Maliko 1 - Kishambala New Testament 2005

Yohana mubatizi. 1-8.

¹ Chandilo cha ulau wa Yesu Kilisito, ṅwana Mulungu, shichi:

² Chiγendile sa viyaho vigondiγwevyo ni mteγanyi Yesaya kuti: Olela, natuma mlau ywangu, akulongwele, akuliγanyize sila yako.

³ Kanwa cha mubilikizi chaivika mwe nyika angwe: Liγanyai sila ya Zumbe na kuγolosheza aho, ndiho agwile!

⁴ Yohana ne akibatiza mwe nyika na kubilikila ubatizi wa kuhitula ntongonyezi, kangwe uhuza uushiγwe.

⁵ Shi ngima ya Yudeya haṅwe na Wayelusalemu woshe wazamlawila, wazabatizwa ndiye mwe muto wa Yolodani wakivoteka kwa mbuli ya uhuza wawe.

⁶ Yuja Yohana aizwikile mayoya ya ngameya, aiyakantile na kikowe, nkande zakwe ni siγe na woki wa vambi.

⁷ Azabilikila angwe: Mwenizinka nguvu anitongela nyuma; kwa udodo wangu nkaviniagiza, nikiinama, nimzaγawile mikowa ya vilatu vyakwe.

⁸ Imi nizamibatiza na mazi, yuja atazamibatiza na mpeho ṅazi.

Yesu abatizwa, aγezwa, abilikila. 9-11.

⁹ Mishi ija Yesu azalawa Nazaleti ya Galileya, azahita, azabatizwa ni Yohana kuja Yolodani.

¹⁰ Aho akilawa mwe mazi azaona, lwingu lukitana, kangi mpehongwa ikimshelela, ifanana na suwa.

¹¹ Hata kanwa chizalawa mwe lwingu angwe: Iwe u ṅwanangu, niyekukundisha, natamilwa ni weyo.

¹² Haho mpehongwa izamwusha na mwe nyika.

¹³ Azaikala mwe iyo nyika mishi milongo mine akiγezwa ni Satani, weyae ni mazama, miya walau wazamtumikila.

¹⁴ Yohana akibinda kuinkilwa, Yesu azahita Galileya, azabilikila ulau wedi wa uzumbe wa Mulungu angwe:

¹⁵ Mishi izatimiza, uzumbe wa Mulungu u hehi; hitulai ntongonyezi zenyu, mtozeshe ulau wedi!

Yesu aitanga wahina. 16-20.

¹⁶ Akianga nkandankanda ya bahali ya Galileya azamwona Simoni na nduγuye Andeleya, wagela lwavu mwe bahali, hambu ni walowi.

¹⁷ Yesu azawati: Nitongelai, nimiγalushe walowa wantu!

¹⁸ Waja wahoasha nyavu zawe, wazamtongela.

¹⁹ Akihita na mazu hadodo azamwona Yakobo, ṅwana Zebedeyo, na nduγuye Yohana, wohe wa mwe chombo, wachunta nyavu zawe.

²⁰ Ne ahowaitanga; wazamwasha ishe ywawe Zebedeyo mwe chombo haṅwe na wandima, wazahita, wazamtongela.

Yesu ahonya muntu mwena mpepo Kapelinaumu. 21-28.

²¹ Wazaingila Kapelinaumu. Mushi wa sabato ukibula, azaingila vikiloi, azafuza.

²² Wantu wazashentuka mifuzize yakwe, hambu azawafuza sa muntu mwena ufuṅwa, nkafanane na watabaluwangwa.

²³ Muja vikiloi muna muntu mwena mpepo ye usaba,

²⁴ azainula kanwa angwe: Tina mbwai, ishwi na iwe, Yesu ywa Nazaleti? Uzaiza kwa tibinda! Takutaila kuti: U ngatiyani, kuti: U mṅazi ywa Mulungu.

²⁵ Yesu azaivaila angwe: Leka lwashu! Kangi lawa mwe uyu muntu!

²⁶ Ija mpepo ye usaba izamnyaγalisha yuja muntu, izakema na kanwa kikulu, vikibinda izalawa mwe ṅwili wakwe.

²⁷ Wosheni wazashentuka, wazauzanya angwe: Ni mbuli ani inu? Ni mifuzize mihya yena nguvu! Mpepo ze usaba aziingata, kangi ziyamwitika!

²⁸ Nguma yakwe izafikahita koshe koshe mwe shi zoshe za Galileya.

Amhonya mkwee ja Simoni na watamu wangi. 29-34.

²⁹ Aho wakilawa vikiloi, wazahita mwe nyumba ya Simoni na Andeleya, haṅwe na Yakobo na Yohana.

³⁰ Nine ja mkaza Simoni ailele, ana mbu; wazafikamγambila mbuli yakwe.

³¹ Azamtimila yuja mvyele, azamwinula na kumtoza mkono, ne mbu zihomleka, azawaγoshwela ndima.

³² Kukishwa zuwa jikibinda kuingila, wazamletela watamu woshe, hata wehuma mpepo.

³³ Wantu woshe wa uja muzi wazaunganana he kifiγwe.

³⁴ Azahonya watamu wangi wahumilewo mahisho mangi, hata mpepo nyingi azaziingata, kangi nkakundize ziya mpepo, zikilonga, kuti ziimtaile.

Yesu avika. 35-39.

³⁵ Makelo kushizati kuche, azainuka, azahalawa, azahita hantu he ike, azavika haho.

³⁶ Simoni azamdosa na waja weyae.

³⁷ Wakimwona waza mγamba: Wantu woshe wakulonda.

³⁸ Angwe ndiye: Netihite na kutuhu kwe mizi tanga, nikabilikile kohe, hambu ne niizilevyo.

³⁹ Azaanga mwe shi ngima ya Galileya akibilikila mwe mavikilo yawe, kangi akiingata mpepo.

Yesu amhonya mkoma. 40-45.

⁴⁰ Hata mkoma azamwizila, azamhembeleza haṅwe na kumgintila mazwi angwe: Ati wakunda, wadaha kunihonya.

⁴¹ Azabulwa ni utungu naye, azakusula mkono, azamdowa, azamuti: Nakunda, uhone.

⁴² Viya du lushe uja ukoma uzauka mwe ṅwili wakwe, azahona.

⁴³ Azamshunda na kumγulusha nguzu nguzu,

⁴⁴ angwe: Olela, ushezavimγambila muntu hata! Miya hita, umlawile mvikizi, uiγaie jiya tulo Mose alaγilizejo, kwa mbuli ya mpoza yako, jiwaγalukile uwona!

⁴⁵ Miya yuja akihalawa, azaandiila kubilikila koshe koshe na kuukula inu mbuli, azaleka, Yesu ashedahe kuingila mwe muzi cha sale, miya azaikala tanga hantu he ike ike. Wantu wazalawa kosheni, wazamtimila.