Luka 3 - Kishambala New Testament 2005

Yohana mubatizi abilikila mwe nyika. 1-18.

¹ Kaiza Tibeliyo akitoza uzumbe mavuli kumi na mashano, Pontiyo Pilato azatoza shi ya Yudeya, kangi Helode ni zumbe ywa Galileya, nduγuye Filipo ni zumbe ywa Ituleya na Tilakoniti, Lisaniya ni zumbe ywa Abilene,

² Ana na Kayafa ni wavikizi wakulu; mishi ija mulomo wa Mulungu uzamlawila Yohana, ṅwana Zakaliya, mwe nyika.

³ Azaanga mwe shi zoshe ze nkanda nkanda ya muto wa Yolodani akibilikila ubatizi wa kuhitula ntongonyezi, kangwe uhuza uushiγwe,

⁴ sa vigondiγwevyo mwe kitabu cha mbuli za mteγanyi Yesaya kuγamba: Kanwa cha mtakubilikila chaivika mwe nyika angwe: Liγanyai sila ya Zumbe na kuγolosheza aho, ndiho agwile!

⁵ Vikolongo vyoshe vimemeziγwe, vilima na vituli vyoshe vipunguziγwe, hehotoka haγololwe, hashiholiγanana haliγanyanyiγwe!

⁶ Vyoshe vye moyo vione uvunizi wa Mulungu!

⁷ Waja wantu wangi walawilewo, wabatizwe ndiye, azawati: Wana nyoka inywi! Amionyesheye kuti: Mtazanyilika mayangwa, ndiyo yalawile, ni ndai?

⁸ Tendai kuwo jeivana na kuhitula ntongonyezi! Msheandiile kulonga mwe myoyo yenyu kuti: Tina tate yweshu Abulahamu! Hambu namiti: Mulungu adaha kumwinulila Abulahamu wana mwe aya mawe.

⁹ Miti iiteγanyiziγwe hoya nkoloi, kila muti ushiwovyaia matunda matana utakelwa, utatambikwa na mwe moto.

¹⁰ Waja wantu wazamwuza angwe: Titende zeze?

¹¹ Azawahitula angwe: Mwena fulana mbili amupangile yuja ashinaye!

¹² Kangi mwena nkande aγoshole sa ivyoho! Hata wangelu wazaiza, wabatizwe ndiye, wazamγamba: Mfuzi, titende zeze ishwi?

¹³ Azawati: Msheshanguze kuzinka haja muholaγiliziγwa!

¹⁴ Hata washilikali wazamwuza angwe: He ishwi, titende zeze? Azawati: Msheshentushe mimtu na kumtunguluka! Musheṅune kwa mbuli ya upokezi wenyu.

Uwona wa Yohana.

¹⁵ Wantu wakiafiza, ndivyo mbuli ya Yohana ibontoke, woshe wakifanyanya mwe myoyo yawe kuγamba: Minga ni Kilisito,

¹⁶ Yohana azawalandula waja woshe angwe: Imi nimibatiza na mazi; miya kwaiza mwenizinka nguvu, kwa udodo wangu nkaviniagiza, nikiinama, nimzaγawile mikowa ya vilatu vyakwe.

¹⁷ Yuja atazamibatiza na mpeho ṅazi na moto. Mwe mkono wakwe aitozize kihetelo, aṅaze twelo jakwe ja ngano; mshele atauingiza mwe ikilo jakwe, miya makanka atayaoka na moto ushizimawo.

¹⁸ Ne abilikilevyo mbalingwa na kuishunda na mbuli nyingi ntuhu.

¹⁹ Hata zumbe Helode azabunkulwa ndiye kwa mbuli ya Helodiya, mkaza nduγuye, na kwa mbuli mbada zoshe ntuhu,

²⁰ aγosholezo vivyoho, azaongeza mbuli kuti azamgela Yohana mwe chumba.

Yesu abatizwa. 21-22.

²¹ Haja wantu woshe wakibatizwa, Yesu yohe azabatizwa; lushe akivika, lwingu luzazuγuka,

²² mpeho mṅazi azasheela aiγwile ṅwili, viya ni wa suwa, izamwikaila, kangi kanwa chizalawa mwe lwingu angwe: Iwe u ṅwanangu, niyekukundisha; natamilwa ni weyo.

Wakale wa Yesu. 23-28.

²³ Yesu akiandiila ndima yakwe aibindile mavuli milongo mitatu, azafanyanyiγwa kuti: Ni ṅwana Yosefu, ṅwana Eli,

²⁴ ṅwana Matati, ṅwana Lewi, ṅwana Meleki, ṅwana Yanai, ṅwana Yosefu,

²⁵ ṅwana Matatiya, ṅwana Amosi, ṅwana Nahumu, ṅwana Esili, ṅwana Nagayi,

²⁶ ṅwana Mahati, ṅwana Matatiya, ṅwana Simeyi, ṅwana Yoseki, ṅwana Yoda,

²⁷ ṅwana Yohanani, ṅwana Lesa, ṅwana Zelubabeli, ṅwana Seyalitiyeli, ṅwana Neli,

²⁸ ṅwana Meleki, ṅwana Adi, ṅwana Kosamu, ṅwana Elimadamu, ṅwana Heli,

²⁹ ṅwana Yesu, ṅwana Eliyeza, ṅwana Yolimu, ṅwana Matati, ṅwana Lewi,

³⁰ ṅwana Simeyoni, ṅwana Yuda, ṅwana Yosefu, ṅwana Yonamu, ṅwana Eliyakimu,

³¹ ṅwana Meleya, ṅwana Mena, ṅwana Matata, ṅwana Natani, ṅwana Dawidi,

³² ṅwana Yese, ṅwana Obedi, ṅwana Bowazi, ṅwana Salimoni, ṅwana Nahasoni,

³³ ṅwana Aminadabu, ṅwana Alamu, ṅwana Hesiloni, ṅwana Pelesi, ṅwana Yuda,

³⁴ ṅwana Yakobo, ṅwana Isaka, ṅwana Abulahamu, ṅwana Tala, ṅwana Naholo,

³⁵ ṅwana Selugu, ṅwana Leγuwu, ṅwana Pelegi, ṅwana Ebeli, ṅwana Sala,

³⁶ ṅwana Kenani, ṅwana Alipakasadi, ṅwana Semu, ṅwana Nowa, ṅwana Lameki,

³⁷ ṅwana Metusela, ṅwana Henoki, ṅwana Yeledi, ṅwana Mahalaleyeli, ṅwana Kenani,

³⁸ ṅwana Enosi, ṅwana Seti, ṅwana Adamu, ṅwana Mulungu.