Mfumbulo 1 - Kishambala New Testament 2005

Bontokelo ja mfumbulo.

¹ Shivi vya Yesu Kilisito, Mulungu amfumbwilevyo, awaonyeshe watuṅwa wakwe vyeunga kuγosholeka nguzu! Azatuma mlau ywakwe, ne avyovimumanyishiza mutuṅwa ywakwe Yohana.

² Ne ndiye akikanila mbulingwa ya Mutungu na uwona wa Yesu Kilisito na vyoshe, aenevyo.

³ Mwe nyemi ni mwefyoma haṅwe na waja weiva mbuli za uteγanyi, wetozesha viya vigondiγwevyo mumo; hambu mushingwa u hehi.

Yohana aluγusha mabumba mfungate.

⁴ Imi Yohana navigondela yaja mabumbangwa mfungate ye mwe shi za Asia: Mbazi imiikaile na mpeho yeanduka kwa yuja mwe haha! Ndiye ai haho kale hoshe, kangi ne ndiye nezealawile. Kangi ianduka kwa waja wantimizi mfungate weγolokela kiti chakwe,

⁵ kangi ni mpeho yeanduka kwa Yesu Kilisito; uyu ni mwona mwe kweli, ni mulimbulo wa wafilewo, ni mweγolokela wazumbe wa shi. Azatikundisha, azatihaka na mpome yakwe,

⁶ uhuza wetu uuke, azatiγalusha wazumbe na wavikizi wa ishe Mulungu, uyu ntogolo na nguvu ni zakwe kale na kale. Amini.

⁷ Shuyuja, aiza mwe mazunde, mesho yoshe nezeyamwone, hata waja, ndiwo wakimshoma, mbali zoshe za shi nezezimlilile. Ivi ni kweli. Amini.

⁸ Imi ni A na O, ni kuγamba: Chandilo na hindilizo, ne avyolonga Zumbe Mulungu mwe haha, ndiye ai habo, ndiye nezealawile, mwena nguvu zoshe.

Yohana aenevyo Patimo.

⁹ Imi Yohana ni mnduγu ywenyu, kangi ni haṅwe na inywi kwa mbuli ya ukiwa, kangi kwa mbuli ya uzumbe, kwa mbuli ya uzizimizi weoneka kwa Yesu; ne nikiikala mwe kisiwa cheitangwa Patimo, kwa viya nibilikilevyo mbulingwa ya Mulungu na uwona wa Yesu.

¹⁰ Ne nii kimpeho he mushi wa Zumbe, ne nihoiva nyuma kwangu mulilo mkulu, viya ni wa gunda, angwe: Imi ni A na O, ywa bosi na ywa shilikiza.

¹¹ Uvyoona vigonde mwe kitabu, uchitume kwe yaja mabumba mfungate uko Efeso, Similina, Peligamo, Tiyatila, Salide, Filadelifiya, Lawodikiya!

¹² Nizahituka, niolele icho kanwa chelonga na imi; nikihituka ivyoho nizaona taa mfungate za zahabu,

¹³ gatigati mwe izi taa nizaona mwefanana, viya ni ṅwana muntu, aizwikile nkazu, he kifuwa aizwikile kowa ja zahabu.

¹⁴ Mutwi wakwe na vunga jakwe jaṅala, viya ni upamba ao viya ni kau, mesho yakwe yafanana, viya ni bilibili ja moto;

¹⁵ milundi yakwe ifanana na ṅandu ilungumiziγweyo zikoi, milongele yakwe ifanana, viya ni mibohele ya mazi mangi.

¹⁶ Mwe mkono wakwe wa kulume aitozize ntondwe mfungate, mwe kanwa chakwe mzalawa shime yekolesha, yena nyino mbili; nikimwolela, afanana na zuwa jeaka na nguvu yakwe.

¹⁷ Nikimwona nizakina he milundi yakwe, viya nitefa. Azanibadikila mkono wakwe wa kulume angwe.

Ntondwe 7 na taa 7.

¹⁸ Usheogohe! Imi ni ywa bosi na ywa shilikiza na yuja mwe moyo; ne niifile, miya shivyo, ni moyo kale na kale,

¹⁹ niitozize funguwo za kifa na za kuzimu.

²⁰ Gonda lushe uvyoona, vye haha na viya, ndivyo vilawile nyuma! Mbuli zishizotailikana za ziya ntondwe mfungate, uenezo mwe mkono wangu wa kulume, na za ziya taa mfungate za zahabu. Ziya ntondwe mfungate ni walau wa yaja mabumba mfungate, ziya taa mfungate, uenezo, ni yaja mabumba mfungate.