Luka 24 - Kishambala New Testament 2005

Yesu afufuka. 1-12.

¹ Miya mhitu wa bosi wa sabato, makelokelo kabisa wazahita kwe mbila, waiinule ija miti yehumpuntika vilana, waliγanyeyo.

² Wazabwila jiya iwe, jiishindikwe haja he mbila,

³ wazaingila, miya kimba cha Yesu nkawachiene.

⁴ Wakiaγilwa ni inu mbuli wazaona waγoshi waili, waiγoloke haja, waliho, waizwikile shuke zenamanika, viya ni lumuli;

⁵ wakishentuka, wazaoleza vyeni na shi; waja wazawati: Nini mkimlonda yuja mwe moyo kwa wafilewo?

⁶ Nkaho aha, azafufuka. Fukilai, amilongilevyo ake Galileya,

⁷ akimiti: Ṅwanangwa ywa muntu shuti ainkilwe mwe mikono ya wantu wahuza, akontelwe mwe muti; vikibinda mushi wa ntatu afufuke!

⁸ Wazafukila ziya mbuli zakwe.

⁹ Wazahauka haja he mbila, wazaukwila waja kumi na muṅwe na woshe watuhu izo mbuli zoshe.

¹⁰ Ni Maliya Magadalene na Yohane na Maliya, nine ja Yakobo, na waja watuhu we haṅwe nawo; wazaukwila ntuṅwa izi mbuli.

¹¹ Waja wakiiva izi mbuli wazafanyanya kuti: Ni ulongo, nkawazitozeshe.

¹² Miya Petelo azainuka, azaγuluka kwe mbila, azainama, ashungile na muja, miya azaona ziya shuke du; azahita na kaya azavimaka viya viγosholekevyo.

Wahina 2 wahita Emao. 13-35.

¹³ Mushi uja weyae wawe waili wazahita kwe muzi tanga, ni luγendo lwa saa mbili, muntu akilawa Yelusalemu, zina jakwe ndiho Emawo.

¹⁴ Wazaγenda wakishimwelana, ziya mbuli zoshe ziγendilevyo.

¹⁵ Wakishimwelana ivyoho na kuuzanya, Yesu ṅwenye azawalawila, azaγesanya nawo.

¹⁶ Miya mesho yawe yaitoziγwe, washemtaile.

¹⁷ Azawati: Ni mbuli ani izo, mzoγenda mkizitambikilana? Wazaγoloka na kununa.

¹⁸ Muṅwe mweitangwa Kiliyofa azamuti: Iwe u mγeni ike muja Yelusalemu, ukishetaila viya viγosholekevyo muja mishi inu? Azawati: Vihi?

¹⁹ Angwe ndiwo: Viya vya Yesu ywa Nazaleti; yuja ne ai mteγanyingwa, miγoshwele na milongele yakwe ne iina nguvu kwa Mulungu na kwa wantu.

²⁰ Yuja azainkilwa ni wavikizi wakulu na wafuṅwa wetu, alahwe masa ya kukoṅwa, azakontelwa mwe muti.

²¹ Miya ishwi ne tikimwalila kuti: Ne ndiye nezeavunile Waisilayeli. Kushima ivi vyoshe lelo ni mushi wa ntatu kuandiila uja mushi, viya vibontokeho.

²² Miya kuna wavyele weanga na ishwi, wazatishentusha, hambu wazahita makelokelo kwe mbila, nkawaene kimba chakwe,

²³ miya wazaiza, wazatiγambila, kuti wazaona walau wawalawilewo na kuwati: A moyo.

²⁴ Hata weshu kuṅwe, tiwoanga nawo, wazahita kwe mbila, wazaona sa viyaho, waja wavyele walongilevyo, miya ṅwenye nkawamwene.

²⁵ Lushe ṅwenye azawati: Inywi mushinawo viyuγo, myoyo yenyu yazuzulika kutozesha viya vyoshe, wateγanyingwa walongilevyo!

