Luka 7 - Kishambala New Testament 2005

Mkulu ywa washilikali Kapelinaumu. 1-10.

¹ Akibinda kulonga izi mbuli zoshe kwa waja wantu wamteγelezewo, azaingila Kapelinaumu.

² Kuna mkulu ywa washilikali, mupuna ywakwe azahuma, azabuza kufa, kangi ṅwenye aamkundisha.

³ Akiiva mbuli ya Yesu, azamtumila waγolokezi wa Kiyuda, wazamhembeleza, kangwe ahite, akamhonyeze mupuna ywakwe.

⁴ Waja wakibula kwa Yesu wazamhembeleza na kumhimila angwe: Vyaagiza, ukimfila mbazi ivyoho.

⁵ Hambu akundisha mbali yetu, kangi ṅwenye azatizengela vikilo.

⁶ Yesu azahita nawo. Ake hale hale na ija nyumba, yuja mkulu ywa washilikali azatuma weyae angwe: Zumbe ushefe muku! Hambu imi ni mhuza, nkavikuagiza, ukiingila mwangu.

⁷ Kwa inu mbuli nizakifanyanyiza kuti: Nkaviagiza, nikikulawila ṅwenye; miya longa mbuli du! Ne mbwanga ywangu atahona.

⁸ Hambu imi nami ni muntu neitika silikali, kangi nina washilikali weniitika; nikimγamba uyu: Hita!, ahita; nikimγamba mtuhu: Iza!, aiza; nikimγamba mupuna ywangu: Γoshola visiku!, aγoshola.

⁹ Yesu akiviiva azamumaka; azahituka kwa waja wantu wemtongela angwe: Namiti: Kwa Waisilayeli saene mitozesheze ye ivyoho.

¹⁰ Waja watumiγwewo wakiγotoka na kaya wazamubulila yuja mupuna, aihonile.

Mbwanga ywa Naini.

¹¹ Vikibinda azahita kwe muzi weitangwa Naini, wahina wakwe wazahita naye na wantu wangi.

¹² Akibula hehi na nkili ya muzi, kuzalaviγwa muntu afileye, ni mubwanga avyelweye ike ni nine, kangi uyu mvyele aafilwa ni mulume; wakaya wemtongela haṅwe naye ni bumba jebesha.

¹³ Zumbe akimwona azabulwa ni utungu naye, azamuti: Ushelile!

¹⁴ Azahita, azadowa ija nkingo, ne waja wainuzi wahoγoloka.

¹⁵ Azalonga: Mubwanga, nakuti: Inuka! Yuja muntu afileye ne ahoikala, azaandiila kulonga, azamwinkila kwa nine.

¹⁶ Woγa uzawaingila waja woshe, wazamtogola Mulungu wakiγamba: Mteγanyi mkulu azalawila kwetu, Mulungu azaolela mbali yakwe.

¹⁷ Inu mbuli yakwe izahita, izagisa shi ngima ya Yudeya na shi zoshe zehampikana nayo.

Yohana mubatizi na Yesu. 18-35.

¹⁸ Yohana azaukwilwa ivi vyoshe ni wahina wakwe.

¹⁹ Azaitanga wahina wakwe waili, azawatuma kwa Zumbe angwe: Iwe u yuja mweiza, hambu tiafize mtuhu?

²⁰ Waja wantu wakibula kwakwe wazamuti: Yohana Mubatizi azatituma kwako angwe: Iwe u yuja mweiza, hambu tiafize mtuhu?

²¹ Ija minga azahonya wangi mahisho yawe na vilema na mpepo mbada, hata matuntu mangi azayafila mbazi, yaone.

²² Azawalandula angwe: Hitai, mumwukwile Yohana muvyoona na muvyoiva: Matuntu yaona, washiwodaha kuγenda waγenda, wakoma waushiγwa ukoma, washiwoiva waiva, wafilewo wafufulwa, wakiwa wabilikilwa nyemi.

²³ Mwe nyemi ni ndiye asheihilwe ni miyo!

²⁴ Waja walau wa Yohana wakibinda kuhita, azaandiila kuuzanya na wantu mbuli ya Yohana kuγamba: Kumbe aho mkizahita mwe nyika muhitile kwa olelai? Ni lasi jevuviγwa ni mpeho? Hambu muhitile kwa olelai?

²⁵ Ni muntu azwikileye shuke zedeeleka? Olelai! Wezwika shuke ntana na weja kizumbe wa mwe vitala.

