2. Wakolinto 2 - Kishambala New Testament 2005

¹ Mwe moyo wangu ne nikifanyanya, nisheize kwenyu na ukiwa vituhu;

² hambu ati imi namiihiza, lushe ndiye aleke, nikitamilwa ni ndai, ati so waja niandiilewo kuihiza?

³ Viya vya zuzi nizavigonda, kangwe nikizaiza nisheihilwe ni waja weagiziγwa ni kunitamila, hambu nina ichi kialilo na inywi nyoshe kuti: Nyemi yangu ni ya inywi nyosheni.

⁴ Haja nizamigondela na ukiwa ungi nikinenekwa ni moyo, vizanilavya meshozi mangi, so kuγamba mwihiziγwe, miya kangwe mtaile, nivyoisa kumikundisha inywi.

Paulo alaγiliza, mhuza ahokelwe mwe bumba

⁵ Ati kuna aihizeye, nkaniihize imi, miya inywi nyoshe, ao du kuṅwe, nishelonge na ntotomezi.

⁶ Kesa muntu mwe ivyoho ashundwe ni nywiyo wangi.

⁷ Vikibinda vyamiagiza lushe kumfila mbazi na kumshikiza, kangwe ashevivilwe, ukiwa ukimwisiiza.

⁸ Kwa inu mbuli namihimila kumwonyesha lushe, kuti mwamkunda.

⁹ Kwa inu mbuli nizagonda, kangwe nitaile muvyozizimiza, ati mwaitika mbuli zoshe.

¹⁰ Ndiye mumwushilize masa, hata imi; kangi imi nami niushilizevyo, ati nizaviushiliza, nizaviγoshola kwa mbuli ya inywi, niiolelwe ni Kilisito,

¹¹ kangwe tishezafutwa ni Satani, hambu ishwi nkakuna ashiyetaila mizungu yakwe.

Ntambo ya Paulo na nguvu yakwe.

¹² Aho nikizaiza Tilowa kwa bilikila mbulingwa ya Kilisito, hata nikizuγwilwa luvi, sidahile kuvota moyo wangu, niikale, kwa kuti

¹³ simubwile Tito, mnduγu ywangu; ne nizawalaga, nizahita Makedoniya.

¹⁴ Miya Mulungu atogolwe mweleka, nivote koshe koshe na nguvu ya Kilisito, mweleka, tifumbule koshe koshe kuti: Kumtaila vina mulile!

¹⁵ Hambu ishwi tamγalukila Mulungu mzingo mtana wa Kilisito kwa waja wehona na kwa waja webanika.

¹⁶ Awa liyawaγalukila mzingo weanduka kwe kifa, kangi weonya kwe kifa, miya waja tiyawaγalukila mzingo weanduka kwe nkalamo, kangi weonya kwe nkalamo. Mwevidaha ivi, ni ndai?

¹⁷ Hambu ishwi nkatifanana na wangi watuhu wechuluza na mbuli ya Mulungu, miya tivyoanduka na ukweli, tivyoanduka kwa Mulungu, ne tivyolonga na kumwalila Kilisito, titaile kuti: Mulungu atiolela.