Mfumbulo 6 - Kishambala New Testament 2005

Magongezo ya wafu mtandatu yashungulwa.

¹ Nizaona, yuja ṅwangoto akishungula iṅwe ja yaja magongezo mfungate ya wafu, ne nihoiva, ziya nyama ṅwenga ikilonga, viya ni vuzo ja lubambala angwe: Iza!

² Nikiolela, nizaona falashi yeṅala, yuja aipandileye aitozize uta, azainkwa linga, viya ni mvoti, azahalawa, kangwe akavote.

³ Akishungula gongezo ja mbili, nizaiva, nyama ya mbili ikilonga angwe: Iza!

⁴ Ne kuholawa falashi ntuhu yelungulika, yuja aipandileye azashungulwa kuusha mwivano kunu shi, wantu wakomane wenye na wenye, vikibinda azainkwa shime nkulu.

⁵ Akishungula gongezo ja ntatu, nizaiva, nyamaya ntalu ikilonga angwe: Iza! Nikiolela nizaona falashi size, yuja aipandileye aitozize kihimo mwe mkono wakwe.

⁶ Ne nihoiva, viya ni kanwa che mwe ziya nyama ne gati, angwe: Katezu ka ngano ni lobo, vitezu vitatu vya mshele ni lobo, miya mavuta na mvinyo ushezavibana!

⁷ Akishungula gongezo ja ne, nizaiva, kanwa cha nyama ya ne chikilonga angwe: Iza!

⁸ Nikiolela nizaona falashi ye zeluzelu, yuja aipandileye zina jakwe ndiye kifa, kuzimu kumtongela, wazainkwa ufuṅwa wa fungu ja ne ja shi, wakome na shime ao na sala ao na kifa ao na makaka ya shi.

⁹ Akishungula gongezo ja shano, nizaona mzunguwi he okelo ja ṅombe za mviko mpeho za waja wakomiγwewo kwa mbuli ya Mulungu na kwa mbuli ya uwona, ndiwo wakitozesha.

¹⁰ Wazakema na vyanwa vikulu angwe: Zumbe mṅazi mwe kweli, ni lini, ukizalaha na kulahiza mpome yetu kwa waja weikala uko shi?

¹¹ Kila ṅwiyae ywawe azainkwa nkazu yeṅala, wazaγangwa, watongomale hadodo ani, mpaka ibontoke mbuli ya wapuna weyae wawe na ya wanduγu wawe weunga kukoṅwa wohe sa awa wenye.

¹² Nizaona, akishungula gongezo ja mtandatu, ne kuhooneka mdidimo mkulu, zuwa jizachuta, viya ni guniya ja ukonge, ṅwezi woshe uzalungulika, viya ni mpome,

¹³ ntondwe za lwingu zizagwa na shi, sa mkuyu uvyohaγatula nkuyu zakwe ukikuchiγwa ni mpeho nkulu.

¹⁴ Lwingu luzatana sa talatasi jefikakizinga, milima yoshe na visiwa vyoshe vizaushiγwa hantu hawe.

¹⁵ Wazumbe woshe wa shi na wafuṅwa na wankondo na wazuli na wanguvu na wapuna woshe na wana vyale wazakifisha kwe mpanga na kwe mahati ya makungu, wazalonga milima na makungu angwe:

¹⁶ Tikinilei, mtifishe he mesho ya yuja mweikaila kitingwa na he maya ya yuja ṅwangoto!

¹⁷ Hambu uja mushi mkulu wa maya yakwe uzabula; ndiye adahe kuika nkani ni ndai?