Luka 13 - Kishambala New Testament 2005

Wahuza kuzinka ni wahi?

¹ Mishi ija kuna wamγambilewo mbuli ya waja Wagalileya, Pilato aγwilewo mpome yawe akiivanganya na ija ya ṅombe za mviko.

² Azawalandula angwe: Kumbe muγamba: Waja Wagalileya ni wahuza kuzinka Wagalileya woshe, kwa kuti wazaγoshwelwa ivyoho?

³ Namiti: Sivyo! Miya mkishehitula ntongonyezi zenyu, nyoshe nezemubanike sa viyaho.

⁴ Hambu waja kumi na mnane washuntiγwewo ni mnala kuja Silowa na kukoṅwa, muγamba kuti: Ni wamasa kuzinka wantu woshe weikala Yelusalemu?

⁵ Namiti: Sivyo! Miya mkishehitula ntongonyezi zenyu, nyoshe nezemubanike sa viyaho.

Lushimo lwa mkuyu.

⁶ Azawalonga ulu lushimo: Kuna muntu ahandileye mkuyu mwe mγunda wakwe, aakahita kwa londa nkuyu, miya nkaonela.

⁷ Ne ahomlonga mulima mγunda: Olela! Mavuli matatu nizaiza nikilonda nkuyu mwe unu mkuyu, miya siziona; uukele! Ufinta wai mγunda?

⁸ Yuja azamlandula angwe: Zumbe, uuleke iji vuli du, niutibwile, niugele masinku, ati inga uvyale mishi ye nyuma!

⁹ Ati washevyala vivyoho, utadaha kuukela.

Yesu ahonya mvyele mushi wa sabato.

¹⁰ Azaikala akifuza vikiloi mushi wa sabato.

¹¹ Ne mwina mvyele mwena mpepo imhumizeyo mavuli kumi na mnane, azakikunga, nkadahile kuγolokela hata.

¹² Yesu akimwona azamlonga angwe: Mlala, uzabinda kuukilwa ni utamu wako;

¹³ azamubadikila mikono, viya du lushe mγongo uzaγolokela, azamtogola Mulungu.

¹⁴ Mkulu ywa vikilo azalandula; hambu azaihilwa, kuti Yesu azamhonya mushi wa sabato, azawati waja wantu: Kuna mishi mtandatu yeagiza kuγoshola ndima; mishi ija izai, muhonyiγwe, muvileke mushi wa sabato!

¹⁵ Zumbe azamlandula, azamuti: Mwahemba inywi! Nkamshungula inywi nyoshe mushi wa sabato ṅombe na mpunda zenyu he lubala lwa jiila, mkiziiγala kwa zinywesha?

¹⁶ Uyu mvyelengwa ni ṅwana Abulahamu, Satani azamshunga mavuli kumi na mnane, lushe nkaviagiza, luja luγole akilushungwilwa mushi wa sabato?

¹⁷ Akilonga ivyoho, woshe wamkezilewo nkani wazabulwa ni shoni, miya wantu woshe wazatamilwa ni viya vitana viγosholwevyo ndiye.

Lushimo lwa mvumo. 18-21.

¹⁸ Ne aholonga: Uzumbe wa Mulungu ufanana na mbwai?

¹⁹ Niufanyanye na mbwai? Ufanana na kahuluzi ka ntunda ya mvumo, muntu akikaγuwa, akikahanda mwe mγunda wakwe, kakula, kaγaluka muti, hata madeγe yeanga ulanga yaiza, yazenga mwe matambi yakwe.

Shimbi.

²⁰ Vituhu azalonga: Uzumbe wa Mulungu niu

²¹ fanyanye na mbwai? Ufanana na shimbi, mvyele akijiγuwa, akijigela mwe ngahu ntatu za mushu wa ngano, kangi mushu woshe wajikolela.

Nkili shishili.

²² Azaanga mwe mizi mikulu, hata mwe mizi tanga na kubilikila, ni aho akiiamba na Yelusalemu.

²³ Kuna amlongileye: Zumbe, kumbe wevunilwa ni waγeke du? Azawati: Gombai, mwingile mwe ija nkili finyu!

²⁴ Hambu namiti: Wangi newalonde ha ingiila, miya nkewahakombaγanye.

²⁵ Aho ndiho ṅwenye nyumba abindile kuinuka na kuzuγala luvi, ne ndiho nezemwandiile kuγoloka se na kugoṅonda kuti: Zumbe, tizuγwile! Miya atamilandula, atamiti: Simitaila, mkoanduka nako.

²⁶ Ne ndiho nezemwandiile kulonga kuti: Tizaja, tizanywa, uitiolele, kangi uzatifuza lwazoi kwetu.

²⁷ Atamilandula kuti: Sitaila, mkoanduka nako. Ukai kwangu nyoshe! Mu wandima wawiwi!

²⁸ Ne ndiho mulilile na kukemeza meno mkizamwona Abulahamu na Isaka na Yakobo na wateγanyingwa woshe, wai mwe uzumbe wa Mulungu, miya wenye nemshindikwe na se!

²⁹ Kangi kutaiza wantu weanduka kwelawa zuwa na kweingila zuwa na kwegwila zuwa mishi ya nyota na kwegwila zuwa mishi ya vuli, waikale, waje nkande mwe uzumbe wa Mulungu.

³⁰ Kangi kuna washilikizewo, ndiwo walongole; kangi kuna walongolewo, ndiwo washilikize.

Helode.

³¹ Ija minga kuzaiza Mafaliseyo kuṅwe, wazamuti: Lawa kunu, uhite! Hambu Helode akunda kukukoma.

³² Azawati: Hitai, mkaγambile jiya gogo: Olela! Nikeingata mpepo, nikebindiliza ndima ya kuhonya watamu lelo na keloi, miya mushi wa ntatu mbuli zangu zabontoka.

³³ Kangi lelo na keloi na kishindo shuti nitambe! Kangi nkavidahikana, mteγanyingwa akikoṅwa kutuhu, kushima Yelusalemu.

Yelusalemu. 34-35.

³⁴ Yelusalemu! Yelusalemu! Wakoma wateγanyingwa, watumiγwewo na kwako, wawahomela mawe! Ni kangahi, nikikunda kuunganyanya wanawo, sa viyaho nguku ivyounganyanya visiyo mwe mawawa yakwe, miya inywi mzalemela!

³⁵ Shivyo, nyumba zenyu neziashiγwe mahuzu! Namiti: Nkezemunione, mpaka ndiho nezemulonge: Atogolwe mweiza mwe zina ja Zumbe!