Maliko 16 - Kishambala New Testament 2005

Yesu afufuka. 1-4.

¹ Mushi wa sabato ukibontoka, Maliya Magadalene na Maliya, nine ja Yose, na Salome wazaγula miti yehumpuntika vitana, kangwe wahite, wamshishe.

² Mhitu wa sabato makelo kabisa wazahita kwe mbila, zuwa jikilawa.

³ Wazaγambilana: Ndiye atishindikile jiya iwe, jiuke he kifiγwe cha mbila, ni ndai?

⁴ Wakiolela wazaona, kuti jiya iwe jizabinda kushindikwa, hambu ni kulu muno. Wakiingila mwe mbila wazaona mubwanga, aiikale kulume,

⁵ aizwikile guni jeṅalisha, wazashentuka.

⁶ Azawati: Msheshentuke! Mumlonda Yesu ywa Nazaleti akontelweye mwe muti; azafufuka, nkaho aha. Shaha wamwikileho!

⁷ Miya hitai, mγambile wahina wakwe na Petelo, kuti neamilongwele na Galileya! Ne ndiko mumwone, sa amilongilevyo.

⁸ Wazahalawa, wazahanyilika haja he mbila, hambu wazaukwa ni vizingizo kwa kushentuka kwawe. Nkawaγambile muntu mbuli hata, hambu wazaogoha.

Yesu amlawila Maliya na wahina watuhu.

⁹ Yesu akibinda kufufuka na makelo mhitu wa sabato, bosi azamlawila Maliya Magadalene, amwingatilaye mpepo mfungate.

¹⁰ Yuja azahita, azaviukwila waja waangilewo naye, waikalewo na ukiwa na kulila.

¹¹ Waja wakiiva, kuti a moyo, kuti azaoniγwa ndiye, nkawatozeshe.

¹² Vituhu azawalawila weyae wawe waili na ṅwili mtuhu, wakianga, wahite nkoi.

¹³ Waja wohena wazahita, wazaviukwila weyae wawe watuhu, miya hata awa nkawawatozeshe mbuli zawe.

¹⁴ Kushilikiza azawalawila waja kumi na muṅwe, wakija nkande; azawashunda kwa mbuli ya kushetozesha kwawe na ya ntoγo za myoyo yawe, kwa kuti nkawatozeshe mbuli za waja wamwenewo kuti: Azafufuka.

Yesu aluma wahina mwe shi zoshe. 15-18.

¹⁵ Azawati: Hitai mwe shi zoshe za ngulu ngima, mubilikile ulaungwa wa nyemi kwa woshe we moyo!

¹⁶ Mwetozesha akibatizwa atazavunilwa; ndiye ashetozeshe atazalahwa.

¹⁷ Ntangilo ndizo zitongele waja wetozesha izi mbuli shizi: Mwe zina jangu wataingata mpepo, watalonga na milongele mihya.

¹⁸ Watadaha kutoza nyoka, hata wakinywa vyekoma nkezeviwaifye, wanyonge watawabadikila mikono, watende lubaluba.

¹⁹ Zumbe Yesu akibinda kuwalonga ivyoho azainulwa na mwe lwingu, azaikala kulume kwa Mulungu. Miya waja wazalawa, wazabilikila koshe koshe;

²⁰ kangi Zumbe azawaambiza akigela mbuli zawe nguvu na ziya ntangilo zitongelezo mbuli zawe.