Zabuli 99 - Biblia Kikutu

ZABULI YA 99

¹ Mndewa Imulungu kotawala, wanhu wa isi zose wagwaye. Kakala mkigoda cha undewa hagati ya viumbe weli na mabawa, isi itigisike.

² Mndewa Imulungu mkulu ako Sayuni, na heyo kauchanha ya iwanhu wa isi yose.

³ Wanhu waditogole twaga jake kulu da kudumbiza, heyo ayo yong'ala.

⁴ Mndewa kana nguvu na koinogela haki, gweye ayo uitawala haki, kugala nhaguso na haki kwa Izilaeli.

⁵ Mtogoleni Mndewa Imulungu, Imulungu wetu, fugameni hana ikigoda cha magulu gake, heyo ayo yong'ala.

⁶ Musa na Haluni wa hagati ya iwalava nhosa wake, na Samweli mna iwao odikema twaga jake, viwamkemile Mndewa Imulungu kawedika.

⁷ Mmhanda ya wingu kakala kolonga na hewo. Wazigoga amuli zake na lagizo diyawagwelele.

⁸ Gweye Mndewa Imulungu, Imulungu wetu, gweye ayo uwedike Waizilaeli, kumwao kukala Imulungu ugela kumgongo, hamoja kugatagusa gehile gao.

⁹ Mtogoleni Mndewa Imulungu, Imulungu wetu, fugameni kulozela kulugongo lwake lung'ala, kwavija Mndewa Imulungu, Imulungu wetu kong'ala.