Mateyo 8 - Kishambala New Testament 2005

Mkoma. 1-4.

¹ Akisheela mwe uja mulima, wantu wangi muno wazamtongela.

² Kuna mkoma, azamwizila, azamkinila angwe: Zumbe, ati wakunda, wadaha kunihonya.

³ Azakusula mkono, azamdowa angwe: Nakunda, uhone. Viya du lushe ukoma wakwe uzauka.

⁴ Yesu azamuti: Olela, ushezavimγambila muntu! Miya hita, umlawile mvikizi, uiγale jiya tulo, Mose alaγilizejo, jiwaγalukile uwona!

Mkwee ja Petelo. 14-18.

⁵ Akiingila Kapelinaumu, mkulu ywa washilikali azamwizila, azamhembeleza, angwe:

⁶ Zumbe, mbwanga ywangu atoziγwa ni mahisho nyumbai, ana pengene, aisiiza kulumilwa.

^7-8 Angwe ndiye: Neniize, nimhonye. Yuja mkulu ywa washilikali azamlandula angwe: Zumbe nkaviniagiza, ukiingila mwangu; longa mbuli du!

⁹ Ne mbwanga ywangu atahona. Hambu imi nami ni muntu neitika ufuṅwa, kangi vivyo nina washilikali weniitika, nikimγamba uyu Hita!, ahita, nikimγamba mtuhu: Iza!, aiza, nikimγamba mupuna ywangu: Γoshola visiku!, aγoshola.

¹⁰ Yesu akiviiva, azamaka; azawalonga waja wemtongela: Kweli namiti: Kwa Waisilayeli saene muntu mwena mitozesheze ye ivyoho.

¹¹ Miya namiti: Wangi nezewalawe kwelawa zuwa na kweingila zuwa, waikale ndala haṅwe na Abulahamu na Isaka na Yakobo uzumbe wa lwingu.

¹² Miya wenyezi wa uja uzumbe nezewashindikwe na se na kwe iwiza; ne kwena kulila na kukemeza meno.

¹³ Vikibinda Yesu azalonga yuja mkulu ywa washilikali: Hita! Uvyotozesha vikubontokele! Ija ngela ne yuja mbwanga ahohona.

Mkwee ja Petelo. 14-16.

¹⁴ Yesu akiingila mwe nyumba ya Petelo azamwona nine ja mkaza Petelo kuti: Ailele sasai, ana mbu.

¹⁵ Azamtoza mkono, ne mbu zihomleka; azainuka azamγoshwela ndima.

¹⁶ Lwa ṅwiyaγulo wazamletela wangi wehuma mpepo; azaingata ziya mpepo na kulonga du, hata woshe watuhu wehuma azawahonya,

¹⁷ kangwe vibontoke viya vilongiγwevyo ni mteγanyi Yesaya akiγamba: Ṅwenye azakiitwisha kulumila kwetu, azainula manyonge yetu.

¹⁸ Yesu akiona wantu wangi, wakimdenganila, azalaγiliza, waomboke na sheja.

Kumtongela Yesu ku zeze? 19-22.

¹⁹ Kuzaiza mtabaluwangwa, azamuti: Mfuzi, nikutongele, ndiko uhite nako!

²⁰ Yesu azamuti: Mpelele zina maleme, madeγe yeanga ulanga yana masasa, miya ṅwanangwa ywa muntu nkana ha ikila mutwi.

²¹ Mhina mtuhu azamuti: Zumbe, nikundiza, ninehita kwa mzika tate!

²² Yesu azamuti: Nitongela, uleke, wafilewo wazike weyae wawe wefa!

Yesu atongomaza bahali. 23-27.

²³ Akiingila mwe chombo, wahina wakwe wazamtongela.

²⁴ Kuzainuka mpeho nkulu mwe bahali, mpaka chombo chikiγubikwa ni maimbi, miya ṅwenye aisisile.

²⁵ Wazamwizila, wazamwinula angwe: Zumbe, tihonye! Taaγa.

²⁶ Azawati: Nini mkitaogoha ivyoho? Nini mkishetozesha vyedi? Vikibinda azainuka, azavaila ija mpeho na bahali, ne kuhohombwela kabisa.

²⁷ Wantu wazamaka angwe: Ni muntu ani uyu, mpeho na bahali zikimwitika?

Watamu waili wehuma mpepo. 28-34.

²⁸ Akibula sheja mwe shi ya Gadala azakintana na wantu waili wehuma mpepo, walawa kwe mbila, wana nkunguka kabisa, kwa ivyoho muntu nkazinka mwe ija sila.

²⁹ Wazakema angwe: Tina mbwai ishwi na iwe, ṅwana Mulungu? Uzaiza na kunu, utilumize, mishi yetu ishizati ibule?

³⁰ Miya haja, waliho, hale hana ifyo ja nguluwe nyingi zelishiγwa.

³¹ Ziya mpepo zizamhembeleza angwe: Ati watiingata, titume, tiingile mwe jiya ifyo ja nguluwe!

³² Azaziti: Hitai! Zizalawa, zizahita, zizaingila mwe ziya nguluwe. Ne ifyo joshe jiholumbila kunguwi na mwe bahali, zizafa muja mwe mazi.

³³ Walishi wazanyilika, wazahita na kaya, wazabilikila vyoshe, hata mbuli za waja wahumilewo mpepo.

³⁴ Ne wantu woshe wa muzi waholawa, wambashe Yesu; wakimwona, wazamhembeleza, auke mwe shi yawe.