Mfumbulo 9 - Kishambala New Testament 2005

Mlau ywa 5 alowa gunda, nkondo ya bosi.

¹ Mlau ywa shano azatowa gunda, ne nihoona ntondwe ilawileyo mwe lwingu, iikinile na shi, izainkwa funguwo ya kishima cha kuzimu.

² Izazuγula chiya kishima cha kuzimu, ne kuhokwela moshi mwe icho kishima, viya ni moshi wa ziko kulu, zuwa du jizagwa lwiza, kangi kosheni kuzatenda kishimishi kwa mbuli ya moshi wa chiya kishima.

³ Mwe uja moshi mzalawa siγe, zizaγubika shi, zizainkwa nguvu, sa visuse vivyotenda nguvu kunu shi.

⁴ Zizalaγiliziγwa, zishezabana mani ya shi na mgina woshe na miti yoshe komo wantu washinawo lunyindi lwa Mulungu mwe vyeni.

⁵ Kangi nkazikundiziγwe kuwakoma, shuti ziwaswilimize myezi mishano, kangi kuluma kwawe kufanana, viya ni kisuse chikimuluma muntu na luvula.

⁶ Mishi ija wantu newalonde lufiile, miya nkezewaluone, watakundisha kufa, miya kifa chitawanyilika.

⁷ Izi siγe shula yawe ifanana, viya ni mafalashi yatandikilweyo nkondo; kwe mitwi yawe kuna mabundu, viya ui ya zahabu, vyeni vyawe vifanana, viya nivyawantu.

⁸ Zina mavunga, viya ni ya wavyele, meno yawe, viya ni meno ya shimba.

⁹ Kangi vifuwa vyawe, viya ni mademu ya kilama, mikemele ya mbawa zawe, viya ni magali yehunwa ni mafalashi mangi na kwe nkondo.

¹⁰ Kangi zina mikila, viya ni mikila ya visuse vyena fula; mwe mu mikila yawe ne nguvu yawe ilimo ya kulumiza wantu myezi mishano.

¹¹ Wana zumbe ywawe, ni mlau ywa kuzimu mweitangwa Kiebuleyo Abadoni, Kigiliki zina jakwe aitangwa Apoliyoni.

¹² Nkondo ya bosi izaomboka; miya shivyo: Kukeshiγale nkondo mbili zeiza nyuma.

Mlau ywa 6.

¹³ Mlau ywa mtandatu azatowa gunda, ne nihoiva kanwa kiṅwe chilawilecho he maheta mane ya okelo ja zahabu ja ṅombe za mviko je haja ha Mulungu kamazu;

¹⁴ chizamlonga yuja mlau ywa mtandatu, aketozize gunda jakwe, angwe: Shungula waja walau wane washungiγwewo he uja muto mkulu wa Oifulati.

¹⁵ Waja walau wane wazashungulwa; ne waiikilwe inu saa ya unu mushi wa unu ṅwezi wa iji vuli, kangwe wakome fungu ja ntatu ja wantu.

¹⁶ Talo ja wankondo wapandilewo mafalashi ni makulija na makulija; nizaiva, talo jawe jikilongwa.

¹⁷ Nizaona na mesho yangu yaja mafalashi na wapandilewo mumo, waizwikile mademu yelungulika, kuṅwe yachuta, kuṅwe ni ya nweze; mitwi ya aya mafalashi ifanana, viya ni mitwi ya mashimba, mwe vyanwa vyawe mzalawa moto na moshi na vibilitibiliti.

¹⁸ Fungu ja ntatu ja wantu jizakoṅwa ni izo nkondo ntatu, ni uja moto na moshi na vibilitibiliti vilawilevyo mwe vyanwa vyawe.

¹⁹ Hambu nguvu ya aya mafalashi ni vyanwa vyawe na mikila yawe; hambu mikila yawe ifanana na nyoka, ina mitwi, ne wayoluma nayo.

²⁰ Wantu washiγalewo, washikomiγwewo ni izi nkondo, nkawavoteke kwa mbuli ya miγoshwele ya mikono yawe, kangi nkawalekile kuvika mizimu na vinyuwa vya zahabu na vya feza na vya ṅandu na vya mawe na vya miti, vishivyodaha kuona na kuiva na kuanga.

²¹ Miya vivyoho nkawavoteke kwa mbuli ya utungulu na ushai na utesi na ubavi wawe.