²⁶ Miya lushe muhitilei? Kwa olela mteγanyingwa? Kweli namiti: Ni mkulu kuzinka mteγanyi.

²⁷ Uyu ne mwegondelwa kuγamba: Olela! Nezenitume mlau ywangu akakulongwele, na kukutulila sila yako, ndiyo ugwile.

²⁸ Nainiti: Woshe wavyelwewo ni wavyele nkakuna mkulu kumzinka Yohana Mubatizi; miya mweγaluka mdodo mwe uzumbe wa Mulungu ni mkulu kumzinka.

²⁹ Wantu woshe wamwivilewo, hata wangelu wazaitikila utanda wa Mulungu, wazabatizwa na ubatizi wa Yohana.

³⁰ Miya Mafaliseyo na watamulomongwa wazabela viya, Mulungu avyokunda, nkawabatizwe ndiye.

³¹ Zumbe azawati: Wantu wa inu mbali niwafanyanye na mbwai, wavyofanana navyo?

³² Wafanana na wana wadodo weikala lwazoi, welongana angwe: Tizamitowela inywi miluli, miya nkamvinile, tizamitumbwila ndilo, miya nkamulizite.

³³ Hambu Yohana Mubatizi azaiza, nkajile nkande, nkanywele mvinyo, lushe mwaγamba: Ana mpepo. Ṅwanangwa

³⁴ ywa muntu azaiza, aaja, aanywa, lushe mwaγamba: Shuyu muntu mwejilisha na kunywelesha mvinyo! Wangelu na wahuza ni ṅwiyae ywawe!

³⁵ Kweli viyuγo vikanilwa ni viya vyoshe viγosholwevyo ndivyo.

Yesu aambwilwa mavuta ni mvyele mhuza.

³⁶ Kuna Faliseyo, azamlalika, aje nkande naye. Akiingila mwe nyumba ya yuja Faliseyo azaikala haja ha jiila nkande.

³⁷ Kangi kuna mvyele mhuza mwe uja muzi; yuja akitaila, kuti aja nkande mwa yuja Faliseyo, azahita, azaγuwa kakomba ka mafutilo ya mluziluzi;

³⁸ azaγoloka nyuma hadodo he milundi yakwe akilila, ne ahoandiila kugisa milundi yakwe meshozi na kuyahonola na swili za mutwi wakwe, kangi azafyosa milundi yakwe na milomo yakwe, akibinda azaishisha yaja mafutilo.

³⁹ Yuja Faliseyo amlalikeye akiviona azafanyanya mwe moyo wakwe kuγamba: Ati uyu ni mteγanyingwa, anga azataila, uyu mvyele mwemdowa alivyo, kuti ni mhuza ṅwenye.

⁴⁰ Yesu azamlandula angwe: Simoni, nina vya longa na iwe. Angwe: Mfuzi, longa!

⁴¹ Angwe: Ne kwina muntu akopiγweye ni wadeni waili, muṅwe akopile shilingi magana mashano, ṅwiyae milongo mishano.

⁴² Wakishowa vya liha, woshe waili azawafila mbazi washelihe; lushe ndiye amkundishe kumzinka ṅwiyae, ni yuhi?

⁴³ Simoni azahitula angwe: Naγamba: Ni yuja afilweye mbazi kuzinka ṅwiyae. Azamuti: Uzaliγanyanya vyedi.

⁴⁴ Azamhitukila yuja mvyelengwa, azamlonga Simoni: Wamwona uyu mvyelengwa? Nizaingila nyumbai mwako, nkuninkile mazi ya kuhaka milundi, miya uyu azagisa milundi yangu meshozi, akibinda azayahonola na swili zakwe.

⁴⁵ Iwe nkufyosane na imi milomo; miya uyu, ivyo aingilevyo, nkadizile kufyosa milundi yangu.

⁴⁶ Mutwi wangu nkuushishize mavuta, miya uyu azashisha milundi yangu mafutilo ya mluziluzi.

⁴⁷ Nakuti: Kwa ivyoho mahuza yakwe mangi yazaushiγwa, hambu mikundishize yakwe ni mingi; miya mweushiliziγwa viγeke, mikundishize yakwe ni miγeke.

⁴⁸ Azamuti yuja mvyele: Mahuza yako yazaushiγwa.

⁴⁹ Waja weja nkande haṅwe naye wazaandiila kufanyanya mwe myoyo yawe kuγamba: Uyu ni ndai, akiushiliza wantu mahuza?

⁵⁰ Azamγamba yuja mvyele: Mitozesheze yako izakuvunila; hita mpeho!