Maliko 4 - Kishambala New Testament 2005

Lushimo lwa mhasi. 1-20.

¹ Azaandiila vituhu kufuza nkandankanda ya bahali, ne kuhounganana bumba kulu muno kabisa haja, aliho; ne vyeleka, akiingila mwe chombo, azaγoloka nacho mwe bahali, miya jiya bumba joshe jii nkandankanda ya bahali.

² Azawafuza mbuli nyingi na kuwazisa shimo, azawalonga na ija mifuzize yakwe: Teγelezai!

^3-4 Kuna mhasi azalawa kwa myaγa mbeyu; aho akimyaγa mbeyu, kuṅwe zizagwa silai, videγe vizaiza, vizazija.

⁵ Kuṅwe zizagwa he mawe, hashinaho shanga nyingi, zizafaalika nguzu kwa kushowa shanga nyingi.

⁶ Miya zuwa jikiandiila kuaka, zizanyuluka, zizakalaγala, kwa kuti nkazina sindo.

⁷ Kuṅwe zizagwa he miwa; miwa izakwela, izazifuwa na kuzivungavunga, nkazivyele.

⁸ Kuṅwe zizagwa mwe shanga ntana, zizalawa, zizakula, zizavyaia, zizavukiza, kuṅwe milongo mitatu, kuṅwe milongo mtandatu, kuṅwe gana.

⁹ Akibinda azalonga: Mwena mashikila yeiva neaive!

¹⁰ Wakiikala wenye du, waja awona nawo haṅwe na waja kumi na waili wazamwuza ziya shimo.

¹¹ Azawati: Inywi mzafilwa mbazi, mtaile kihili cha uzumbe wa Mulungu, miya waja we uko se waγambilwa mbuli zoshe kishimo,

¹² kangwe waolele na mesho yawe, miya washeone, waive na mashikilo yawe, miya washetaile, kangwe washezahituka wakiushiliziγwa uhuza.

¹³ Azawati: Nkamtaila ulu lushimo? Mtaile zeze ziya shimo zoshe?

¹⁴ Yuja mhasi amyaγa mbulingwa.

¹⁵ We kuja silai, mbeyu zikomyaγwa, ni waja weiva mbulingwa, miya viya du lushe Satani aiza, ausha mbulingwa imyaγiγweyo mwe myoyo yawe.

¹⁶ Vivyoho hata ziya zimyaγiγwezo he mawe ni waja weiva mbulingwa na kufikaihokela na nyemi,

¹⁷ miya nkawana sindo mwe myoyo yawe, wazizimiza mishi miγeke, miya wakiona ukiwa ao nkondo kwa iyo mbuli, wafikaihilwa.

¹⁸ Ziya ntuhu zimyaγiγwezo he miwa, ni waja Weiva mbulingwa,

¹⁹ miya sungu za inu shi na lwufyo lwa mali na luzisho lutuhutuhu lwaingila lohena, lwafuwa mbulingwa, ishevyale.

²⁰ Ziya zimyaγiγwezo mwe shanga ntana, ni waja weiva mbulingwa na kuihokela, ne wevukiza, kuṅwe milongo mitatu, kuṅwe milongo mtandatu, kuṅwe gana.

Lushimo lwa kijali na lwa kihimo. 21-25.

²¹ Azawati: Kumbe kijali chikaletiγwa, chifunikilwe ngahu, ao du chiikwe he lusazi mzunguwi? Chisheikwe he kiikilo chakwe?

²² Nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishelawile na weluwi!

²³ Mwena mashikilo yeiva neaive!

Lushimo lwa mbeyu yekula ṅwenye.

²⁴ Azawati: Olelai viya muvyoiva! Kihimo, ndicho muhime nacho, ne ndicho nezemuhimilwe nacho, kangi nezemγelekwe.

²⁵ Hambu mwena kitende atainkwa vivyoho, miya ashinaye hata viya, avyona navyo, atavihokwa.

²⁶ Azawati: Uzumbe wa Mulungu wafanana na muntu mwemyaγa mbeyu mwe lubuwa.

²⁷ Akibinda ahita kwa sisila, ainuka, kilo na mushi ni vivyoho; miya ija mbeyu yafaalika, yakula, ṅwenye aishitaile.

²⁸ Shi ivyala ṅwenye, kuandiila ni mani, vikibula gati yachakula, bindilizo yadalahaza mpuluzi mwe mahimpi.

²⁹ Miya mampemba yakigonyoka, viya du lushe atuma tuni, hambu uluki uzabula.

Lushimo lwa mvumo. 30-34.

³⁰ Azawati: Uzumbe wa Mulungu tiufanyanye na mbwai? Mbuli yakwe tiilonge na lushimo ani?

³¹ Wafanana na kahuluzi ka ntunda ya mvumo; kakigelwa mwe shanga ni kahuluzi kadodo kuzinka mbeyu zoshe kunu shi.

³² Miya kakibinda kuhandwa kalawa, kavota miti yoshe yehandwa, katula matambi makulu, hata madeγe yeanga ulanga yadaha kuhema mwe mpungo yakwe.

³³ Azawaγambila mbulingwa na shimo nyingi ntuhu zefanana na izi, iivane na aho, wadahileho kuiva.

³⁴ Nkakuna mbuli, awalongileyo kishilushimo, miya wahina wakwe ṅwenye azawafumbwila mbuli zoshe, wai wenye du.

Yesu atongomaza bahali. 35-41.

³⁵ Mushi uja, kukibinda kushwa, azawaγamba: Netiomboke na sheja!

³⁶ Wazashungula waja wantu, wazamγuwa vivyoho, aikalevyo mwe chombo, hata vyombo vituhu vizahita naye.

³⁷ Kuzainuka mpeho nkulu yekuntisha na nguvu, izatambika maimbi na mwe chombo, ne chiandiilevyo kumema mazi.

³⁸ Ṅwenye a kuja nyuma, aisisile mwe muto; wazamwinula, wazamγamba: Mfuzi, nkuna sungu, tikiaγa?

³⁹ Azainuka, azavaila ija mpeho, hata bahali azailonga angwe: Leka lwashu, tongomala! Ne mpeho iholeka kukunta, kuzahombwela kabisa.

⁴⁰ Azawati: Nini mkitaogoha ivyoho? Kangi nini mkishetozesha?

⁴¹ Wazaingilwa ni woγa ukulu, wazaγambilana: Ni muntu ani uyu, mpeho na bahali zikimwitika?