Luka 14 - Kishambala New Testament 2005

Yesu amhonya mtamu ywa bumbwazi mushi wa sabato.

¹ Mishi ija akiingila mwe nyumba ya mkulu ywa Mafaliseyo mushi wa sabato, aje nkande, waja wazamγojaγoja.

² Muja alimo muna muntu mwehuma bumbwazi.

³ Yesu azawalonga watamulomongwa na Mafaliseyo, azawati: Vina ṅwiko kuhonya mushi wa sabato, hambu nkavina? Waja wazaleka lwashu.

⁴ Azamγuwa, azamhonya, azamshungula.

⁵ Waja azawati: Kwenyu kuna mwena ṅwanae ao du ṅombe, ikikina mwe kishima, ndiye ashefikeilavya, hata ni mushi wa sabato?

⁶ Aho nkawadahile kumlandula.

Muntu atende moyo mdodo.

⁷ Waja walalikwewo azawazisa lushimo akiona, wavyokundisha kuikala hantu ha kushimilwa, azawati:

⁸ Ukilalikwa nimuntu kwe nteγuzi usheikale hantu ha kushimilwa, kangwe kusheoneke alalikweye mweagiza kugimbikwa kukuzinka iwe,

⁹ kangwe kusheize yuja akulalikeye iwe na yuja ṅwiyawo akikuti: Mhakanye uyu! Ne utaandiila kuikala na shoni hantu ha shilikiza.

¹⁰ Miya ukilalikwa hita, uikale ha shilikiza, kangwe kukiiza akulalikeye akuγambe: Ṅwiyangu, shweza na kenya! Ne utagimbikwa, woshe waikalewo haja waiolele.

¹¹ Hambu kila mwekikuza ṅwenye atazapunguziγwa kangi mwekipunguza ṅwenye atazakuziγwa.

¹² Azamγamba yuja amlalikeye: Iwe ukikaliγanya nkande za waγeni, ati ni za makelo, ati ni za ṅwiyaγulo, ushelalike wambuyawo na wanduγu wako na wazuli weyawo, kangwe wohe washekulalike vingi, ukilihiγwa ndiwo!

¹³ Miya ukikaliγanya nkande za waγeni lalika wakiwa na wavilema na washiγendawo na matuntu!

¹⁴ Nezeuone nyemi, kwa kuti nkawana vya kukuliha; hambu utazalihiγwa mwe ufufuki wa watanda.

¹⁵ Waja waikalewo haṅwe naye ṅwiyae ywawe muṅwe akiiva izi mbuli azamγamba: Mwe nyemi ni yuja, ndiye aje nkande mwe uzumbe wa Mulungu!

Lushimo lwa mlaliko mkulu wa nkande. 16-24.

¹⁶ Azamuti: Muntu azaliγanya nkande nyingi za waγeni, azalalika wangi.

¹⁷ Ha jiila nkande hakikinta, azatuma mubwanga ywakwe, alonge waja walalikwewo kuti: Izai! Hambu vyoshe viiliγanile.

¹⁸ Woshe kiṅwe wazaandiila kulandula; ywa bosi azamuti: Nizaγula γisa, shuti nihite, nijiolele; nakuhembeleza, ushenikaalize!

¹⁹ Ṅwiyae azalonga: Nizaγula ṅombe kumi za hunila magali, nahita, niziolele; nakuhembeleza: Ushenikaalize!

²⁰ Mtuhu azaγamba: Nizaγuwa mvyele; kwa ivyoho sidaha kuiza.

²¹ Yuja mubwanga azauya, azavimwukwila baba yakwe. Ne yuja zumbe ahokwelwa ni maya, azamγamba mubwanga ywakwe: Lawa nguzu, uhite kwe nyazo na kwe ndumi za muzi, ulete wakiwa na wavilema na matuntu na washiγendawo na kunu!

²² Vikibontoka, yuja mubwanga azamlonga: Zumbe, ulaγilizevyo vizabontoka, miya nyumba nkaimemile.

²³ Yuja zumbe azamγamba mubwanga ywakwe: Lawa, uhite kwe sila na nkoi, uwakungumize, waingile, kangwe nyumba yangu imeme!

²⁴ Hambu namiti: Waja waγoshi, ndiwo wakilalikwa, nkakuna ndiye aje nkande zangu.

Ndivyo muntu amtongele Yesu. 25-27.

²⁵ Wantu wangi muno wazahita naye, azawahitukila, azawati:

²⁶ Ati muntu aiza kwangu akishemshwika ishe na nine na muke na wanae na wakuluwe na wanduγuze na walumbuze, haṅwe na kukishwika ṅwenye, nkadaha kuγaluka mhina ywangu.

²⁷ Ashiyeinula muti wakwe wa kukomelwa akinitongela, nkadaha kuγaluka mhina ywangu.

²⁸ Hambu kwenyu kuna muntu mwekunda kuzenga geleza, ashineikala akitala mali yakwe, ati ana ya kujibindila?

²⁹ Kangwe akibinda kukontela shikamilo lushe akishedaha kubontola, woshe weviona washezaandiila kumluvya kuti:

³⁰ Uyu muntu azaandiila kuzenga, miya nkadaha kubindiliza.

³¹ Hambu kuna zumbe mwekunda kumwiγaila zumbe mtuhu nkondo, ashineikala na kufanyanya, ati wantimizi wakwe makulija kumi adaha kumwomanya nawo yuja mwemtimila na wantimizi makulija milongo mili?

³² Ati nkadaha, atamtumila yuja, ake hale, walau amhembeleze, waivane.

³³ Vivyoho hata inywi nyoshe, ndiye ashetowe hulu viya vyakwe vyoshe, nkadaha kuγaluka mhina ywangu.

³⁴ Munyu ni mtana; miya ati munyu wabanika, utazifiγwa na mbwai?

³⁵ Nkautama, ukigelwa mwe lubuwa ao du mwe masinku, utaashiγwa du. Mwena mashikilo yeiva neaive!