Luka 20 - Kishambala New Testament 2005

Ubatizi wa Yohana. 1-8.

¹ Mushi siku akifuza wantu vikiloi na kuwabilikila, kuzainuka wavikizi wakulu na watabaluwangwa haṅwe na waγolokezi,

² wazamuti: Tiγambile: Ivi uviγoshola kwa nguvu ani? Akunkileye unu ufuṅwa ni ndai?

³ Azawalandula angwe: Nami nimiuze mbuli ṅwenga, mwiniγambile:

⁴ Ubatizi wa Yohana uanduke mwe lwingu, hambu kwa wantu?

⁵ Waja wazafanyanya mwe myoyo yawe kuγamba: Ati tamuti: Mwe lwingu, atatiti: Nini mkishemtozesha?

⁶ Ati tamuti: Kwa wantu, wantu wosheni watatihomela mawe, hambu wazaisa kutozesha kuti: Yohana ni mteγanyingwa.

⁷ Wazalandula: Nkatitaila, ukoanduka nako.

⁸ Yesu azawati: Lushe nami simiγambila, ati niviγoshola kwa nguvu ani.

Walimi wabada wa mizabibu. 9-19.

⁹ Azaandiila kulonga wantu lushimo ulu: Muntu azahanda mizabibu, azaiinkila kwa walimi, ṅwenye azahita mwe shi ntuhu mishi mingi.

¹⁰ Mishi ikitimiza, azatuma mubwanga kwa waja walimi, kangwe wamunke mazabibu. Miya waja walimi wazamluta, vikibinda wazamγotosha mikono du.

¹¹ Azatuma vituhu mubwanga mtuhu, miya waja wazamluta yohena, wazamkanka, wazamγotosha mikono du.

¹² Azauγiza kutuma ywa ntatu, miya uyu yohena waja wazamγulusha na kumlavya vilonda.

¹³ Ne yuja ṅwenye mizabibu ahoγamba: Nitende zeze? Nenimtume ṅwanangu, niyemkundisha, minga uyu newaingilwe ni shoni naye.

¹⁴ Miya waja walimi wakimwona wazafanyanya, kangi wazaγambilana: Uyu ni mupazi; ndokoi, timkome, kangwe ufa uγaluke wetu!

¹⁵ Wazamluγusha, alawe mwe mizahibu, wazamkoma. Lushe yuja ṅwenye mizabibu atawatenda zeze?

¹⁶ Atabita, akome waja walimi, ainkile ija mizabibu kwa watuhu. Wakiviiva wazaγamba: Vikashetaγosholwa kwetu!

¹⁷ Azawaolela, azawati: He ija mbuli igondiγweyo kuγamba: Iwe, wazengo wabentilejo, jizaγaluka shikizi ja heta?

¹⁸ Kila ndiye akine mwe iji iwe, atabanika, kangi ndiye jinikinile, jitamtiγinta.

¹⁹ Ija ngela watabaluwangwa na wavikizi wakulu wazalonda, ndivyo wamgwile, miya wazaogoha wantu; hambu wazataila, kuti luja lushimo alulongile kwa mbuli yawe.

Kodi ya Kaiza. 20-26.

²⁰ Wazamγoj aγoja, wazatuma, ndiwo wamnyatile, wekionyaonya viya watatozesha, kangwe wamgwize na mbuli, ndiyo alonge, wadahemwinkila kitala na bomani kwa mtoza shi. Wazamwuza angwe:

²¹ Mfuzi, tataila kuti: Ulonga na kufuza vyeγolokela, nkuolela vyeni vya wantu, miya ufuza sila ya Mulungu, ilivyo kweli.

²² Vina ṅwiko, tikimunka Kaiza kodi, hambu nkavina?

²³ Miya azataila ubada wawe, azawati: Nini mkiniγeza?

²⁴ Nionyeshai sumni! Ina chapa na ugonde wa ndai? Angwe: Wa Kaiza.

²⁵ Azawati: Kwa ivyoho munkei Kaiza viya vya Kaiza, kangi Mulungu mumunke viya vya Mulungu!

²⁶ Nkawadahile kumgwila na inu mbuli yakwe, wantu wai hsho, wazamaka milandwile yakwe, wazaleka lwashu.

Ufufuki. 27-40.

²⁷ Masadukeyo wazamwizila, ni waja wekela nkani kuti:

²⁸ Nkahana ufufuki, wazamwuza angwe: Mfuzi, Mose azatigondela kuγamba: Mkuluwe ja muntu akifa aina mvyele na kusheasha ṅwana, shuti nduγuye amupale yuja muke, amwinulile mkuluwe mbeleko!

²⁹ Ne kwina wanduγu mfungate; yuja ywa bosi azaγuwa mvyele, azafa aishina ṅwana.

³⁰ Yuja ywa mbili azamupala, yohe azafa aishina ṅwana.

³¹ Hata yuja ywa ntatu azamupala, vivyoho waja woshe mfungate, niiya wakifa nkawaashize wana.

³² Kushilikiza yuja mvyele yohena azafa.

³³ Lushe mwe ufufuki neaγaluke ywa ndai?

³⁴ Hambu woshe mfungate, ne waina naye. Yesu azawati: Wana wa inu shi waγuwa kangi waγwiγwa.

³⁵ Miya ndiwo wakundiziγwe kuikala mwe ija shi, ndiyo nezeilawile, wafilewo wahozafufuka, waja nkawaγuwa, nkawaγwiγwa.

³⁶ Hambu nkezewafe vingi, wafanana na walaungwa, kangi ni wana Mulungu, kwa kuti ni wanangwa wa ufufuki.

³⁷ Inu mbuli kuti: Wafilewo wafufuka, hata Mose azabuliza kuilonga haja he jiya shafi, akimwitanga Zumbe: Mulungu ywa Abulahamu na Mulungu ywa Isaka na Mulungu ywa Yakobo.

³⁸ Kangi Mulungu SO ywa wafilewo, ni ywa we moyo. Hambu kwakwe woshe wa moyo.

³⁹ Watabaluwangwa kuṅwe wazamwitikila angwe: Mfuzi, uzalonga vitana.

⁴⁰ Nkawaγezize vituhu kumwuza mbuli.

Kilisito ni ṅwana Dawidi? 41-44.

⁴¹ Azawati: Wantu walonga zeze kuti: Kilisito ni ṅwana Dawidi?

⁴² Hambu Dawidi ṅwenye azalonga mwe kitabu cha mazumo kuti: Zumbe azamlonga Zumbe ywangu: Ikala kulume kwangu,

⁴³ mpaka ndiho nezeniike wankulu wako shi he milundi yako!

⁴⁴ Dawidi ṅwenye amwitanga Zumbe, lushe ni ṅwanae vivihi?

Masa ya walabaluwangwa. 45-47.

⁴⁵ Wantu woshe wakimteγeleza, azalonga wahina wakwe: Kiγojeshei kwa mbuli ya watabaluwangwa!

⁴⁶ Watamilwa ni kuanga waizwikile shuke za kizumbe, watamilwa ni kuluγushiγwa lwazoi, mwe mavikilo waikala mwe viti vya wazumbe, hata wakilalikwa kwe nkande waikala ha wafuṅwa.

⁴⁷ Waaja nyumba za wavyelengwa wafilwewo ni waγoshi, kangi wakionyaonya, viya wataisiiza kuwahembelezeza. Awa watazalahwa masa yezinka ya weyae wawe.