²⁶ Viya vyoshe nkavimtazile Kilisito, avilumiziγwe adaheingila mwe utana wakwe?

²⁷ Azaandusha kwa Mose na kwa wateγanyingwa wosheni kuwafumbwila mbuli zoshe, agondelwezo mwe baluwangwa zoshe.

²⁸ Wakibula kwe kaja kazizi, wakohita, ṅwenye azakionyaonya, viya atahita sila yakwe.

²⁹ Wazamkungumiza angwe: Ikala kwetu! Hambu kuzashwa, zuwa jizabinda kugongoloka. Azaingila, agone nawo.

³⁰ Akiikala haṅwe nawo, wakija nkande, azaγuwa mgate, azalavya ntogolo, azaubendula, azawainka.

³¹ Ne mesho yawe yahoγubulwa, wazamtaila. Ṅwenye nkaoniγwe lushe haja, waliho.

³² Wazaγambilana: Myoyo yetu uko ndai nkaifanane, viya iteashiγwa moto, akilonga na ishwi kuja silai na kutifumbwila baluwangwa?

³³ Ija minga wazainuka, wazauya Yelusalemu; waja kumi na muṅwe na weyae wawe weanga nawo wazawabwila,

³⁴ waiunganane wakilonga: Zumbe azafufuka kweli, azamlawila Simoni.

³⁵ Wohena wazashimwela viya vya silai na viya, avyotailwa ndiwo akiwabendwila mgate.

Yesu alawila wahina woshe. 36-49.

³⁶ Wakilonga izi mbuli, ṅwenye azaγoloka gatigati kwawe, azawati: Mpeho na inywi!

³⁷ Miya wazashentuka, wazaingilwa ni woγa. Wazaγamba, wateona mzimu.

³⁸ Azawati: Nini mkishentuka? Nini ntongonyezi ze ivyoho zikimuka mwe myoyo yenyu?

³⁹ Olelai mikono yangu na milundi yangu, kuti ni miyo ṅwenye! Nihahashai! Olelai! Hambu mzimu nkana nyama na mavuha, sa muvyoniona, kuti nina nayo.

⁴⁰ Akilonga ivyoho azawaonyesha mikono na milundi yakwe.

⁴¹ Miya waja wakekizilwe ni kutozesha kwa nyemi na kumaka, ne ahowati: Muna vya kuja aha?

⁴² Waja wazamunka kabendo ka kapala kaokiγweko.

⁴³ Azaγuwa, azaja, waiolele.

⁴⁴ Azawati: Izi ne ziya mbuli, nimilongilezo nike kwenyu kuti: Shuti zibontoke mbuli zoshe zigondiγwezo za imi mwe mulomongwa wa Mose na mwe baluwa za wateγanyingwa na mwe mazumongwa.

⁴⁵ Haja ne awafumbwileho mitailile ya kutaila ugondengwa,

⁴⁶ azawati: Ivyoho ne vigondiγwevyo, kangi ivyoho vizamtala Kilisito kulumiziγwa na kufufuka mushi wa ntatu kwa wafilewo,

⁴⁷ kuunga mwe zina jakwe mbali zoshe zibilikilwe, wahitule ntongonyezi zawe, kangwe masa yawe yadaheushiγwa; inu ndima iandiilwe Yelusalemu!

⁴⁸ Inywi mu waona wa izi mbuli.

⁴⁹ Olelai: Msuhi wa tate ywangu naumitumila inywi! Inywi humulai umu kaya, mpaka ndiho mgelwe nguvu yelawa uko ulanga!

Yesu ainulwa na mwe lwingu. 50-53.

⁵⁰ Azawalavya, azawaiγala Betaniya, azainula mikono yakwe, azawaṅaza mesho.

⁵¹ Aho akiwaṅaza mesho, azaushiγwa haja, waliho, azainulwa na mwe lwingu.

⁵² Waja wazagwa na shi na kumvika, wakibinda wazauya Yelusalemu na nyemi nkulu.

⁵³ Wazaikala vikiloi mishi yoshe na kumtogola Mulungu.