Filipo azalawila Asidodi, azaanga γuko na kubilikila mbuli za nyemi mizi yoshe, mpaka akibula Kesaliya.