Maliko 8 - Kishambala New Testament 2005

Yesu aiγusha wantu 4000. 1-10.

¹ Mishi ija kuzaunganana wantu wangi muno vituhu, kangi wazashowa vya ja; ne ahoitanga wahina wakwe, azawati:

² Nabulwa ni utungu na awa wantu, hambu mishi mitatu wazahumula kwangu, kangi nkawana vya ja.

³ Ati nawashungula, waγotoke na kwawe waishijile, watagwa mshale silai, kangi kuṅwe waanduka hale.

⁴ Wahina wazamlandula: Muntu adaha zeze kuwaiγusha nkande wantu weinga aha kunu nyika?

⁵ Azawauza: Muna migate ingahi? Angwe: Mfungate.

⁶ Azalaγiliza wantu, waikale shi, azaγuwa ija migate mfungate, azalavya ntogolo, azaibendulabendula, azaiinkila kwa wahina wakwe, waiiγale; wazaiiγala kwa waja wantu.

⁷ Kangi ne waina vikapala viγeke, vyohena azavilaviliziza ntogolo, azalaγiliza, waviiγale.

⁸ Wazaja, wazaiγuta, kangi wazadodola mpuγulishi ngahu mfungate.

⁹ Miya wantu wazaγelemuka hata makulija mane; lushe azawashungula.

Yesu alemela na lwitangilo. 10-21.

¹⁰ Viya du lushe azaingila mwe chombo na wahina wakwe, azahita lwazu lwa Dalimanuta.

¹¹ Ne Mafaliseyo wahomlawila, wazaandiila kuuzanya naye, wazamγeza na kumlonga, aγoshole lwitangilo lwelawa mwe lwingu.

¹² Azahesa moyo angwe: Nini inu mbali ikilonda iwitangilo? Kweli namiti: Inu mbali nkezeiinkwe lwitangilo.

¹³ Azawaleka, azaingila vituhu mwe chombo, azaomboka na sheja.

¹⁴ Miya wazajala kuinula migate, muja mwe chombo ne waishina hata, kushima mgate muṅwe du.

¹⁵ Azawashunda akiwati: Olelai, mkiγojeshe kwa mbuli ya shimbi ja Mafaliseyo na shimbi ja Helode!

¹⁶ Wazafanyanya mwe myoyo yawe kuti: Ni kwa kuti nkatina migate.

¹⁷ Akivitaila azawati: Nini mkifanyanya kuti: Ni kwa kuti nkamna migate? Nkamzati mtende lutwi mkitaila? Myoyo yenyu iketoγa vivyoho?

¹⁸ Mesho muna nayo, miya nkamwona, mashikilo muna nayo, miya nkamwiva.

¹⁹ Nkamfukila haja nikizabendwila wantu makulija mashano migate mishano, mdodole ngahu zingahi zimemilezo mpuγutishi? Wazamγamba: Ni kumi na mbili.

²⁰ Azawaγamba vituhu: Haja nikizabendwila wantu makulija mane migate mfimgate, mdodole ngahu zingahi zimemilezo mpuγutishi?

²¹ Wazamγamba: Ni mfungate. Azawati: Lushe na ivi nkamzati mtaile?

Yesu amhonya tuntu

²² Wazabula Betisayida, wantu wazamletela tuntu, wazamhembeleza, amdowe.

²³ Azamtoza yuja tuntu mkono, azamlavya mwe uja muzi na uko tanga, azamshwela mate mwe mesho, azamubadikila mikono, azamwuza: Una uvyoona?

²⁴ Azaolela na ulanga angwe: Naona wantu weanga, viya nitaona miti.

²⁵ Azamubadikila vituhu mikono mwe mesho yakwe, akiolela lushe azahona, vintu vyoshe azaviona vitana, hata viya vye hale.

²⁶ Azamtuma na nyumbai mwakwe akimuti: Usheingile umu kaya, kangi ushezavimγambila muntu umu kaya!

Yesu a uko Kesaliya ya Filipo. 27—9,1.

²⁷ Yesu na wahina wakwe wazakulawa, wazahita kwe mizi tanga ya Kesaliya ya Filipo. Silai azauza wahina wakwe angwe: Wantu waγamba, kuti ni miyo ndai?

²⁸ Wazamuti: Kuṅwe waγamba: U Yohana Mubatizi, kuṅwe kuti: U Eliya, kuṅwe kuti: U muṅwe ywa wateγanyingwa.

²⁹ Ṅwenye azawauza: He inywi mγamba, kuti ni miyo ndai? Petelo azahitula angwe: Iwe u Kilisito Azawashunda,

³⁰ washezamγambila muntu inu mbuli yakwe.

Yesu alonga ndivyo alumiziγwe.

³¹ Azaandiila kuwafuza, kuti vyamtala ṅwanangwa ywa muntu, alumiziγwe vikulu, abentwe ni watawa na wavikizi wakulu na watabaluwangwa, mpaka akoṅwe, miya mishi mitatu ikizinka, atafufuka. Inu mbuli azailonga cha sale.

³² Petelo azamwinula he njama, azaandiila kumshunda.

³³ Miya yuja azahituka, azaolela wahina wakwe woshe, azamshunda Petelo angwe: Uka kwangu, Satani! Hambu nkutongonyeza viya vya Mulungu, utongonyeza viya vya wantu.

Muntu ainule muti wakwe wa kukomelwa.

³⁴ Azaitanga bumba kulu haṅwe na wahina wakwe, azawati: Ati muntu akunda kunitongela, shuti anekilemeza ṅwenye, ainule muti wakwe wa kukomelwa, ne ndivyo adahe kunitongela.

³⁵ Hambu mwekunda kukihonya, atazakihosa; miya mwekihosa kwa mbuli ya imi na ya ulau wedi, atazakihonya.

³⁶ Hambu muntu nezeaonele mbwai akimota ngulu ngima, ati moyo wakwe wahosiγwa ndiyo?

³⁷ Hambu muntu alavye makombo ani, ndiyo akikombole nayo?

³⁸ Hambu ndiye atendwe ni shoni na imi ao du na mbuli zangu kuzilonga mwe inu mbali ye kilanga na uhuza, hata ṅwanangwa ywa muntu atazatendwa ni shoni naye akizaiza haṅwe na walau waṅazi na utana wa ishe.