2. Petelo 3 - Kishambala New Testament 2005

Zumbe nezeauye, hata abelwe.

¹ Wanduγu, inu baluwa, niyomigondela aha, ni ya mbili, kangwe nimigonye mesho na kumikumbusha, mtende ntongonyezi za kweli.

² Fukilai mbuli zilongiγwezo kale ni wateγanyi waṅazi na ziya za mlaγilizo wa Zumbe mhonya, mulongiγwezo ni ntuṅwa zenyu!

³ Bosi tailai inu mbuli kuti: Mishi ija ya bindilizo kutazalawila wafyosi wena ufyosi ubada, wetongela luzisho lwawe lwoshe, angwe:

⁴ Kilaγa cha kuuya kwakwe chi kuhi? Hambu watate zeshu wazafa, kangi vyoshe vyaikala vivyoho, sa viyaho vya kale vikiumbiγwa.

⁵ Awa wekihima ivyoho wajala mbuli ṅwenga kuti: Aho kale ṅwenye lwungu na shi zizalawa mwe mazi, zizatoγa mwe mazi kwa mulomo wa Mulungu,

⁶ vituhu ija ngulu yoshe ya kale izabanika na mazi, yakiisiiza kumema.

⁷ Vivyoho lwingu lwa ivi lushe haṅwe na inu shi ziikilwe kwa uwo mulomo, kangwe nezezibanike na uja moto mushi wa masa, wantu wawiwi wahozabanilwa.

⁸ Miya wanduγu, inu mbuli ṅwenga msheijale kuti: Kwa Zumbe mushi muṅwe ufanana viya ni mavuli kulija, kangi mavuh kulija yafanana viya ni mushi muṅwe. Zumbe nkazuzulisha kilaγa chakwe,

⁹ sa kuṅwe wavyoγamba: Ni kuzuzulisha uko, miya atezizimiza kwa mbuli ya inywi, hambu nkakunda, kuṅwe wakiaγa, akunda, woshe wahitule ntongonyezi zawe.

¹⁰ Miva mushingwa wa Zumbe utazaiza, viya ni mubavi, ne ndiho lwingu luchakuke na vuzo, hata vyoshe vituhu vitabanika kwa kukasiγwa, inu shi na ndima ze mumu zitabunkuka.

Tikiteγe tikialila mushi ndiho vyoshe vibanike na moto.

¹¹ Ivi vyoshe vikibanika ivyoho, lushe nkavimiagiza kutenda myangile miṅazi yemtamila Mulungu?

¹² Ivyoho ne kuafiza na kualila mushi wa Zumbe, ukinte kinyanyi, ndiwo lwingu lubanikile nawo na moto, ndiwo vyoshe vituhu vitiγintikile nawo kwa kukasiγwa.

¹³ Miya taalila lwingu luhya na shi mpya zeikailwa ni utanda, sa livyoinkwa kilaγa chakwe.

¹⁴ Lushe wanduγu, ati mwaalila ivyoho, kihimei, kangwe nezemumumanyikile, kuti mwaanga kishiuhuza na kishimasa, kuti muna utondolo!

¹⁵ Kangi uwo uzizimizi wa Zumbe ywetu utalei, kuti ni uvunizi wenyu, sa mnduγu ywetu Paulo yohena avyokagonda kwa mitailile yakwe,

¹⁶ ainkiγweyo; mwe baluwa zakwe zoshe alonga mumo izi mbuli; kweii kuṅwe avyogonda vina ntoγo kuviiva; wantu washiwotaila mbulingwa vyedi, washiwoitozesha vyedi wavihotola, sa wavyohotola ugondengwa woshe utuhu, ne wavyokihosa wenye.

¹⁷ Miya inywi wanduγu, mkivitaila, vishizati vilawile, kiγojeshei, kangwe nenywi mshezaazaγanyiγwa ni lwazaγanyo lwa wantu wawiwi, mkiasha vyeminka nguvu!

¹⁸ Γenyezai kuγuwa mbazi, na kumtaila Zumbe vyedi na mhonya ywetu Yesu Kilisito! Uyu atogolwe ivi lushe mpaka kwe uja mushi wa ukalami! Amini.