2. Watesalonike 2 - Kishambala New Testament 2005

Kuuya kwa Zumbe Yesu, kuiza kwa muntungwa ywa uhuza.

¹ Kwa mbuli ya kuuya kwa Zumbe ywetu Yesu Kilisito na kwa mbuli ya kuγamba: Titazaungananilana hakwe, tamihembeleza, wanduγu, mshefikeazaγanyiγwa viyuγo vyenyu,

² kangi mshebabatushiγwe ni vya kimpehompeho ao ni mbuli ao ni baluwa mkiγangwa: Ilawa kwetu ya kuγangwa: Mushingwa wa Zumbe u hehi.

³ Muntu ashezamiufya, hata akilonga mbwai na mbwai! Shuti kuneoneka mubahukano, shuti kunebunkuka yuja niuntungwa ywa uhuza, ne ṅwanangwa ywa mubaniko,

⁴ ne mubishi mwemfyulila vyoshe vya Mulungu na vya mviko, mpaka ṅwenye aikale mwevikilo ja Mulungu akibilikila kuti: Imi ni Mulungu.

⁵ Nkamfukila kuti: Nizavimiγambila nike kwenyu?

⁶ Kangi ivi lushe mwavitaila viya vyefingiza, kangwe ashelawile mushi wakwe.

⁷ Hambu viya vya uhambanyi vyekaγosholwa na kufisha vyaandiila kutenda nguvu, komo yuja mwefingiza mpaka ivi lushe aneushiγwa.

⁸ Ne ndiho yuja mhuza ṅwenye alawile, miya Zumbe Yesu atazamwusha akimvuzila du na kanwa chakwe, atazamubindiliza na langaila ja mwuyo wakwe.

⁹ Yuja miizile yakwe iγesiγwa kwa ufuṅwa wa Satani na nguvu na ntangilo na vimaka vyoshe vya ulongo,

¹⁰ ahosa waja webanika na lwufyo lwoshe lwa ubaγibaγi, kwa kuti nkawakundile kuitika viya vye kweii wakihonyiγwa ndivyo.

¹¹ Kwa inu mbuli Mulungu awatumila miazaγanyo ye nguvu, kuunga watozeshe viya vye ulongo.

¹² Ivyoho watazalahwa woshe, ndiwo wakishetozesha vye kweli, ndiwo wakitamilwa ni upapala.

¹³ Ishwi vyatiagiza kumlaviliza Mulungu ntogolo mishi yoshe kwa mbuli ya inywi wanduγu, mwekundishiγwa ni Mulungu, kuti Mulungu azamishaγula aho kale, mhonyiγwe, mṅaziγwe ni mpehongwa, mtozeshe vye kweli.

¹⁴ Hambu ne amiitangilavyo na ulau wetu, kangwe mumote utana wa Zumbe ywetu Yesu Kilisito.

¹⁵ Lushe wanduγu, γolokai, mtozeshe mbuli mufuziγwezo, ati mzazibilikilwa, ati mzazigondelwa ni shwiyo.

¹⁶ Miya Zumbe Yesu Kilisito ṅwenye na Mulungu, Tate yweshu, mwetikundisha, mwetinka kwa mbazi du mhembulizo wa kale na kale na kialilo kitana,

¹⁷ ashangalaze myoyo yenyu, aigele nguvu, mtimile ndima na mbuli ntana zoshe!