1. Watesalonike 3 - Kishambala New Testament 2005

Timoteyo azamshangalaza Paulo.

¹ Tikishedaha kuzizimiza tizakunda kuashiγwa Atene wenye du,

² tikimtuma mnduγu ywetu Timoteyo mwemtumikila Mulungu na kubilikila ulau wa Kilisito; tizamtuma, amigele nguvu na kumishangalaza kwa mbuli ya mitozesheze yenyu,

³ kangwe kusheoneke mweaγilwa mishi inu ya ukiwa, hambu wenye mwataila kuti: Mbuh tiyoikilwa ni iyo.

⁴ Hambu hata haja tike kwenyu taavimiγambila kuti: Tatalwa ni kulumiziγwa, sa vihitilevyo kwa hontoka, sa muvyotaila.

⁵ Kwa inu mbuli sidahile kunazizimiza, miya nizaiuma, kangwe nitaile, mitozesheze yenyu ilivyo, ati yuja mtakuγeza azamiγeza, ati muku wetu uzaγaluka wa bule.

⁶ Miya Timoteyo azauya akilawa kwenyu, azatitamwila na nyemi, muvyotozesha, muvyokundishana, kangi muvyotitonga vitana mishi yoshe, muvyotendwa ni luzwi lwa kuonana na ishwi, sa ishwi na inywi.

⁷ Ivyoho tizahembuliziγwa kwa mbuli ya inywi, wanduγu, mwe nkondo na ukiwa wetu woshe tikiiva viya vya mitozesheze yenyu.

⁸ Hambu inywi mkiγoloka mwina Zumbe, ishwi ti moyo.

⁹ Tikitongonyeza tiyadaha kumwuziza Mulungu ntogolo ani kwa ija nyemi yoshe, tiyoona kwa Mulungu kwa mbuli ya inywi?

¹⁰ Kilo na mushi tizaisiiza kuhembeleza iyo mbuli ṅwenga, tionane na mywi vyeni kwa vyeni, tidahe kumigela nguvu, mitozesheze yenyu ihotenda unyonge.

¹¹ Mulungu ṅwenye, Tate yweshu, na Zumbe ywetu Yesu agwize sila yetu na kwenyu!

¹² Inywi, Zumbe amiγenyezeze mbazi zena mpaγatishi, mkundishane wenye na wenye, kangi mkundishe woshe watuhu, sa ishwi tivyomikundisha inywi,

¹³ kangwe myoyo yenyu itoγe vitana, ishowe masa, imtamile Mulungu, Tate yweshu, na kuṅala aho, Zumbe ywetu Yesu akiuya haṅwe na waṅazi wakwe woshe.